Нимъёс но дауръёс

Вашкала дыръя, крашине пырымтэ вакытэ, удмуртъёс нылпиоссылы пудо-живот яке тылобурдо ним сётӥллям: Койык (лось), Пислег ( синица), Тутыгыш (павлин), Дыдык (голубь),  Ӝакы (сойка), Куажы (коростель), Сяла (рябчик), Душес (ястреб), Тур (тетерев), Юрмег (ласка). Таӵе пиосмурт нимъёс тужгес но трос луэм: Курбанай, Камай, Эсэкей, Тукташ, Кузебай, Туктар, Сезяй, Сяськан. Нылкышно нимъёс: Нылка, Ӵана, Италмас, Чачабей, Зангари, Намер, Узы. Тани та нимъёсты лыдӟыса валаны луэ, асьме палась гуртъёсын корка нимъёс луыса кылемын на. Улон воштӥськемъя, удмуртъёсты крашине пыртыса, нимъёс но ӟуче потӥллям. Озьы ке но аспӧртэмлыко соосты вераллям: Матрёна — Матран, Анастасия — Насьта, Егор — Лёгор, Владимир — Лади, Александра — Олексан, Александр — Сандыр, Иван — Диван, Михаил — Микаля, Григорий — Дьыргорей. Книгаосысь лыдӟеме вань, удмурт кылын «ф» куара воксё луымтэ шуыса, соин ик песянайёсмы тазьы верасько вал: Федосья — Переся, Трофим — Тропинь, Фёкла — Пекла, Тимофей — Тюмопей, Афанасий — Опнас, Фома — Пома, Филипп — Пильып, Аграфена — Гропи, Агафья — Огош, Огопья, «Кытын ужаськод? — пермаын (фермаын)», «Кызьы улӥськод? — ог пормы (ог формаен)».

Ӟуч христиан нимъёсты удмуртъёс но комиос вераськон дыръя ас сямен верало. Ударение усе берпуметӥ слоге, кылсярысь, Валя’, Петя’, Бигер кылын но ударение пумаз усе, кылсярысь, Зульфия’, Фарида’. Озьы ик ӟучъёс сямен мусояса вераны но быгатӥськомы: Нади (Наденька), Мики, Натӥ, Диви, Гири, Мани яке -ок, -ёк суффикс понӥллям, кылсярысь; Катёк, Васёк, Печок, Гирок.

Та дыре гуртысь кышномуртъёслы нимыныз вазё яке ним бере «апай» кыл поно. Кылсярысь: «Бускельын Дарья апай улэ». Нош ми будыку трос гинэ песянайёсмылэсь нимзэс но ум тодӥське вал, соосты «кенак» яке «песяй» шуиськом вал: Паши кенак, Гави песяй, Данька кенак, Артя песяй. Нош песянайёсмы ог-огзэс тазьы шуо вал: Диван кышно, Семон кышно, Артя кышно. Тазьы удмуртъёс гинэ уг вазьыло мукет калыкын но вань вылэм, кылсярысь, немецъёс но нылкышно бызем бере кузпалэзлэн нимыныз вазьыло: фрау Херман — жена Хермана, удмурт сямен вераса «Герман кышно» луэ ини.

Аръёс ортчо, улон воштӥське, соин ӵош выль нимъёс вуо, нош ортчемзэ берыктыны уг лу ни. Озьы ке но вужзэ тодытэк выльзэ но валаны уг луы. Милям гуртамы но шер пумиськись нимьёс вань вал, тросэз али но корка ним луыса кылемын: Азьман, Сезяй, Сяськан, Манчак, Эшман, Меркуш, Ларван, Лади но мукетъёс. Эшман агайлэн нимыз Вукогуртэ Бибатлаысь вуэмын. Нош Меркуш агай (Лобанов Меркурий Никитич) быдэс ёросамы одӥг гинэ вал. Милям гуртамы Перемечев фамилиен вить корка вал, нош Лобановъёс сизьым кузя. Таӵе фамилиос Вукогуртын гинэ луиллям.

Туннэ гожтэме потэ Кузнецова Лидия Ивановна сярысь, сое гурт калык Данька Людя апай шуэ. Вордскем со дано Лобановъёслэн семьяязы. Атаез солэн — Данька Диван — ас дыраз гуртамы нырысетӥ школа кылдытэм, колхозэн но кивалтэм. Нош Быдӟым Атыкай оже кошкыса бырем. Ньыль нылпизэ анаез огназ будэтэм. Вань шуг-секытъёсты ортчем ке но, огпол но ӝожтӥськемез ӧвӧл. «Атайме чик но уг тодӥськы, яра али гуртамы клуб вӧзын жугиськонын кулэм воргоронъёслы синпелет (памятник) вань, отчы атайме адӟыны ветлӥсько», — шуэ Людя апай.

Гуртын будыса, школаез быдтэм бераз Людя апай фермае скал кыскисе ужаны интыяське, гуртамы ик Петыр Васьлэй агайлы бызе. Соос ньыль нылпи будэто, дышето, юртъер лэсьто, шулдыръяськыны быгато, кузпалэз солэн усто мызганчи уго! Озьы, даур ортче, Людя апай фермаысен ик пенсие потэ. Али солэн сизьым нунокез но ньыль правнукез вань ини. «Кыӵе со шумпотон! — шуэ чин Вукогурт апай. Арлыдыз трос ке но, котьмаин тунсыкъяськыны тырше, тужгес но яратэ со «Азьлане» газетмес лыдӟыны, кутсконысен пумозяз, пе, лыдӟисько. Тӥни сыӵе со милям апаймы, нимыз но солэн аспӧртэмлыко, удмурт валлем верамын, гуртамы но одӥг гинэ Людя! Аръёс ортчо, удмурт нимъёсмы ышо, соин но пересьёсмы вань дыръя тодыса кыльыны кулэ шуыса малпасько.

Гажано Бадӟым апаймы, яратоно газетмы пыр юн тазалык тыныд сӥзиськомы.

Нина Лобанова,

Киров улос