Ожгарчиосмы понна сюлэммес сётӥськом! (2-тӥ люкет)

Ожмаськон ӧз на быры, отӥяз но юрттоно

Асьме удмурт калык аслаз востэм сямыныз куддыр лэсьтэм ужъёссэ ватыса но кельтэ. Дыр ортчыса гинэ адямиос пыр ивор вуэ. Вашкалаысен возьдаськон сям удмуртъёслэн виразы пыӵамын кадь ини. Каллен та аспӧртэмлыко сям егитъёс пӧлын сӥзьыл куаръёс сямен тӧлӟе, со интые дӥсьтон но калык лулчеберетэз ӝутон мылкыд пуксе. 

Но гуртысь калыклы та мылкыдъёс кыдёкын на. Соос пӧлын али но «мар поттонэз», «малы кулэ ини со», «огшоры лэсьтӥмы ук», «асьмелы гинэ шуыса кутским вал» шуо.

Но туннэ улонлэн куронъёсыз сыӵе: одӥгез адӟе, мукетызлы вера, озьыен, быдэс дунне со уж борды басьтӥське. Одӥг гуртлэсь адӟыса мукетыз кутске, собере быдэс ёрос но итӥське. 

Татын Вуж Кушкет гурт калык сярысь вераме потэ. Толалтэ-тулыс вакытэ гуртысь клубын туж бадӟым уж нуиськиз: «кӧс душ», блиндажной сюсьтылъёс, ӝуатонъёс лэсьтӥзы. Со понна гуртоос асьсэос ик коньдон люказы, басьтӥськизы, ӝытъёсы клубе потазы. Сюсьтылъёслы корт банкаос, ӝуатонъёслы бутылкаос гуртысь калык ик люказ. Адями ӧжыт уг люкаськы вал, татчы эктонъя кружоке ветлӥсь нылпиослэн анай-атайёссы но пыриськизы, ваньзы мыло-кыдо ужазы, огкылысь ожгарчиосмы понна тыршизы. Нош кызьы та ваньмыз кутскиз?

Алёна Данилова – эмтодос удысысь егит ӧнерчи. Асьме ёросын со одӥг гинэ рентгенолог, али декретной отпускын (озьы ке но, нимысьтыз нуналъёсы ёрос больницае лыктыса, аслэсьтыз ужзэ быдэстэ). Ваньмыз ӵапак со бордысен ик кутскиз. Алёна Валерьевналэн кузпалэз но 2022 арысен мобилизаци улсын нимысьтыз ожгар операцие басьтэмын. Солы юрттыны шуыса нырысь та уж сярысь тунсыкъяськыны кутскем.

– Мон Алёшалэсь юай, ма самой кулэ луисез но мае ас киын лэсьтыны луэ шуыса. Со вераз: сюсьтылъёс, ӝуатонъёс кулэ. Азьвыл ик дорам огнам лэсьтыны кутски, собере мон борды Алина (Филипова – Ю.Щ.) итӥськиз, ӧжыт улыса Вероника (Никитина – Ю.Щ.) но мылкыд кариз. Дыр ортчыса, врач эшлэсь ик «кӧс душ» сярысь но кылӥ, со валэктӥз кызьы сое лэсьтоно. Гуртысь староста – Александр Уськеев – тунсыкъяськыны кутскиз, мар со сыӵе «кӧс душ», кызьы сое лэсьтоно. Со ик ӵектӥз гуртысь WhatsApp группае та сярысь ивортыны. Собере ини ваньмыз огыр-бугыр кутскиз. Соку ик гуртысь калык мылкыд кариз огазе люкаськыса, кӧня ке юрттэт сётыны. Мылкыд карисьёс трос вал, ваньмы огазе дышетскыса, трос гинэ лэсьтӥм. Номыр шугез ӧвӧл, вань материалъёс вузасько, ӝытъёсы но лэсьтыны луэ, нылпиосты но кӧня ке выртыны луонлык кылдытэ. Котькуд адямилы валаны кулэ: ожмаськон ӧз на быры, эшшо но тросгес юрттыны кулэ.

Жаляса верано, туннэ нуналэ ужъёс кӧня ке дугдэмын. Но, оскисько, кезьытъёс вуэмен, дорысь ужъёс кӧня ке кулэсмемен, гурт калыклэн гуманитарной юрттэт дасян ужез азьланьтӥськоз шуыса.