Праздник ортчиз, мылкыдъёс кылизы

28-тӥ инвожое Ципья черкогуртын ортчиз «Гырон быдтон» — удмурт калыклэн календаряз одӥгез тужгес сӥлы карымонэз вашкала праздник. 

Зор быдэс нунал ӵоже ӧз дугдылы ке но, праздник туж усто пӧрмиз: нылпиос но бадӟымъёс калык шудонъёсы, вожвылъяськонъёсы мыло-кыдо пыриськизы, концерт программаен мылкыдзэс ӝутӥзы, удмурт калыклэн узыр культураеныз тодматскизы. 

Сям-йылолъёсты утён но калыкъёслэн эшъяськонзы 

Вашкала дырысен удмуртъёс, огазе люкаськыса, «Гырон быдтонэз» пусйылӥзы, бусые потыса, ӝук пӧзьтылӥзы, ю-нянь мед удалтоз шуыса, инмаръёслы вӧсяськылӥзы. Озьы ке но та праздниклэн пуштросэз туннэ гурт хозяйствоя календарьлэсь кыдёке потэ. Туннэ та чебер праздник, удмурт калыклэсь лулчеберетсэ но сям-йылолъёссэ утьыны, азинтыны но вӧлмытыны юрттэм сяна, пӧртэм выжы калыкъёслэсь эшлыко кусыпъёссэс но юнматэ. Нош «Гырон быдтонлэн» Ципья гуртын ортчемез нимаз ик символичной луэ.

Праздникез ортчытон понна Ципья гуртэз быръён юнме шорысь ӧвӧл: гурт кемалась дырысен бигеръёслэн, удмуртъёслэн, поръёслэн, ӟучъёслэн, чувашъёслэн но мукет калыкъёслэн тупаса улэменызы адӟем карымон луэ. Ӵапак татын ик интыяськемын «Калыкъёслэн эшъяськонзы» музей но, пусйыны кулэ, со одӥг гинэ сыӵе музей Татарстанын. 

Ёросысь лулчеберет удысын ужасьёслэн тыршеменызы дасям театрализованной пролог но «Гырон быдтон» праздниклэсь калыкъёс куспын тупаса улонлы сӥзем яркыт пример луэмзэ, ёросын улӥсь вань калыкъёслэсь лулчеберетсэс гажаммес возьматӥз. 

Эшлыко кусыпъёс сярысь вераз ёрослэн кивалтӥсез Рамиль Нутфуллин но, со ёросысьтымы удмурт калыкез та праздникен ӟечкылаз. 

— «Гырон быдтон» — со асьме ёросысь удмурт калык понна гинэ ӧвӧл, быдэс калыкмы понна но бадӟым праздник. Ӵапак со асьмеды ортчем исторической сюресамы но йӧскалык сям-йылолъёсамы берыктэ, поколениослэсь лулпуш кусыпъёссэс люконтэм каре. Со, зэмзэ вераса, ёросамы улӥсьёслэн тужгес яратоно но кема возьмам праздниксы луэ. Та нуналэ сӥлы кариськом сюдӥсьмес — музъеммес но гурт удысын жадёнэз валасьтэм ужасьёсмес. Ёросмылэн азинсконъёсаз тӥляд тыршемды туж бадӟым. Азьланяз но ӵош мед уломы, мед тыршомы, — шуиз Рамиль Рашитович. 

Таӵе ик мылкыдъёсын ас калыкезлы вазиськиз Балтась ёросысь удмуртъёслэн «Кенеш» НКА-зылэн кивалтэтэзлэн тӧроез Ольга Пчельникова но.

—Та праздник йӧскалык мерасэз гажан гинэ ӧвӧл, со калыкъёс куспын тупаса улонэз юнматон понна туж кулэ площадка но. Со туж кулэ лулчеберет но мерлыко ужез быдэсъя: егитъёслэсь выжыосынызы тунсыкъяськыны мылкыдзэс ӝутэ, трос йӧслыко Россилэсь но Татарстанлэсь лулпушлыко огинлыксэс уте. 

Ёрослэн кивалтӥсьёсызлэн юрттэменызы но саклык висъяменызы, «Гырон быдтон» возиське но юнма, со котьку яркыт, тодэ кыльымон событие луэ. Ӵапак сыӵе сям-йылолъёс — кужмо но огазеяськем обществолэн инъетэз. 

Вашкала но туала удмурт лулчеберет удмуртъёслы гинэ ӧвӧл, асьме ёросысь но элькунысь вань калыклы со тунсыко потэ. Со бордаз кыске лулысь-сюлмысь кырӟанъёсын но ӟырдыт эктонъёсын, яркыт костюмъёсын, умуртъёслэн ӟеч сямынызы. 

Туннэ «Гырон быдтон» зэмзэ но интернациональной луиз, со ёросысь вань выжы калыкъёсты огазея, отчы пыриськисьёслы трос ӟеч мылкыдъёс но кужымъёс ватса. Таӵеез луыны быгатэ соку гинэ, куке калыкъёс эшъяськыса но огкылысь уло, — пусйиз Ольга Мироновна. 

Туэ праздникмылэн куно пумитась кузёосыз луизы Покчи Лӧзя но Шубан гурт поселениос, «Алга» но «Сурнай» возёсъёс, кытын озьы ик эшъяськыса но огкылысь уло но тыршо удмуртъёс, бигеръёс, ӟучъёс но мукет выжы калыкъёс. 

Сӥ но дан

«Гырон быдтон» — со шулдыръяськон гинэ ӧвӧл, йылпумъянъёс лэсьтон вакыт но. Сӥё-дано ужрадын котьку сямен гурт удысысь азьветлӥсьёсты но удмурт калыклэсь активистъёссэ данъян ужрад но ортчиз. Та вакыт ваньмызлы тодазы вайытӥз праздниклэн валтӥсь дунлыкез сярысь — гурт удысысь ужез гажан но вордскем музъемез яратон, соин данъяськон.
Сцена вылэ нырысь ик ӧтемын вал ветеранъёс, кудъёсыз удмурт калыклэсь кылзэ но лулчеберетсэ утён но азинтон понна бадӟым ватсэт пыртӥзы.

Туэ Балтась муниципал ёрослэн ки-валтӥсезлэн Таукарон гожтэтэныз пусъемын вал Балтась ёросысь удмуртъёслэн азьветлӥсьёссы: кема аръёс ӵоже Ӟаны но Ципья шоръёзо школаосын кивалтэм директоръёс — Ермаков Иван Васильевич но Трофимов Василий Фёдорович, Покчи Лӧзя школаен кивалтэм Байтуганов Пётр Васильевич, трос аръёс ӵоже «Труд» колхозэн кивалтэм Чернов Пётр Григорьевич. Та списокын куамын ар пала ёросысь «Азьлане» газетэн кивалтэм Кунаев Александр Михайлович но вань, но, жаляса верано, со празднике лыктыны ӧз быгаты. Удмурт калыклэсь кылзэ но лулчеберетсэ утемез но азинтэмез, шошма удмуртъёслэсь фольклорзэс люкамез но «Удмурт шыкысысь ваньбуръёс» бичет поттэмез понна Балтась ёрослэн главаезлэн Таукарон гожтэтэныз озьы ик пусъемын вал Сырья гуртысь клублэн кивалтӥсез Сапожников Леонид Дмитриевич но. 

Балтась ёросысь исполнительной комитетлэсь Таукарон гожтэтсэ басьтӥзы Покчи Лӧзя лулчеберетъя юртысь устолыкъя кивалтӥсь Галина Петрова, Ярак-Чурма ФАП-ысь фельдшер Лариса Степанова, активист, ёросысь но элькунысь пӧртэм спорт амалъёсъя трос пол вормись Михаил Павлов, «Алга» обществоысь тракторист Виталий Борисов, «Алга» обществоысь скал кыскись Лариса Борисова, «Сурнай» обществоысь тракторист Алексей Матвеев но «Сурнай»-ысь скал кыскись Галина Плотникова.

Нялтас вераса, «Гырон быдтон» праздниклэсь флагзэ ӝутыны но оскемын вал «Сурнай» возёсысь азьмынӥсь трактористлы Алексей Матвеевлы но со ик хозяйствоысь усто ужась скал кыскисьлы Галина Плотниковалы. Тӧл шорын лопыръяськись куншет праздниклэн кутсконэз сярысь ивортӥз. 

Зор — шулдыръяськонлы могӟет ӧвӧл 

Куазь та нуналэ празднике лыктэмъёслэсь юнлыксэс эскерыны малпаз: дугдылытэк, быдэс нунал зориз. Бен, калык трос ӧй вал. Нош озьы ке но нылпиос но, егитъёс но, мӧйыос но зор-котлы мылкыдзэс сӧрыны ӧз лэзе. 

Праздник площадка одӥг минутлы но буш ӧз улы — адямиос мыло-кыдо пыриськизы калык шудонъёсы но вожвылъяськонъёсы. Мылысь-кыдысь ӵошатскизы праздниклэн сяме пырем шудонъёсаз: горшок пыргытӥзы, синъёссэс думыса, кузьымъёсты качыен вандӥзы, чорыгазы, куасэн кот турын вылтӥ ветлӥзы, куинь муртэ тэрытӥсь штаниен бызьылӥзы, армрестлинген кужымзэс мертазы, ю тысен тырмытэм мешокъёсты нуллӥзы но атасэз кутӥзы. Котькудӥз сюлэмызъя шулдыръяськон шедьтыны но ассэ эскерыны быгатӥз. Та шудонъёс праздникез шулдыртӥзы, адямиосты шунтӥзы. 

Концерт но калык сиён-юон 

Празднике лыктэмъёслы яркыт концерт программа кузьмазы ёросысь лулчеберетъя юртъёсысь но клубъёсысь творческой коллективъёс. Нош праздниклэн тужгес витем дырыз луиз Удмурт Элькунысь кырӟанъя но эктонъя «Италмас» академической кун ансамбльлэн выступлениез, кудӥз учкисьёслы вунонтэм мылкыдъёс кузьмаз. Удмурт крезьгуръёслэн жингыр ваземенызы но яркыт, аспӧртэмлыко костюмъёссылэн чеберлыкенызы пачылмем выступлениоссы вань люкаськемъёслы зэмос кузьым луиз. 

Нош кыӵе «Гырон быдтон» калык сиён-юонъёстэк! Мазэ веранэз, праздниклэн валтӥсь сиёнэз, котьку сямен, луиз тылскем вылын дасям вӧсь ӝук. Озьы ик куноосты табанянен но пельнянен, пӧртэм пушкесэн дасям перепечен, шу перемечен, мильымен но шешериен, удмурт сюкасен но мукет йӧскалык сиён-юонъёсын куноятӥзы. 

Ӧжытак критика 

Радъям праздниклэн вань чеберлыкез шоры учкытэк, пусйытэк кельтыны уг луы одӥг бадӟым тырмымтэез: сцена вадьсын липет ӧй вал. Быдэс нунал праздникез нуисьёс, артистъёс зор улын выступать каризы но сач-сач котмизы. Учкисьёс, зонтъёсын шобырскыса, дождевикъёс дӥсяса выступлениоссэс шумпотыса пумитазы, нош соослы, мазэ веранэз, секыт йӧтӥз. Оскем потэ, азьланяз радъясьёс та янгышез лыдэ басьтозы но концерт программае пыриськисьёслэн каньыллыксы сярысь сюлмаськозы, угось ӵапак соослэн талантсы но асьсэды жалятэк тыршемзы праздникез вунонтэм каро.

Ципьяын ортчем «Гырон быдтон» нош ик возьматӥз: зэмос праздник календарьын ӧвӧл, адямиослэн сюлэмъёсазы улэ. Нош зор уг люкеты, куке мылкыд вань кырӟаны, эктыны, вожвылъяськыны но калыкъёслэн одӥг бадӟым, лякыт семьязы сямен улэмзылы ӵош шумпотыны.