«Огъя луыса ужаку гинэ умой бервылъёсы вутскыны луэ»

Бусые лыктыкумы, «Борнак» возёсысь музъем ужасьёс йыды кутсало вал (325 гектарын киземын). Кысык ужан дырыз шоры учкытэк, возёсысь валтӥсь агроном Раниль Ахмадуллин милемын вераськыны дырзэ шедьтӥз, возёслэн ужъёсыныз тодматӥз.

— Октон-калтон ужъёс борды ми 6-тӥ гудырикошконэ кутскимы. Туннэ нуналэ ини огъя урожайлэн 76 процентэз люкамын (лыдпусъёс 24-тӥ гудырикошконлы сётэмын — Н. Ж.). Озимой чабей (одӥг гектарысь шорлыдын 49, 5 центнер луиз), озимой ӟег (39,5 центнер), кӧжы (34,4 центнер) быдэсак октэмын, туннэ тани йыдыез кутсаса быдтӥськомы, сезьылэн 15 процентэз октытэк кылиз но валэс чабей октонмы вань на, — шуиз валтӥсь агроном.

Солэн верамезъя, возёс туэ рекордной урожай люканы быгатоз. Та, валамон ини, ваньзэсты шумпоттэ: кивалтӥсез но, агрономез но, музъем ужасьёсты но.

— Огъя кыл шедьтыса, ог-огмылы юрттыса ужаны тыршиськомы.  Асьтэос адӟиськоды, обществоын опытэн механизаторъёсын ӵош егит механизаторъёс ужало, — шуэ комбайнэн тыршись механизаторъёс шоры возьматыса Раниль Наилевич. — Татын ужасьёс ласянь шуг-секытъёс кылдо шуыны уг луы. Ваньзы ужзэс кулэезъя быдэсто, туж тыршо.

Ма, азинлыко ужан понна татын ужась комбайнёръёслы вань луонлыкъёс, каньыллыкъёс кылдытэмын — соосты нуналаз кык пол Бурнакысен лыктыса сюдо. Комбайнъёссы но вылесь — ужа но ужа гинэ. Йыдыез кутсанын куинь комбайнъёс ужало вылэм — одӥг ACROS 550 но кык NOVA 340 комбайнъёс.

Самой выленыз, кылем арын гинэ басьтэм ACROS 550-эн, егит комбайнёр Рифнур Хабибуллин ужа (юрттӥсез Ленар Муллагалиев). Рифнур — Казаньысь аграрной университетысь студент, «Борнакын» практиказэ ортче. Егит луэмез шоры учкытэк, комбайнэн ужан опытэз солэн вань ини — ньылетӥ сезонзэ октон-калтон ужъёсы пыриське егит воргорон.