Олег Ураков — «Татарстан Республикаысь гурт возёсысь сӥё-дано механизатор»

1-тӥ оштолэзе Казаньысь Кремльын республикаысьтымы пӧртэм удысъёсысь самой усто ужасьёсты данъязы. Татарстан Республикаысь Кун Кенешлэн спикерез Фарид Мухаметшин 50-лэсь тросгес воргоронъёслы но нылкышноослы кун наградаосты сётӥз.

Соос пӧлын «Атаймузъем азьын лэсьтэм ӟеч ужъёс понна», «Татарстан Республика азьын лэсьтэм ӟеч ужъёс понна» медальёс вал. Шумпотымон, сыӵе данъям адямиос пӧлын асьме ёросысь воргорон но вань — Ципья гуртысь Ураков Олег Дмитриевич. «Труд» обществоын ужась бадӟым стажен, бадӟым опытэн механизаторез «Татарстан Республикаысь гурт возёсысь сӥё-дано механизатор» дано нимен пусйизы. Та медалез Олег Дмитриевич кема аръёс ӵоже мыло-кыдо, азинлыко но ужезлы сюлмыныз сётскыса тыршеменыз заслужить кариз.

— Вить аресысен техникалэсь, тракторлэсь мар луэмзэ тодыса будӥ мон, — вера Олег Дмитриевич ачиз сярысь. — Атае но тракторист вал бере (Ураковъёс Тагашур гуртысь луо — ред.), мон со сьӧрысь ӧй кыльы, пичи дырысеным бусыын ужаса, шонергес верано ке, атайлы ужаны люкетыса ветлӥ. Атай но номыр ӧз вера, ветлытӥз ведь монэ сьӧраз. Соин тӥни школаез йылпумъяме бере, кытчы ужаны мыноно шуэм юанэ но ӧз кылды мынам: колхозэ ужаны интыясько шуыса тодӥ. 

Колхозын Олег Дмитриевич нырысь нюлэс кораса ветлэ (та ужын 10-тӥ классэз йылпумъямез бере тыршыны кутске). 1985-1987-тӥ аръёсы Германиын артиллерийской войскоосын служить каре, нош армиысь бертэмез бере, одӥг арня ӵоже шутэтскыса, выльысь «Труд» колхозын ужзэ азинтэ – гусеничной «ДТ-75» тракторен ужаны кутске.  

— Куать ар ӵоже ужай но, сельхозхимие ужаны интыяськи. Но отын но уже техникаен герӟаськемын вал — «К-700» тракторен ужай. Со дырысен тӥни, 1993-тӥ арысен, со тракторен ужасько мон. Куамын ар луэ вылэм ини… 2002-тӥ арысен выльысь колхозын ужаны кутскеме бере но сыӵе тракторен ужме азинтӥ. 2015-тӥ арысен мукет техника но оскизы — Foton погрузчикез, — маде Олег Дмитриевич.

Техникаез вуж шуыса но уг ӝожтӥськы механизатор, аслэсьтыз «мӧйы» «К-700»-сэ яратэ, солэсь котькуд яразэ тодэ, кулэ луиз ке, ачиз ик тупатыны но быгатэ. Кивалтэтэзлэн тыршись ужасьсылы «К-742» тракторез сётыны малпанзы луэм, нош Олег Дмитриевич отчы пуксьымтэ — асламез, пе, умойгес. 

— Выляз пуксьыса ужан понна тазалыке но лябӟемын ини, — валэктэ механизатор. – Мыным таиныз но ужаны умой, дышемын ини. Толалтэ погрузчикеным ужасько, кыед тырисько. Тулыс ини, валамон, бусыын тыршисько. Гужем сенаж лёгасько, мукет ужъёсын но вырисько. Огъя вераса, мар ужаны косӥзы, сое быдэстӥсько. Арлэн котькуд дыраз уж тырме.

Котькыӵе косэм уж борды басьтӥськыны дась луись, азьмынӥсьёслэн радаз луись механизаторез ужаз туж гажало. Трос вераськисьтэм, ужлэсь кышкасьтэм, верам кылзэ котьку быдэстӥсь воргоронэз кызьы уд гажа? Ушъяськисьёс пӧлысь ӧвӧл бере, трос кузя луэм грамотаосыз сярысь но ӧз вера. 1989-тӥ арысен кутскыса Азьмынӥсьёслэн слётазы но ветлэ Олег Дмитриевич, туннэ со кӧня пол отчы пыриськемзэ тодаз но уз вайы ини…

Кылкутӥсь ужась сяна, Олег Дмитриевич оскымон кузпал но, адӟем карымон атай но луэ. Кышноеныз Галя апаен соос кема аръёс ӵоже тупаса уло, кык пиоссэс (Александрез но Владиславез) пыд йылазы султытӥзы.  

— Ужын но, семьяын но ваньмыз умой луиз ке, тазалыкед ке луиз, астэ шудо адямиен лыдъяны кулэ. Мон асме шудо шуисько. Яратоно адямиосы вӧзам, аслэсьтым ужме но мон яратӥсько. Ӧй ке яратысал, сомында ар ӵоже ужаны ӧй но быгатысал, дыр. Мынам, зэмзэ верано ке, вань сюлэме «К-700» бордын… Шумпотӥсько, ужамме адӟо но дунъяны быгато шуыса. Озьы бере, юнме гинэ сомында ар ӵоже тыршыса уг ужаськы.., — вера Олег Дмитриевич. Бадӟым данъетэныз — «Татарстан Республикаысь гурт возёсысь сӥё-дано механизатор» дано нимен пусйиськеменыз — аспалмес сюлмысен ӟечкыласькомы. Олег Дмитриевич, тӥ зэмзэ но  юнме сомында ар ӵоже тыршыса уд ужаське.