Ортчемез пыр туала улонэ

Афганец-интернационалистъёс нырысь ик, афганецъёслэн обелисказы венок поныса, изо гурезьёс пӧлын бырем, озьы ик вордскем палазы бертэмзы бере кулэм эшъёссэс одӥг минут шып сылыса буре ваизы. Куинь пол омыре ыбем пыӵал куара кыдёке чузъяськиз, секыт жугиськон сюресъёс минут куспын син азьтӥ ортчизы. Афганецъёс Арбор гуртысь Талгат Гильвановлэн вордскем юртаз луизы, анаезлэсь кальзэ тодӥзы. Район центрысь «Батыръёслэн аллеяязы» венокъёс понэм бере, афганецъёс семьяосынызы культура центре люкаськизы. Районысь афганецъёсты сӥлы карыса дасям концертын 9 ар 1 толэзь но 9 нунал мынэм жугиськонлэсь кылем яраос выльысь «улӟизы», ньылонэ комок пуксиз, синъёс синкылиен тырмизы. Патриот пиос будэтыса, вань шуг-секытъёсты дэмен вормем, ыштонъёсты пиньзэс куртчыса чидам анайёслы, оген кылем кышноослы сяськаос кузьмазы, йыбырттӥзы. Шаермы азьын ужпумзэс данлыко быдэстыса, туннэ нуналэ ӟеч ужъёсынызы адӟем карымон луэмъёсты, организаторской ужъёсы активно пыриськемъёсты дипломъёсын но Таукарон гожтэтъёсын пусйизы. 50 но 60 аресъем юбилейёссэс пусйись афганецъёслы ӟеч мылкыд каронъёс веразы. Сюлме пыӵась кырӟанъёс, ӟырдыт эктонъёс - та ваньмыз соосты гажаса быдэстэмын вал.

Республика масштабен ортчем «Батырлык возьматон инты - Афганистан» конкурслэн район этапаз вормисьёс но, праздниклэн куноосыз луыса, сцена вылэ потӥзы. Арбор шор ёзо школаын дышетскись Зухра Гайфуллиналэн «Батырлык кызьы дунъяське?» шуэм ужез республика масштабын но вылӥ дунъет басьтӥз. Зухра Талгат Гильванов гуртоезлэн но солэн яратоно анаезлэн Гульзихан песяйлэн образъёссы пыр батырлыклы дунъет сётон понна ответ утча. Зухра аслэсьтыз гожтэмзэ учкисьёслы но лыдӟиз. Та минутъёсы мылкыд бугырскиз, мугортӥ кыӵе ке но кезьыт тулкым ортчиз.