Ожысь гожтэтъёс

Гожтэтъёс, валамон, сомында ар ортчыса, ӵужектӥллям, куд-ог букваоссэ учкыса-учкыса но валаны уг луы ни. Но ми, редакциын ужасьёс, тунсыкъяськыса, синмаськыса лыдӟыны тыршимы гожтэтысь чуръёсты. Гожтэтъёсты вайись нылкышно луиз Балтасьын улӥсь Хайруллина (Петрова) Татьяна Трифоновна. Нош гожтэтъёсыз солэн троюродной агаезлэн ожысь лэзем гожтэтъёсыз вылэм. Одӥгзэ гожтэтэз тӥледлы но ӵектӥськом.

«ӟеч нунал!!!

Гожтӥсько гожтэт эшёс тиледлы туж адӟем потыса, ваньдылы но уно салам верасько.

Апаослы, кенакъёслы, бадзым агаослы и мукет бускеллёслы но уно салам верасько.

Эшёс мон туннэ нуналын улӥсько таза сӧл. Кык, куньметӥ нунал луиз ини жугиськонӥсь потӥм али. Пока улӥськом одиг гуртын. Азьла палаз мар луоз, тодмо ӧвол. Мон тиледлы туж кемалась гожтэт ӧй но лэзьылы вал ини. Оло тӥ кышкаса но улӥськоды дыр. Актык гожтэтэз Ростовисен лэзем вал. Ти сое басьтӥды дыр.

Ти но мыным гожтэт лэзиськоды дыр но, только мон уг басьтӥськы. Кунь толэзь мында луиз ини тилеськыд гожтэтдэс басьтэме ӧвол. Оло мар кулэ но ӧвол, только Гирок шорисен гинэ кылэм потэ. Таза сӧл медам со?

Таин гожтыса быттӥсько, вае ваньды но бур кидэс. Венялы, нош пичи нуны ваньке, солы туж бадзым мусо салам верасько.

ӟеч луе, килисько таза сӧл.

2 марта 1942 года».

Татьяна Трифоновна верамъя, гожтэтъёслэн авторзы луэ Петров Николай Семёнович, Гондыргуртысь воргорон (1917 арын вордскемын). Николай Семёнович дышетскем Гондыргуртысь начальной школаын, собере 7 классэз Покчи Лӧзяын йылпумъям.

— Кышноез Николайлэн ӟуч вал, одӥг нылпизы но вань вал шуыса тодӥсько. Кӧня ке гожтэтъёссэ тани утьыса кельтӥмы, анае соосты мыным сётӥз. Та дырозь утиськем-возьмаськем гожтэтъёс арам медаз луэ шуыса, тӥ доры вайи. Оло, музее но сётыны луоз... Туала поколение ожлэсь марзэ уг тоды, таӵе гожтэтъёсты соосты лыдӟыны кулэ шуыса малпасько. Егитъёс оже пыриськемъёс, ожын быремъёс сярысь медаз вунэтэ вал. Сыӵе малпанъёсын та гожтэтъёсты вайи, — шуиз Татьяна Трифоновна.