Хезмәт

Ортчем аръёсы берытскыса...(фото)

Туэ Ципьяысь «Калыкъёслэн эшъяськонзы» музей кылдэмез дырысен 55 ар тырмонзэ пусъе.

55 аръем гумырыз ӵоже со трос воштӥськонъёс пыр потӥз, выльдӥськиз, азинскиз. Шумпотымон, музейлэсь историзэ, солэсь Ципья школаын шаертодонъя музей кылдэм дырысен туннэ нуналозь ортчем сюрессэ югдытонын ёрос газетмылэн но интыез бадӟым. Музей  Сярысь, солэн кивалтӥсез сярысь статьяос «Азьлане» газетлэн бамъёсаз ӵем потало. Ӵектӥськом тӥледлы, ортчем аръёсы берытскыса, «Азьлане» газетын 1982-тӥ арын потэм статьяен выльысен тодматскыны.

Ортчем аръёсы берытскыса...

Нокин ӧз вуны, номыр уз вуны

Ципьяысь средней школалэн краеведческой музейысьтыз вераса быдтонтэм малпанъёсын потӥ. Школалэн коллективеныз кызь ар ӵоже люкам историлы сӥзем экспонатъёсты огполскын гинэ учкыса быдтыны луымон ӧвӧл. Али тани Быдӟым Отечественной война аръёсын герӟаськем материалъёслэн одӥг пичигес люкетэныз вылтӥз-вылтӥз гинэ тодматскон понна но ӝыны нунал кулэ луиз.

Музейын самой бадӟым инты басьтэмез, тунсыкъяськытӥсез но, дыректытӥсез но — ӵапак тӥни со жугиськон аръёслы сӥзем отдел. Жугиськон — туж ик кыдёке кылем история ӧвӧл со. Троссэ ас синъёсынымы адӟимы, со дырлы сӥзем материалъёслэн тырмыт но конкретно луэмзы тӥни соин но валэктӥське. Со шимес дырлэн летописэзлэсь данак страницаоссэ жугиськонын луэмъёс асьсэос ик гожтӥзы. Вераськон та районысь геройёс сярысь мынӥз ке но, озьы но троссэ школаын дышетскись пиналъёс но дышетӥсьёс асьсэос шараязы. Малы ке шуоно, вордӥськем палъёсамы таза-сӧл берытскемъёслэсь но уногесэз ож бусые кылизы, тросэзлэн кытчы луэмзы берло дырозь но тодмо ӧй вал — одӥгъёсыз ивортэм быремын, мукетъёсыз ожын возьматэм батырлыкъёссы сярысь тодэ ваёнъёсты асьсэос сьӧры нуиллям. Мукетъёс адӟыса-тодыса веразы ке гинэ ини...

Пичиысен гинэ кутскиллям вал кадь. Музейын котькуд герой-городлы сӥзьыса, нимаз-нимаз стенд луытӥзы. Тӥни со городъёсысь музейёсын, школаосын кусып тупатӥзы, соос пыр данак ветеранъёсты шедьтӥзы. Со яке та городэз утёнэ но мозмытонэ пыриськем землякъёсмес утчазы. Сыӵеослэсь нимъёссэс пырак азелы вунонтэм карон понна котькуд стендлэн улӥ люкетаз фамилиоссы понна нимысьтыз инты кельтӥзы. Озьы ке но, отчы геройёслэн одӥг дасмос люкетэз но ӧз пыры. Шуом, Ципья зонае пырем 38 гуртысь Сталинград дорын ожмаськонъёсы гинэ но куинь сюлэсь уногес мурт пыриськем луыса потӥз. Со ик участокысь 1941-1942 аръёсы Москва дорын жугиськонэ 178 мурт пыриськем но соослэн 112-ез Родинамылэн эрикез понна ожын бырыны шедем шуэм даннойёс вань.

Музеез кылдытӥсьёслы берлогес одӥг выль идея вуиз — стендъёсы гинэ пырыса быдмымтэ геройёс понна нимысьтыз книгаос луытӥзы. Отчы ини фронтовикъёслэсь нимъёссэс-фамилиоссэс гожтэм сяна, луэмезъя соослэн тырмытгес биографиоссы, фотоснимокъёссы, соос сярысь фронтовой газетъёсы гожтэм материалъёс люкамын. Котькудӥз сыӵе книга кема аръёс ӵоже утчаськемлэн бервылыз, творческой уж. Кызьы шуо, нокин ӧз вуны, номыр уз вуны кадь. Та участокын дышетскисьёслэн но дышетӥсьёслэн пырымтэ одӥг гинэ корказы но ӧз кыльы, жугиськонын луэм котькинэ пыр-поч утчазы, котькуд личностез шараязы. Музей со история, нош история конкретностез яратэ. Землякъёсмылэн батырлыкъёссы сярысь тодэ ваёнъёсты но кыӵе ке пумиськем муртъёслэн ымысьтызы басьтыса гинэ гожтымтэзы. Тросэз со яке та документэн юнматэмын. 1941 арын 22 июне немецкой захватчикъёслэн нырысетӥ шуккетъёссылы пумит сылэм Брестской крепостьлэн геройёсыз пӧлын Ст. Кушкетысь Алёшкинэн Кургем гуртысь егит пи Андреев но луиллям. Соос сярысь жугиськон дугдытозь номыре тодмо ӧй вал. Тазьы ог нуналэ Ципья школаысь следопытъёс кие 1941 арын потэм фронтовой газетъёслэн одӥгез вуэ. Тӥни со газетын гожтэмын луэ Брестской крепостез утьыса, геройёс сямен бырем землякъёсмы сярысь.

Школалэн музеяз вань кадь герой-городъёсысь нимысьтыз басьтэм священной сюйёс возисько. Соос шоры но кыӵе ке одӥг символической маке шоры сямен огшоры гинэ учкыса ортчыны уг луы. Музее интыям со сюйёс ӵапак тӥни соку самой кужмо ожъёс мынэм интыосысь басьтэмын. Мамаев Курганысь, Брестысь, Москва дорысь ваем сюйёс, жугиськон дыръя тылын ӵыжам-ӝуам кирпич но из юдэсъёсын, патронлэн сыномем гильзаосыныз суро. Ленинградлэн тямысэтӥ ГЭС-езлэн районысьтыз яке Московской областьлэн тодмотэм лётчик бырем Можайск городэз дорысь басьтэм сюйын асьмелэн землякъёсмылэн вирзы ӧвӧл, дыр, шуыса кин вераны быгатоз?

Музеез кылдытӥсьёс куке но асьмелэн землякъёсмылэн- фронтовикъёслэн киосынызы фронтысен гожтэм гожтэтъёсты но данак люкаллям. Ож огдырлы чусомыса улэм вакчи гинэ дыр куспын туж дыртыса, кезьыт окопын яке госпитальын гожтэм, табере ини ӵужектыса гожтэмъёссэ но тодманы луонтэм югдуре вуыны кутскем гожтэтъёсыз но сюлэмшугъяськытэк гинэ лыдӟыны уг луы. Со гожтэтъёсын — ӝугиськонэн сэрен луэм трагедия, со гожтэтъёсын — землякъёсмылэн Родинамес пумтэм яратэмзы но солы сётӥськемзы, дырын-дырын мылкыдзылэн ӝутӥськемез шӧдӥське, жугиськонлэн кутсконаз ик адямиослэн вормонлы осконзы.

Жугиськон — ма шуид ке но жугиськон ини со, кыӵе ке шулдыр представление ӧвӧл. Данак гожтэтъёсысь оптимизм шӧдӥськыса улӥз ке но, жугиськонлэн трагедиез уногес. Тӥни соиз сюлэмез вӧсь каре.

Тани Ципья гуртысь егит пилэн Николай Наздековлэн  1944 арын июль толэзьлэн пумаз гожтэм вакчи гинэ гожтэтэз:

«Анай, гожтэтдэ но карточкадэ басьтӥ. Начармемед кадь. Мултэс эн сюлмаськы. Дырыз сыӵе, чиданы тыршы. Вождэ эн вай, та гожтэтме пуля пась карем бумагае гожтӥсько. Котомкае окоп дуре кылем вал, немецкой пуля шедем. Жугиськон дугдытозь но тонэн пумиськытозь уно уг кыльы кадь ини. Ялан азьлан мынӥськомы...»

Ӵапак куинь нуналскын Николайлэн кулэмез сярысь ивор басьтэмын.

Шакир Гимадиевлэн 1945 арын январе туганэзлы Сагитлы гожтэм берпуметӥ гожтэтэз таӵе кылъёсын йылпумъяське:

«Ђоген Гитлерлы — капут! Кема ик дыр уз ортчы, мон но вормыса доре берто. Мынам доре бертон сюресэ Берлин пыр луоз. Возьмалэ!»

Шакирлы но вордӥськем юртаз бертыны кылдымтэ. 2 май нуналэ бырыны шеде.

Ст. Кушкет гуртысь егит пилэн Григорийлэн 1942 арлэн пумаз немецкой войскоосты окружение басьтэмзы бере ӵыжы-выжыосызлы гожтэм гожтэтэз шумпотонэн тырмемын. Егит пи жугиськонлэн тӥни сыӵе секыт вакытаз но аслэсьтыз матысь эшъёссэ вормонлэн одно ик асьме палан луонэзлы оскытыны турттэ. Нош аслыз Вормон нуналэз адӟыны кылдымтэ вылэм. Следопытъёс солдатлэн гожтэтэзлэн улӥяз валэктон гожтыса понӥллям: «Та гожтэтэз вуэм бере, сизьым нунал ортчыса, солэн кулэмез сярысь ивор басьтэмын».

Сыӵе быремъёсты лыдъяса быдтот шат?! Тӥни пичигес гинэ одӥг Ст. Ципья гуртысь но фронтэ 114 мурт потыса кошкем. 93-ез ож бусые кылем. Оло мукет гуртъёсысь быремъёс ӧжыт-а?!

Жугиськон со — лыдъяса быдтонтэм быдэсмыны вуымтэ малпанъёс, ортчытыны вуымтэ сюанъёс, дунне вылэ вордскытэк кылем пичиос. Вордӥськем юртазы берытскыса бертымтэ кузпалъёс, атайёс, агайёс, апайёс. (Бен, жугиськонэ ветлэм нылкышноос но ӧжыт ӧвӧл).

Музейын Галима песяйлэн ас киосыныз гожтыса кельтэм кылбуръёсыз возисько. Пересь югыт дунне вылысь ачиз 80 аресэн кошкем. Кылбуръёсысьтыз адскемъя, огназ кылем кышномурт аслэсьтыз кузпалзэ жугиськон дугдэм бере но ньыльдон ар ӵоже витем, улонэзлэн берпуметӥ минутэз дырозь оскемысь дугдымтэ. Ѓардон азьын ӧсъёсаз йыгаськыса, бертыса пыроз кадь потыса витем.

Быдӟым Отечественной войнаын вормыны ваньмызлэсь но уката ик фронтын но фронт мышкын огкылысь луон юрттӥз шуиськомы. Бен, со вадес фронт мышкысьёс но одӥг гинэ мылкыдын — вормон мылкыдын улӥзы. Ваньмыз фронт понна! — соослэн талэсь но бадӟымгес, даногес ужпумзы ӧз луы. Кинлэн ке но асьмелэн кыкетӥ фронтэз союзникъёслэсь азьло фронт мышкысь нылкышноос усьтӥзы шуэм визьмоесь кылъёсыз вань. Бен, фронт мышкысьёс но жугиськонлэсь самой секытсэ асьсэ вылэ басьтӥзы. Гуртысь калык аслаз ымысьтыз таласа сямен фронтлы сиён-юонзэ сётӥз, ӧз жаля дӥськутсэ но. Соос сярысь Ципьяысь музейлэн экспонатъёсыз но туж трос верало. 1943 арын, кылсярысь, Ципья районысь комсомолецъёс, пионеръёс гинэ но военной машинаос лэсьтыны сю сюрс манет уксё люкаса ыстӥллям. Тӥни со понна ВЛКСМ-лэн районной комитетэзлэн адресаз И. В. Сталинлэн тау карон гожтэтэз басьтэмын. Озьы ик Бакча гуртысь Аскаров шуэм муртлэн фронтлы нимаса 50 сюрс манет уксё сётэмез сярысь но даннойёс вань.

Быдӟым Отечественной война — странамылэн историяз ачиз одӥг характерной, адямиослэн мылкыдазы мур пытьызэ кельтэм вакыт. Тӥни со дырысь тодэ ваёнъёсты пырак азелы вунонтэм карон понна Ципьяысь средней школалэн коллективез вераса быдтонтэм но дано уж быдэстэм. Зэм, туннэ музейлэн ӟоскыт луэмез юн люкетэ отчы люкам материалъёсты котькинлы адӟымон карыса интыяны. Музей выль здание выжиз ке, соосын эшшо но матысен тодматскыны быгатомы шуыса малпаськомы.

А. Фазулзянов

(Нялтас вераса, текст тупатъянъёс пыртытэк сётэмын)

Реклама

Иң мөһим һәм кызыклы язмаларны Татмедиа Telegram-каналында укыгыз


Теги: музей
Нравится
Поделиться:
Реклама
Комментарии (0)
Осталось символов: