Пор-Кутешысь дано библиотекарь Елизавета Самаева сярысь

Нырысь Елизавета Кутэшысь покчиёзо школаын дышетске, собере — Кушкетын, нош отысен Ципья школае выже. 10 классэз йылпумъяса, Елабугае дышетскыны кошке но шоро-куспо специальной образование басьтэ. Библиотекарьлэсь ӧнерзэ басьтыса, Елизавета Никифоровна вордскем гуртаз ужаны бертэ. Со луэ 1950-1951-тӥ аръёсы. Со дырысен пенсие потытозяз, пенсие потэм бераз но али Кутэшысь библиотекаын ужам — 1988-тӥ арозь. 40 ар пала — одӥг ар кадь.

— Анай ужзэ сюлэмзэ сётыса быдэсъяз. Пенсие потэм бераз но ужаз али. Бодые пыкъяськыса ке но, ужаны ветлӥз. Сокем ас ужезлы сётскемын вал со гумырыз ӵоже. Ужаса дугдэмез бере но али, ужам аръёсыз сярысь туж мӧзмыса тодаз вайылӥз, — маде Елизавета Никифоровналэн бадӟым нылыз, Светлана Шишкина.

Кызьы уз мӧзмы бен? Елизавета Никифоровнаез пиналъёс но, бадӟымъёс но туж яратӥллям, со дорын библиотекаын но котьку трос адями луэм. Нялтас вераса, Пор-Кутешын библиотека гуртлэн пумаз вылэм, со юртлэн одӥг ӝыныяз покчиёзо школа луэм, кыкетӥяз — библиотека. Кырӟаны яратӥсь, задор, серемез поттӥсь, капчи но шулдыръяськись мылкыдо (сыӵеен со ӵыжы-выжыосызлы тодазы кылем) пӧртэм общественной ужъёсы но пыриськыны яратэм. Нош библиотекарьёслэн сыӵе ужъёссы, мазэ веранэз, азьло но трос вал, али но солэсь кулэс ӧвӧл. Конкурсъёс, люкаськонъёс — ваньмаз пыриськем Елизавета Никифоровна. Праздникъёсын но нылкышно воштонтэм куно луэм. Ӵемысь сыӵе ужрадъёсын со туала тамадаослэсь рользэс быдэсъям. Гожъяськыны но туж усто луэм со — ас дыраз Елизавета Самаева зэмос селькорен лыдъяськем. Солэн гожъямъёсыз трос пол ёрос газетын потылэмын, 1990-тӥ арын егит дырыз сярысь гожтэм статьяез «Кенеш» журналын но печатламын (та статьяеныз одӥгаз вуоно номерамы тодматскыны быгатоды). Озьы ик Елизавета Никифоровна агитатор, секретарь луэм. Нош кӧня луиллям семинаръёс, курсъёс, концертъёсы ветлонъёс — лыдъяса быдтонтэм. Та ужъёслэсь огезлэсь но палэнэ ӧз кыльы адӟем карымон кышномурт. Со котьку азьмынӥсьёслэн радазы вал.

Ольга внучкаез ӵужанайзэ тодаз вайыса вера:

— Ӵужанае туж ужась, туж тыршись нылкышно вал. Аслэсьтыз ужзэ бен макем яратӥз! Котьку вера вал: «Мон аслэсьтым ужме туж яратӥсько». Гожъяськыны туж усто вал. Солэсь гожъямъёссэ ми утьыса кельтӥмы, табере, ӵужанаймы вӧзамы ӧвӧл бере, лыдӟыны яратӥськомы солэсь текстъёссэ. Гожъям со аслаз пичи но егит дырыз, улонэз сярысь. Нош улонэз солэн капчи ӧй вал. Пенсие потэм бераз но со капчи улон ӧз адӟы...

1956-тӥ арын Елизавета Никифоровна Пор-Кутешысь ик воргоронлы, Пётр Трофимовлы, картлы кошке. Картэзлэсь фамилизэ уг басьты, солы котьку аслаз фамилиез кельшем. Кузпалъёс ньыль нылпиосты будэто — Светланаез (Туръяын улэ), Викторез (Свердловск улосвылын улэ), Маргаритаез (Вукогуртын улэ), Владимирез (кулэмын ни). Елизавета Никифоровна вераллям: «Нылпиед, семьяед вань шуыса, ужысь вазь кошкыны ӧз луы. Егитъёслэн шулдыръяськемзы потэ. Ӵемысь бертылыны тупаз уйин, уйшор азьын». Зэмзэ но, библиотекаын ужасьёслэн лыдъяса быдтонтэм трос ужъёссы вал. Лыдӟисьёсын ужан сяна, мукет ужрадъёс но ортчытоно луылӥз. Но кулытозяз но Елизавета Никифоровна ас ужезлэсь мӧзмыса улэм. 2001-тӥ арын со асьме дуннеысь кошкем. Ватэмын вордскем гуртаз. 

Елизавета Самаевалэн тодэ ваёнъёсысьтыз: «50-60 аресэ вуыку, йырсиосыд пурысьтаны кутскыку, ортчем улон сярысь малпаны кутскиськод. Тӥни соку сайкатскем кадь луиськод, улон сюрестэ син азяд пуктӥськод. Адямиос понна кулэ мурт луи-а мон? Кыӵе мынам улонэ, нылпиосме ӟеч будэтыны быгатӥ-а? Мӧйыосты ӝоже ӧй уськыты-а? Лыдъяд ке, та улонын ортчем нюжаос вераса быдтонтэм ук. Мӧйымемъя-а, мар-а таӵе малпан вуылэ: нуналъёс кызьы ке но калленгес мед ортчысалзы вылэм...»