Хезмәт

Мылкыд кужымзэс эскерись ӧнер

Малпасько, котькин понна но оген улонлэсь но оген пересьмонлэсь кышкыт номыр но ӧвӧл, дыр. Но, жаляса верано, оген уг кыльы шуыса, нокин но юн оскыса вераны уг быгаты.

Кудӥз ке адями вань улонзэ ужезлы, мукет адямиосты утёнлы сӥзе но, аслэсьтыз семьязэ

кылдытытэк, валатэк но кыле, кызьы солэн улонэз ортчиз. Та учыре социальной удысын ужасьёс адямиос понна самой матысь эшъёс луо. Соос асьсэлы секыт, но со дыре ик калыклы туж кулэ луись ӧнер бырйизы. Соослэн ужзы шоры вылӥ кылкутонэн учкемзы трос адямиослэсь улонзэс умоятэ но капчиятэ.

Социальной ужась — со сыӵе ӧнер, кудӥз адямилэсь физической кужымзэ гинэ ӧвӧл, мылкыд кужымзэ но эскере. Та удысын ужаны капчи ӧвӧл, малы ке шуоно кин гинэ тодмотэм адямилэсь проблемаоссэ, сюлэм вӧсь луонъёссэ валаны быгатэ. Соин ик тросэз социальной удысын тыршисьёс сюлэмзы куремъя гинэ та ӧнерез бырйизы, луоз. Соос пӧлы Ципьяысь Сидоровъёслэсь семьязэс но пыртыны луэ.

Сидоровъёс ини кема аръёс ӵоже «Наз» центрын ужало. «Семейной подряд» шуид ке но соосты, янгыш уз луы. Анайзы, атайзы но соослэн бадӟым нылзы Людмила — ваньзы улонзэс та удыслы сӥзьыса ужало.

Нина Тихоновна 15 арлэсь тросгес  «Наз» социальной дурбасьтонъя отделын ужа ини, соин ик Нинапайлэн ини бадӟым социальной опытэз. Та сярысь верало одӥгез Нинапайлэн утёно муртэзлэн, Маргарита Ачаликовалэн (Ципьяысь II-тӥ группаё инвалид) гожтэм чуръёсыз: «Ӟеч сямо, жалясь мылкыдо луэмез понна вуттӥсько тау карон кылъёсме социальной ужасьлы Сидорова Ниналы. Со ужа куинь ар ӵоже. Та куинь ар ӵоже со юрттӥз мыным юртлы но музъемлы кагазъёсты дасяны. Инмарлэн юрттэменыз мыным пичигес корка пуктыны юрттӥзы, юртэлы мон туж шумпотӥсько. Нина юрттӥз газ, ву пыртыны, канализация радъяны, корка азе забор но капка лэсьтыны. Нош тани кемалась ӧвӧл, май толэзе, коркаме сайдинген но шуныт возись материалэн обшивать каризы. Со ваньзэ ас машинаеныз нуллӥз, ужаны мурт но ачиз утчаз. Мон огнам кылем беспомощной кышномурт, соин солэн юрттэтэз мыным туж кулэ. Туж шумпотӥсько, дорам туалетэ но, мисьтаськон машинае но, шуныт вуэ но вань шуыса. Нинатэк сыӵе каньыллыкъёс ӧй луысалзы. Ваньзэ сое лэсьтон понна трос дыр но кужым кулэ. Соин бадӟым тау карисько Ниналы но социальной дурбасьтонлы тыршемзы понна но арлыдоослы саклык висъямзы понна». (Гожтэт социальной дурбасьтонъя отделысь басьтыса ӟуч кылысен берыктэмын — ред.).

Нылкышно Ципьяын но Сырьяын улӥсь пересьёсты уте. Ужез кыӵе гинэ секыт ӧз ке но луы, Нинапай ваньзэ быдэстэ. Ужъёсыз нош, мазэ ватонэз, оген улӥсь пересьлэн ӧжыт ӧвӧл — юртаз но утялсконо, бакчазэ но утёно. Со сяна, пересьёсын вераськыны но дыр шедьтоно. Гожтэтысь но валаны луэ, кыӵе тыршыса аслэсьтыз ужзэ быдэстэ Нинапай но кыӵе сое арлыдоос ярато. 

Павел Пантелеймонович, Нинапайлэн кузпалыз, озьы ик «Наз» центрын ини трос аръёс ӵоже тырше. Солэн ужез Нинапайлэн кадь ӧвӧл ке но (Павел Пантелеймонович отын ик машина нуллӥсь луыса ужа), капчи шуыны уг луы. Со сяна, «Назын» ик слесарь луыса но ужа Пашагай. Социальной удысын тыршисьёслэн шутэтскон нуналъёссы но ӵемысь уг луо — мӧйыос котькуд минутэ звонить карыны быгато — улонын ма гинэ уг луы. Но Пашагай (ачиз но та удысын ик ужа бере) кышноезлэсь ужзэ умой тодэ но вала, соин ик семьяын даллашонъёс уг луыло.

Нина Тихоновна но Павел Пантелеймоновичлэн бадӟым нылзы Людмила но та удысын ик тырше. Егит нылкышно, Сала Кушкетэ картлы кошкыса, кузпалэныз Алексеен кык нылпи будэто. Людмила Вуж Кушкет гуртын социальной работник луыса ужа. Со но, анаез кадь ик, пересьёсты уте. «Тани 4-тӥ арзэ ини та удысын тыршисько. Ужме кельшытӥсько, пӧртэм учыръёс луо ке но. Яра али анае та ӧнерын ужаны ӵектӥз, тау солы, — шуэ Людмила.

Ваньзэ пересьёсты, кудъёссэ уте Людмила, мусо карыса «мынам песяйёсы» гинэ шуэ. Соослы котькудӥзлы гажанэн но яратон мылкыдын гинэ учке егит нылкышно.

— Пересьёсын ужан монэ тросэзлы дышетӥз но дышетэ, — вера Людмила, — улонысь пӧртэм секыт учыръёсысь капчиен потыны, матысьёстэ валаны, котьку юрттыны дась луыны, адямиосты кылзӥськыны. Мынам уже адямиослы юрттэ шуыса валасько но, та монэ туж шумпоттэ. Самой валтӥсез — мон котькуд ортчем нуналлэсь дунзэ валаны кутски.

Людмила но, анаез но атаез кадь ик, уженыз юн герӟаськемын. Али кема уг ке но ужа, ини аслэсьтыз подопечнойёссэ аслэсьтыз матысь адямиоссэ кадь яратэ. Соосын котьку огъя кыл шедьтэ, дораз ужаны но дырез вань. Районын ортчись пӧртэм ужрадъёсы но пыриськыса вутске — фестивальёсы, соревнованиосы...

Адямиез яратон, жалян, небыт сюлэмо луон, кылзӥськыны быгатон — та но трос мукет сямъёс луыны кулэ котькудӥз социальной ужасьлэн. Нош со понна асьсэос но соос пересьёслэсь яратэмзэс но нуналысь нуналэ кужмогес витемзэс шӧдо. Та ужасьёс понна самой бадӟым шумпотон но луэ, дыр.

 

 

 

 

Реклама
Нравится
Поделиться:
Реклама
Комментарии (0)
Осталось символов: