Петр но Павел апостолъёс, уте милесьтым улонмес

Азьвыл гырон-кизён ужъёсты йылпумъяса, Петроу нуналэз данъям бере гинэ турнаны потӥллям. Вуэ гужемлэн тужгес но чебер дырыз. Мӧйыос верамъя, Вукогурт калык нырысь огаз урамын юмшам, ӵуказеяз — мукет урамын. Собере турнаны потӥллям.

Праздникез нуисьёс — Антон Никитин но Марина Залкеева — тодматӥзы милемыз та апостолъёслэн улэм-вылэменызы, святой ужъёсынызы но адӟонъёсынызы. Тодӥмы Апостол Петр огшоры чорыгась вылэм шуыса. Чорыгакуз ик сое синйылтэм Иисус Христос но сьӧраз ӧтем, Петр соку ик Христос сьӧры кошкем. Римын император Нерон кивалтон дыръя Петрез но Павелэз чиданы луонтэм курадӟытыса вииллям, калык пӧлын христианской осконэз вӧлмытэмзы но юнматэмзы понна. Святойёс пӧлысь та кык апостолъёслы гинэ сётэмын Первоверховной ним. «Петрлэн юнлыкез но Павеллэн нодлыкез» шуыса Черкын та нуналэз данъяло, асьмелы шумпотон но кужым мед сётозы шуыса куро.

Нылпиос но егитъёс, лыктэмъёслэсь мылкыдзэс ӝутыса, концерт возьматӥзы. Синмаськыса учкимы пичиослэсь усто эктэмзэс, кырӟамзэс. Кылбуръёс веразы кылъёссэ шӧдытыса, сюлмысь. Зэмос артистъёс кадь чебер кырӟазы Антон Никитин, Римма Кузнецова, Елена Никитина, Лариса Сидорова.  Та нуналлы сӥзем мадиськонъёсын, калык чакланъёсын, нунал тодметъёсын тодматскимы.

Петроу дыръя веник керттыло бере, татын но веник керттӥзы. Тужгес чебер веникез пӧрмиз Валя апай Никитиналэн.

Пусъем потэ мылысь-кыдысь ужрадэ пыриськем чупырес нылпиосты, соослэн «Меленка» ансамбльзы но вань вылэм. Тани соос: Камилла Парманова, Кристина Григорьева, Эльза Филиппова, Маша Григорьева. Бускель гуртъёсысь нылпиослэн но луонлыксы вань вал сцена вылэ потыны. Калыкез шулдыртӥзы Сизнерысь Никита Бураков, Сала Кушкетысь Антон но Андрей Камаевъёс, Казаньысь апай-сузэръёс Вагаповаос. Нылпиос пыриськизы на «Пичи чеберайёс но батыръёс» нимаськись трос этапъем конкурсэ. Валамон ини, кузьымъёс но утӥзы. Таосын, котьку сямен ик, мылысь-кыдысь ужа педагог Анна Григорьева. 

Пӧртэм шудонъёс, ӵошатсконъёс вискын мылкыд карисьёс кунояськыны быгатӥзы. Шырыт сямо вукогуртъёс трос пӧраськемъёс ваиллям: перемеч, табань, пирожкиос, кӧжы кисаль, ӵӧжы, конкурсэ пыриськыса олокыӵе но пушкесъёсын перепечъёс. Пиосъёс сӥлё ӝук но, чорыг лым но пӧзьтӥллям (таиз одно ик — Петр чорыгась вал уго), самоваръёсын чай быректытӥзы.

Мероприятиосты ялан организовать карисьёсмы Марина Залкеева, Анна Григорьева, Антонида Перемечева, Людмила Лобанова, Ирина Пашкеева но мукетъёслэн тыршеменызы праздник удалтӥз. Озьы ик котьку юрттэ таӵе дыръя Михайлова Евгениямы, аппаратура ласянь но, мызганэн шудыса жингрес кырӟанъёсыныз но юмшатэ. Со клубе вуэ ке, залын пукисьёс соку ик шыпырто: «О-о, Женя апай вуиз, табере шулдыр луоз». Ӟечкыласькомы тонэ алигес Татарстанысь Культурая министерстволэн Данъян грамотаеныз пусъемен, ужад но улонад бадӟымесь шумпотонъёс мед луозы.

Петроу но Шундылэсь нуналзэ йылпумъяса, Антон но Марина учкисьёслы сӥзизы азинлык, ӟечлык, Петр кадь юнлыко но Павел кадь нодлыко луыны.

Вера Лобанова, Вукогурт