Хезмәт

Покчи Лӧзяын табань сиён ортчиз (+фоторепортаж)

Кӧня ар радысь ини Покчи Лӧзяын Вӧй арнялэн берпуметӥ нуналаз толэз келяса но тулысэз пумитаса шулдыр ужрад ортчыто. Тани туэ но та чебер сямзылэсь ӧз куштӥське покчи лӧзяос, шулдыръяськизы, мылысь-кыдысь шутэтскизы.

Котьку сямен та праздниклэн тодметъёсыз луизы самоварысь пӧсь чай, ческыт табань но куро мунё. Покчи Лӧзя культура юртысь художественной руководительлэн Галина Денисовна Петровалэн тыршеменыз радъямын но ортчытэмын вал пӧртэм шулдыр вожвылъяськонъёс но шудонъёс. Лыктэм адямиос — пиналъёс  но, бадӟымъёс но — горшок пыргытӥзы, чорыг кутӥзы, гозыен кыстаськизы. Бадӟымъёс, пичи дырзэс тодазы вайыса, ог-огзэс туала салазкиен (ледянкаен) нуллӥзы. Татын сяна ку эшшо картъёссылы кышнооссэс салазкие пуктыса, яке воргоронъёслы, кышномуртъёсын интыенызы воштӥськыса, салазкие пуксьыны йӧтысал?! Озьы ик пичи пиналъёслэн но, бадӟым апайёслэн-агайёслэн но мылкыдазы кельшиз шуыса малпасько чеберъям валэн ветлон но. Огъя вераса, мылкыд карем мурт та нуналэ Покчи Лӧзя культура юрт дорын ортчем шулдыръяськонын мылысь-кыдысь шутэтскыны быгатӥз. Эшшо шутэтскем понна кузьым но басьтӥз. Нош кузьымъёс зэмзэ но бадӟымесь вал: 5 литр бутылкаосын кӧсвӧй, 5 килограммъем пакетъёсын макарон, пӧртэм тусьты-пуньы, ведраос но улонын кулэ луись мукет арбериос. Пичиосыз шудонъёсын шумпоттӥзы. Валамон, та ваньмыз коньдонэз кулэ каре. Сыӵе дыръя спонсоръёстэк уг луы. Тани соос: «Сурнай» общество, «Талисман» но «Ялтра» магазинъёс, лэсьтӥськон материалъёсты вузанъя но Балтасьысь Мошкинъёслэн нылпи вузъёсты вузанъя магазинъёс. Озьы ик нимаз ужбергатӥсь Ильмир Султанов но люкет пыртӥз.

Куро мунё — Вӧйдырлэн валтӥсь тодметэз. Сое ӝуатон толэз келяса тулысэз пумитанлы сӥземын. Покчи Лӧзяын но, арлэсь ӟеч луэмзэ, удалтэм урожаен шумпоттэмзэ сӥзьыса, куро мунёез ӝуатӥзы. Бератаз мылкыд каремъёс ӟырдыт калык гуръёс улсын эктӥзы-шудӥзы но али.

Тӥни озьы адямилэн улонысьтыз одӥг ке но нуналэз, огпӧртэм пурысь нуналъёсызлэсь висъяськыса, трослы тунсыкогес ортчиз, уно чебер тодэ ваёнъёс кузьмаз.

Нравится
Поделиться:
Реклама
Комментарии (0)
Осталось символов: