Хезмәт

Наталья Закирова аслаз ужез сярысь вера

Милям ужпуммы — со секыт югдуре шедем семьяослы сюлмысен юрттыны тыршон. Со понна подопечнойёсмес кылзӥськиськом но, ушъяськом но, куддыръя тышкаськиськом но... Мар карод — со милям ужмы. Но та ужме мон туж яратӥсько.

Наталья Закирова 1992-тӥ арын Тагашур гуртын семьяязы кыкетӥ нылпи луыса вордске — Наташалэн агаез вань на. Тагашурысь начальной классъёсты йылпумъяса, Ципья шоръёзо школаын дышетске. Визьмо нылашлэн школаын дышетскыкуз нырысь удмурт кылъя но литературая дышетӥсь луыны мылкыдыз ӝутскем, нош собере — социальной педагоглэсь ужзэ вылаз утемез потэм. Малпанэз Наташалэн быдэсмиз — со та ӧръя Казаньысь вылӥ дышетскон юртэ дышетскыны пыриз. 2010-2016-тӥ аръёсы дышетске (бакалавриат но магистратура), берпуметӥ аръёссэ дышетскыкуз Казаньын педагог-организатор луыса ужаны но кутске. Озьы ик квалификацизэ ӝутонъя курсъёсты ортче. 2016-тӥ арын ноябрь толэзе Балтасьын социальной дурбасьтонъя отделын ужан сюрессэ мытэ, али но отын ик тырше.
— Социальной дурбасьтонъя отдел — со бадӟым отдел, кытын кӧня ке отделениос, трос пӧртэм специалистъёс нуналысь нуналэ тыршо. Тон та бадӟым командаын кин луыса ужаськод?
— Ини кык но ӝыны ар ужасько, одӥг должностьын — мон социальной дурбасьтонъя отдел бордын ужась КЦСОН «Наз» центрын семьялы но нылпиослы социальной юрттэт сётонъя отделениын социальной педагог.
— Кыӵе ужъёс тон быдэстӥськод?
— Ми ужаськомы социальной ласянь кышкыт луись семьяосын. Соосын пӧртэм пумиськонъёс, занятиос ортчытъяськомы. Озьы ик мон КЦСОН «Наз» центр бордын «Волонтёр» добровольческой центрлэн кураторез но луисько. 9 май, 8 март выллем праздник ужрадъёсын герӟаськем акциос ортчытӥськомы. Кылсярысь, анайёслы яке мӧйыослы открыткаос лэсьтӥськомы. Пусъеме потэ, анайёс но, пересьёс но милесьтым таӵе пичи кузьымъёсмес басьтыны туж шумпото, малы ке шуоно со нылпиослэн ас киосынызы лэсьтэм кузьымъёссы.
- Соку тынад ужед ужан часъёсы уг йылпумъяськы, дыр? Сыӵе акциос ведь тросэз шутэтскон нуналъёсы ортчо.
— Зэм. Али акциос гинэ ӧвӧл. Милемлы вазь ӵукна но, ӝыт но, уйин но кыӵе ке юанэн, вазиськонэн, куронэн звонить карыны быгато. Ми соосын дыр шоры учкытэк вераськиськом.
— Та ужедлэн одӥг палыз гинэ ук. Мукет палыз но вань — начар югдурын луись, трос нылпиё семьяосысь пиналъёсын, инвалидъёсын ужакуд мылкыдыд уг куашка-а? Эмоционально секыт ӧвӧл-а?
— Ужаны кутскыкум секыт вал. Ваньзэ вылам басьтӥ, бордам кыски, адямиосты жаляй. Ужаса-ужаса валай: адямиез огшоры гинэ воштыны уг луы. Та ялан быдэстоно уж. Жалян мылкыд вань, конечно, но сое возьматытэк, адямилы юрттыны тыршоно. Соосын кыӵе ке ужен выроно, марлы ке но дышетоно.
— Марлы тон, кылсярысь, дышетӥськод?
— Вераны кулэ, семьяосын ужам сяна, милям отделениысь котькуд специалист мукет ужъёсты но быдэсъя. Котькудмылэн нимаз висъям кабинетмы вань. Мынам со — вуриськон кабинет. Соин ик мон нылпиосты вуриськыны дышетӥсько. Занятиосмы кык арнялы огпол ортчо, луо кызьы групповой занятиос, озьы ик индивидуальнойёсыз но.
— Туж тунсыко. Социальной педагогъёсты нимысьтыз вуриськыны но дышето вылэм, эске.
— Бен. †ем командировкаосы ветлоно тупа. 2017-тӥ арын Астрахане ветлӥ, квалификациез ӝутонъя курсъёсы. Али кемалась ӧвӧл гинэ но, май толэзе, Казаньын национальной пужыятсконлэсь аспӧртэмлыкъёссэ дышетскыса бертӥм. Милемыз дышетӥзы бигер калыклэсь пужыятсконлы. Адямиослы та кельше, тунсыко потэ. Ми шумпотӥськом, куке адямиос милемлы вазисько. Огшоры семьяосысь адямиос лыктӥзы ке но, юрттыны тыршиськом, нокинэ ум улляське. Эшшо но пальпотӥськом, адямиос ужмес дунъяны быгато ке, таукаронзэс верало ке. Та ми понна — самой бадӟым дунъет.
— Озьыен, тон куке но та ӧрез бырйид шуыса уд жаляськы?
— Уг жаляськы. Коллективе но туж умой. Ваньзэсын тупаса ужаськомы. Ужаны кутскыкум, соос мыным ваньзэ валэктӥзы, дышетӥзы. Ведь дышетскон юртын дышетскемед со одӥг, нош практикаын — ваньмыз мукет. Мыным адямиосын ужаны, соослы юрттыны туж кельше. Уг ватӥськы, секыт но луылэ. Ӝытъёсы рейдъёсы но потаськом, телефонъя ке но вераськыса кинлы ке кенешъёс сётоно луэ. Яра али анае-атае мыным ваньмыз ласянь юртто. Со понна соослы бадӟым тау. Ведь милям ужпуммы — со секыт югдуре шедем семьяослы сюлмысен юрттыны тыршон. Со понна подопечнойёсмес кылзӥськиськом но, ушъяськом но, куддыръя тышкаськиськом но... Мар карод — со милям ужмы. Но та ужме мон туж яратӥсько.

Реклама
Нравится
Поделиться:
Реклама
Комментарии (0)
Осталось символов: