Хезмәт

Нянь луиз ке, солы номыр но кулэ ӧвӧл…

Ципья гуртын улӥсь Екатерина Денисова улон-вылонэз сярысь мадиз

Дано ӟуч гожъяськись Лев Толстой гожтэм: «Вань кадь шудо семьяос ог-огзылы кельшиллям, котькуд шудтэм семья ас сяменыз шудтэм». Та кылъёсты нимаз адями сярысь но вераны луысал: «Вань кадь шудо адямиос ог-огзылы кельшиллям, котькуд шудтэм адями ас сяменыз шудтэм».

Та кылъёс сярысь котьку малпасько, куке арлыдо адямиос доры интервью басьтыны ветлӥсько. Малпано ке, соос, война азьын, война дыръя яке война бере вордскем нылпиос, огвыллемгес улонэз адӟиллям: секыт сютэм улон, тросаз учыре пичиысен анай-атайтэк кылён, вазь ик колхозын ужаны кутскон. Нош мукет ласянь, мӧйыосын вераськыны кутскид ке, валаськод: кызьы гинэ ӧз луы ке но, котькудӥзлэн соос пӧлысь аслаз вӧсь луонэз, аслаз курекъяськонэз (трагедия), аслаз историез вань — аслаз, нокинлэн нокыӵе историеныз ӵошатонтэм. Сыӵе секыт улонэз адӟем, тэльмырыса, курадӟыса будэм адямиос пӧлысь одӥгез — Ципья гуртын улӥсь Екатерина Егоровна Денисова.

Екатерина Егоровна Денисова (Чумакова) 8-тӥ ноябре 1932-тӥ арын Киров улосысь Рожки ёросысь Семёновка гуртын вордскем (али Марий Эл республикалэн Мари-Турек ёросаз пыре). Анай-атаез — огшоры гурт адямиос, гумыразы колхозын тыршиллям. Атаез, Егор, жугиськон кутскытозь ик кулэм, Елена анаез — жугиськон дыръя.  Семьяязы соос укмыс кузя нылпиос луо, но жугиськон дыръя соос пӧлысь улэп кылё кыкез гинэ — Екатерина но дас ареслы покчи сузэрез Анастасия. Секыт улон вите кык нылъёсты — Екатериналы туж вазь быдэ вуыса покчи сузэрзэ пыд йылаз султытоно луэ; Анастасиялы, куинь аресъем нылашлы, пичи дырысеныз анай-атайтэк курадӟыса будоно луэ. Екатерина Егоровна тодаз вайиз, кызьы соос потлэсь (лебеда) табань сииллям. Синвуаськыса вераз, кызьы со бусыысь сисьмем картофкаез люкаса ваем но сое трос пол миськыса, сииллям.

— Гуртамы Евдокия нимо нылкышно вань вал, со милям гуртамы картлы кошкыса улыны лыктӥз. Соослэн нылпиоссы ӧй вал. Аслаз нылпиосыз луымтэен меда, оло, милемыз жалямысьтыз меда, Евдокия апай Настяен кыкнаместы учкиз. Асьсэос но ёрмыса улӥзы бере, милемыз сюдыны ӧз быгаты ини, кызьы но маин быгатӥз — юрттӥз, — тодаз вае Екатерина Егоровна.

Дӥсяны дӥськутсы, сиыны сиёнзы, дышетскыны луонлыксы луымтэ. Няньлэсь шӧмзэ но тодымтэзы нылпиос, кыӵе отын дышетскон ини — книга-тетрадь басьтыны уксёзы кытысен луоз? Сыӵе секыт югдур дас кык аресъем Катяез колхозэ вуттэ, та луэ жугиськон дыръя. Колхозын пӧртэм ужъёсты быдэсъя со, аресэз шоры учкытэк, кыӵе уж сёто, сое ужа — уг ӝожтӥськы, ужзэ уг кельты. Вал кыткыны дышетскемез, нюлэскын ужамъёсыз, колхоз бакчаын ужаса ветлэмез — емышъёсты, бакча сиёнъёсты мерттэмез, соосты будэтэмез, ву кисьтаса утялтэмез — али но син азяз. Со ваньмыз толон гинэ вал кадь… Котькыӵе ужез пичи дырысен тодыса будэм со. «Мон уг быгатӥськы», «мынам уг пӧрмы», «мон жади» шуэмез но луымтэ — амалыз ӧй вал. Кин тодэ, кӧня аръёс ӵоже кыстӥськысал егит Катялэн но солэн сузэрезлэн сыӵе тэльмырыса улэмзы, огпол аслэсьтыз вуоно кузпалзэ, Григориез, ӧй ке пумитасал. 

— Гриша соку, нырысетӥзэ пумиськыку, агаеныз милям гуртамы ӵыжы-выжыоссы доры — самой милемыз утем Евдокия апай доры вуиз. Соос ми пала корка утчаны лыктӥллям вылэм. Соосты кыкназэсыз Евдокия апай ми доры келяз. Нош мынам соосты сюдыны няне но ӧй вал, сокем умойтэм, возьыт йӧтӥз… Но мон кызьы вань, озьы ик верай: няне но ӧвӧл, шуисько, тӥледыз чай сектаны. Мукет дыръя Гриша мон доры огназ лыктӥз ини — синмаськем вылэм мыным. Мыным но со туж кельшиз.., — возьдаськыса выллем вера Екатерина Егоровна. — Мон сьӧрын ветлӥсьёс ӧжыт ӧй вал, но мон соосты кулэ ӧй кары. Но Гриша — мукет вал. Мон ваньзы пӧлысь сое бырйи но, та быръёнэ сярысь огпол но ӧй жаля.

Кема дыр ортчытэк, Григорий Екатеринаез дораз вае — 1952-тӥ арын соос кузпалъясько но Ципьяын улыны кутско. Григорий Тихонович гумыраз колхозын ужам мурт. Жаляса верано, со ини кызь ар талэсь азьло кулэм.

— Кузпалэ туж йӧно пиосмурт вал, — синкылиоссэ ватыны быгатытэк маде Катя апай. — Огпол но со монэ кур ӧз кары. Куанер, сирота луэме сярысь но огпол но тодам ӧз уськыты. Монэ гинэ ӧвӧл, сузэрме но татчы вайиз, картлы кошкыку Настялы ог дас арес гинэ вал ук — кызьы сое огназ кельтысалмы? Милемын ӵош улӥз. Солы но, мыным но пал кыл верасез ӧз луы кузпалэлэн семьяяз. Ми сузэреным татчы лыктэммы бере гинэ нянь сиимы, дӥсяськимы…

Екатерина Егоровналэн пушкыз тыриз но со малпанъёсызлы сётскиз.

— Мон тамында аресам вуыса, весь малпасько: кызьы улӥськеммы меда ми соку. Йырам но уг тэры. Нуназе но, изьыны выдон азьын но, тушак вылын кылльыку но малпаськисько — со малпанъёслэсь нокытчы пегӟыны уг луы. Туала дыре котькыӵе каньыллыкъёс вань — корка шуныт, тыл вань, небыт но шуныт тушак вань. Нош азьло… Кыӵе потэ вал нянь сиеме! Али ке но нянез самой ческыт маке интыын адӟисько, нянь луиз ке, номыр но кулэ ӧвӧл. Кыӵе потэ вал дӥсяськеме… Огпол куное мыныкум дӥськутэ луымтэысь, муртлэсь дэремзэ дӥсяса мынӥ… Йырам керттыны кышетэ но ӧй вал, уйин шобырскыны одеялэ но ӧй вал… Кызьы сыӵеосты вунэтод?.. Картлы кошкеме бере гинэ шудо улон адӟи, соос но куанер улӥзы ке но. Кузпалэн мыным туж удалтӥз.

Ципьяе улыны выжемез бере но Екатерина Егоровна татысь колхозэ ужаны интыяське. Нырысь валъёсты сюдэ, собере — парсьёсты. Нош ини пенсие ошакъёсты сюдэмез бере, 1982-тӥ арын, 50 аресэз тырмем бере потэ. Арлыдо кышномуртлэн «Ударник коммунистического труда» званиез (1978), «Ветеран труда» медалез (1982), «Быдӟым Отечественной ожлэн ветеранэз» удостоверениез (2010), «Мать-героиня» медалез вань.

Денисовъёслэн куать нылпиоссы вордско — Галина (1953), Татьяна (1955), Любовь (1957), Зоя (1960), Надежда (1963), Валерий (1966). Туннэ нуналэ соос ваньзы ас семьяосынызы уло — кин Татарстанын, кин Марий Элын, кин Удмуртиын. Анайзы сярысь уг вунэто — шер ке но куное бертыло, жингыртылыса уло. Туннэ нуналэ Екатерина Егоровналэн 12 внукез но 25 правнукез вань ини.

— Тӥни сыӵе узыр адями мон, — пальпотыса вера песянай. – Кин гинэ сомында внукъёсыныз но правнукъёсыныз ушъяськыны быгатэ? Тэльмырыса будэме, курадӟыса пинал дырме ортчытэме понна, улон мыным сыӵе узыр анайлэсь но песяйлэсь шудзэ кузьмаз, дыр.

Екатерина Егоровна туннэ но пыд йылаз. Трос ыштонъёсты адӟем, кайгу-куректонъёсты чидам арлыдо нылкышно яратоно кузпалэз, Григорий, кулэм бере но кӧтӝожлы уг сётскы. Тодэ: со нылпиосызлы, внукъёсызлы, правнукъёсызлы туж кулэ али. Дышетскыны шуд усьымтэ ке но, Катя апай букваосты тодэ, лыдӟиськыны но быгатэ — та аслаз тыршемезлэн бервылыз. Тазалыкез гинэ лябӟемын. Но песянай бодыен ке но, ветлэ. Юнме гинэ уг верало, вылды, ож дырозь, ож дыръя вордскем нылпиос, сютэм улӥллям ке но, пичи дырысен ужаса будэменызы тазалыксэс но, сямзэс но юнгес кариллям шуыса. Трос секыт толэзьёсты, аръёсты Катя апай данэн чида, возьытэ уг усьы. Со дыре улэм нылкышноосты огазеяса возьматэ Катя апай шуи ке, уг янгыша, дыр.

Шумпотымон, Катя апайлэн Настя сузэрыз но улэп али. Катя апай быгатэм ик сое пыд йылаз султытыны, Ципьяысь школаын тодон-валан но басьтыны быгатэм со. Туннэ нуналэ Анастасия Егоровна Удмуртиын улэ, апаез сярысь со но уг вунэты. Нош Екатерина Егоровна Зоя нылыныз Ципья гуртын улонзэ азинтэ. Туала улонлы шумпотыса, со дыре ик азьвыл луэм шуг-секытъёссэ тодаз вайыса, ӵем гинэ нянь сиыса пукыны яратэ со. Нянез самой ческыт маке интыын адӟе Екатерина Егоровна. Нянь луиз ке, солы номыр но кулэ ӧвӧл…

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: