Хезмәт

Пор-Кутешысь Наталья Терентьева — шудо анай

Калыкын кемалась сыӵе стереотип кылдэмын: трос нылпиё анай луыны туж секыт, малы ке шуоно сюлмаськон-куректонъёс, уксё быдтонъёс кӧня ке поллы йыло.

Калыкын кемалась сыӵе стереотип кылдэмын: трос нылпиё анай луыны туж секыт, малы ке шуоно сюлмаськон-куректонъёс, уксё быдтонъёс кӧня ке поллы йыло. Споръяськыны уг луы кадь, нош куинь яке тросгес нылпиослэн анайёссы ӵем дыръя верало, кӧня ке нылпиосты будэтыны капчигес шуыса, малы ке шуоно соос ог-огзылы юрттыса, ӵош будо. Со сяна, сыӵе бадӟым но эшлыко семьяосын яратон но шумпотон мылкыдъёс вань кадь шуг-секытъёсты вормыны юртто.

«Туж шумпотӥсько, мон трос нылпиё анай шуыса»

Терентьевъёслэн семьязы – сыӵе шудо семьялэн примерез. Пор-Кутеш гуртын улӥсь трос нылпиё анаен тодматскеме бере, нырысетӥ юанэ, валамон, таӵе луиз: «Малпаськиды-а Тӥ куке но, трос нылпиё анай луоды шуыса?». Наталья Петровна таӵе ответ сётӥз: «Трос нылпиё анай луо шуыса малпаськем вал пичи дыръям. Но малпай, самой тросэз куинь нылпие луоз шуыса. Вить пинал ваён планамы ӧй вал, но Инмарлы озьы кулэ луэм, дыр. Туж шумпотӥсько, мон трос нылпиё анай шуыса. Вань сыӵе анайёс но, кудъёсыз вордскем нылпиоссэс куштыса кельто, кин ке нылпи вайыны быгатытэк курадӟе… Инмарлы тау, мынам нылпиосы вань. Мон котьку верасько: «Мон понна но Инмар вань вылэм» шуыса. Табере нылпиосылэсь ӟечсэ гинэ адӟыны мед кылдоз ини».

Кузпалыз ваньмыз ласянь пыкет луэ

Наталья Петровналы ваньмыз ласянь бадӟым юрттэт сётэ кузпалыз Евгений Геннадьевич. Тодматскиллям Наталья но Евгений Ӟаныын. Наталья ачиз Украинаын 1986-тӥ арын вордскемын, сизьым аресысен Ӟаныын улэм, кузпалыз Ральники гуртысь, вордскемын 1982-тӥ арын. Армиын служить карыса бертэмез бере, атаез доры, Ӟаные, бертэ. Соос егитысен тодматскиллям, 2004-тӥ арын семья кылдытӥллям. 2010-тӥ арын егит семья Пор-Кутеше улыны интыяське. Натальялы кузпалъяськыкузы ваньзэ-ӧвӧлзэ 18 арес луэ. Нялтас вераса, туэ соослэн семьязылы 15 ар но тырмем. 2005-тӥ арын бадӟым нылзы Карина вордске, 2008-тӥ арын – Никита пизы (пиеныз декретэ потытозь Наталья Петровна гуртысь магазинын ужа), 2014-тӥ арын — Мирослав пизы (со дыре нылкышно ини Кутэш фермаын ужа), кыктооссы, Дарина но Зарина нылъёссы, кылем арын вордскиллям. Евгений Геннадьевич Высокогорской районысь «Ялкын» обществоын ужа, со йӧл нуллэ.

Пиосмуртэз ваньмыз ласянь зэмос воргорон шуыны луэ. Семьяез номырлы но ёрмыса медаз улы шуыса, со туж трос ужа, финанс ласянь семьяез понна кыл кутэ. Кышноез солэсь тыршемзэ адӟе, солы юрттыны тырше. «Нылпиосылы но атайзэс пыкылыса вераме ӧвӧл, котьку «Атайды тӥ понна тырше» шуыса верасько», — маде нылкышно.

Финанс ласянь гинэ но ӧвӧл, ваньмыз ласянь кышноезлэн юрттӥсез но пыкетэз луэ Евгений Геннадьевич. Кыктооссэс ваён азязы но, кышнозэ поддержать карыса, со верам: «Юртмы вань, сиёнлы ёрмыса ум улӥське. Эн но малпаськы, эн сюлмаськы, ваньмыз умой луоз». Сыӵе кылъёсты кылэмез бере, Наталья Петровна ини номырлэсь но кышкамтэ: нылпиосты будэтон ласянь опытэз шӧдскымон бадӟым, кузпалыз вӧзаз. Нырысь гинэ ӧжытак кышкам кылдэм, но али вордскымтэ нылпиосызлы кылдэм юн яратонэз трослы кужмогес луэм.

Секыт быръён…

Наталья Петровнаен тодматскытозь, нырысь солэсь «Инстаграмысь» страницазэ шедьтыса, егит нылкышноен «заочно» тодматски. Кӧня ке гожъямъёссэ но туспуктэмъёссэ гинэ учкыса но, валамон луиз: та кышномурт аслэсьтыз нылпиоссэ, семьязэ туж яратэ. Котькуд гожтэм чуръёсаз солэн яратон но гажан мылкыдъёсыз шӧдӥсько. Кыктоосыз Дарина но Зарина вордскемзы бере одӥгзэ гожтэм постсэ тӥледлы но лыдӟыны ӵектӥсько. «Котькуд адями улоназ огпол ке но секыт быръён азьын сылэ. Мон но озьы ик. Кыктоосмы вордскытозь, ми кема малпаськимы: быгатомы-а вордыны, будэтыны, визьнод сётыны нылпиосмылы? Табере соос вить кузя луозы ук! Кузпалэлы ӟеч, юн решениезлы, нылпиосылы – валамзылы, апайёсылы — юрттэмзылы, матысьёсылы – пыкет луэмзылы туж бадӟым тау карисько. Анайёс асьсэос гинэ тодо, макем кужмо соос нылпиоссэс ярато… Бадӟым нылы Карина – мынам валтӥсь юрттӥсе, вынъёсызлэн но сузэръёсызлэн кыкетӥ анайзы; Никита – йӧн-йӧн но куронъёс пуктӥсь агай; Мирослав – интыяз пукисьтэм «сорвиголова»; Дарина но Зарина нылъёсмы – кык пичи кылчинъёсмы. Соос ваньзы пӧртэмесь ке но, котькудзэ туж кужмо яратӥськомы, ваньзы шоры одӥг кадь учкиськомы. Мынам вить нылпиосы вань, кузпалы, матысь адямиосы – мар нош кулэ шудо улон понна?»

Куке Терентьевъёс кыкто нылъёс витё шуыса ивор вӧлмем, адямиос пӧлын пӧртэмзэ верасез луэм. Кызьы будэтозы, малы соослы сомында нылпи шуыса малпасез но луэм, дыр. Но кузпалъёс адямиослэсь верамзэс кылзӥллямтэ. «Адямиослэн верамзы милемлы малы кулэ? Нылпиосмы – милям самой бадӟым шумпотонмы. Ми соосты будэтон, пыд йылазы султытон понна нокинлэсь номыр ум куриське ук, асьмеос тыршиськом, асьмеос соос понна кыл кутӥськом. Но зэмзэ ке верано, тросэз адямиос монэ соку поддержать каризы, «Молодец» шуизы, адямиослэн поддержказы, ӟеч кылъёссы гинэ но макем аслым оскон но кужым сётӥзы», — маде Наталья Петровна.  

«Кулэ дыръя – небыт, нош кулэ ке – чурыт куронъёсты пуктӥсь анай»

Терентьевъёслэн нылпиоссы огкадь ярато но гажало анайзэс но, атайзэс но. Кузпалъёс вань нылпиоссы шоры огкадь учко.  «Кулэ дыръя – небыт, нош кулэ ке – чурыт куронъёсты пуктӥсь анай мон, - шуэ Наталья. – Кузпалы но сыӵе ик. Мон ке тышкаськисько, кузпалы куспазы уг пыры – тодэ, юнме визь уг пыртӥськы шуыса. Ушъяськомы ке но, кыкнамы ик небыт кылъёсты ум жаляське. Нылпиос тышкаськыку валало, мар понна соослы кыл йӧтэ. Характерме но соос тодо ни. Мон ӝог буйгатскисько, — вера нылкышно. – Азьло бадӟымъёсызлэн покчиосызлы ӧжыт вожан мылкыдъёссы шӧдско вал, табере озьы ӧвӧл ни».

Нылпиоссы самостоятельной луыса будо

Наталья Петровна – туж шӧдӥсь сюлэмо, небыт нылкышно. Ӟаныын улӥсь кык апайёсыз сярысь веракуз но синкылиосыз адскизы (соос нылкышнолы туж трос юрттэт сётӥллям но сёто вылэм). Нылпиосыз сярысь вераку но мылкыдъёссэ ватыны ӧз быгаты. «Нылпиосы туж ӝог будо… Бадӟым нылы но 9-тӥ классэз йылпумъя ини. Со мынам матысь юлтоше, кенешчие, юрттӥсе но. Котькудӥз нылпие йӧно адями луыса мед будоз кадь потэ, котькудӥз улонын ас интызэ мед шедьтысал. Оскымон адямиос луыса мед будысалзы. Пичиысен ик нылпиосы самостоятельной луыса будо, ог-огзылы юрттыны тыршо. Анай луи шуыса, тау вераме потэ кузпалэлы но нылпиосылы, соостэк мон сыӵе шудо анай ӧй луысал ук», — шумпотыса вера со.

Адӟем карымон анай — ваньмыз ласянь адӟем карымон нылкышно но

Наталья Петровна, анай но кузпал сяна, адӟем карымон кузё кышно но али. Ачиз, нылпиосыз, кузпалыз сяна, соосын ӵош Евгений Геннадьевичлэн атаез но улэ. Со валес вылын кылле ини. Ваньзэсты учкыса, утялтыса улон сяна, пудоосты но утьыны вутске Наталья – оскымон но юрттӥсь кузпалы вань дыръя, ваньмыз пӧрме. Соослэн туннэ нуналэ вань кык скалзы, кунянъёссы, ветылзы. «Кызьы ваньзэ вутскиськоды» шуэм юанлы «Дырме нылпиосы, кузпалы, ужъёс куспын люкыны дышетски» шуиз.

Адӟем карымон Терентьевъёслэн семьяенызы тодматскемелы туж шумпотӥсько. Ужась, семьязы понна тыршись кузпалъёс тросэзлы адӟем карымон луо. Соослы котьку но сыӵе ик каньыл, лякыт луыны сӥзисько. Нылпиостылэн будэмзылы, собере асьсэ семьяоссэ кылдытэмзылы шумпотыса, кузпалэныды котьку ог-огдылы юрттыса, кема аръёс ӵоже шудо улыны мед кылдоз!

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: