Никифоровъёс 100 сюрс манет коньдон басьтӥзы

Куспазы но, гурт калыкен но эшлыко уло, асьсэ кужымзылы оскыса улыны тыршо. 2019-тӥ арын, куинетӥ пиналзы вордскем бере, та егит семья трос нылпиё семья но луиз. Соин валче Никифоровъёс законъя чаклам 100 сюрс манет уксё но басьтӥзы.

Яратон, ой, яратон

Эдуард но Лариса Никифоровъёс кемалась, пичи дырысенызы тодмо ини. Лариса Ярак-Чурма гуртысь, Эдуард — Гондыргуртысь. Артысь гуртъёс бере, егитъёс ог-огенызы ӵем пумиськыло, одӥг школаын дышетско но. Озьы ик яратонзы но кылдэ. Куать арес кусыпсэс соос уг но шӧдо (Эдуард 1985-тӥ арын вордскемын, Лариса — 1991-тӥ арын). Чебер но чылкыт яратонзы (ваньзэ пыр-поч уг гожтӥськы, таиз, кузпалъёслэн куремзыя, куспамы мед кылёз), аръёс ортчыса, юн кусыплы пӧрме но 2010-тӥ арын егитъёс гожтӥсько, чебер сюан ортчыто.

Нылпиоссы — Никифоровъёслэн осконзы но шумпотонзы

2010-тӥ арын ик кузпалъёслэн нырысетӥ нылпизы вордске — Арина нылзы. Жаляса верано, Арина инвалид шуыса лыдъяське —  со сакырвисёнэн (диабетэн) висе. Но бадӟым нылзы анай-атайзэ туж шумпоттэ: Ярак-Чурмаысь школа-нылпи садын дышетскемез сяна, Нурмаысь крезьгуръя школаын «фортепиано» классъя но визьнод басьтэ. Кыкетӥ пиналзы, Даниил, 2013-тӥ арын вордске. Со 1-тӥ классын дышетске. Тросэз огъёзоосыз кадь ик, Даниил пӧртэм техникаен вырыны но шудыны яратэ. Роботъёсты, машинкаосты сёт гинэ солы. Нош самой покчи нылпизы Никифоровъёслэн 2019-тӥ арын вордске. Со — Тимур пизы. Солы али кӧня ке толэзь гинэ.

«Вань каньыллыкъёс — нылпиос понна»

Тимур пизы вордскем бере, Лариса трос нылпиё анай луиз. Соин солы законэн чаклам 100 сюрс манет тыриськиз. Тодады вайытӥськом, Татарстан Республикаын гуртын улӥсь но 29 арессы тырмытозязы 3-тӥ нылпизэс ваем анайёслы огпол тыриськись коньдон сётӥське. Республикалэсь та юрттэтсэ егит кузпалъёс уже кутӥллям ини.

— Ми басьтэм уксёен коркамылы кыкетӥ этаж лэсьтӥмы. Вань каньыллыкъёс — нылпиос понна. Табере пиналъёсмылэн нимаз комнатаоссы вань — Ариналэн но, пиосмылэн но, — валэктэ Лариса. — 100 сюрс туала дыре туж трос коньдон ӧвӧл ке но, корка лэсьтонын со бадӟым юрттэт луиз.

Бадӟым семья — бадӟым шумпотон

Никифоровъёс семьяязы тямыс кузя уло. Соин кыкетӥ этаж соослы туж кулэ вал ни. Ачиз Лариса, декретэ потытозяз, Ярак-Чурмаысь школа-нылпи садын сиён пӧзьтӥсь луыса ужаз, кузпалыз «Алга» обществоын тырше (трос-а лэсьтӥськон ужъёслы уксёзы кылёз, куке куинь пичи нылпиоссы вань?) Но егит семьялы нылпиоссэс будэтыны, ваньмыз ласянь юрттыны котьку дась Эдуардлэн анаез, Зинаида Макаровна но атаез, Александр Владимирович. Соос ваньзы ӵош эшлыко уло (туспуктэмын). Озьы ик семьяын улэ Александр Владимировичлэн выныз но — Валентин Владимирович.

— Бадӟым семья — бадӟым шумпотон. Семьяеным, нылпиосыным тросгес дырме ортчытэме потэ. Соин но нылмылы 18 арес тырмытозь ужаны уг поты шуыса малпасько, нылпиосме учко, соосты дышето — ватса Лариса Никифорова.