Пудо-живот утёнын нырысетӥосыз

Та ужын трос тодон-валан, ужвыл (практической) дышемъёс кулэ, нош пудо-животэз яратон но ужаны быгатонлык сямъёс азьпал радэ пото. Кызьы котькуд адямилы умой эмъяськон кулэ, озьы ик пӧйшуръёс но лӥятэмез ярато. 

Гурт удыс сярысь верано ке, та самой секыт но пайдаё уж. Пудо-живот утёнын пӧртэм ӧръёс, но ваньмыз соос яратоно «ньыль пыдо» эшъёсмылэсь улонзэс капчиятонлы но таза каронлы сӥземын.

Калыкын таӵе веран вань: «Эмтодос адямиосты бурмытэ, нош ветеринари удыс — быдэс калыкез». Зэмзэ но, пудо-животъёслы гурт удысын тужгес бадӟым саклык висъяло. Со — сиён но, коньдон но, ваньбуро улон но, кайгырон вакытэ — капчиятон но. Пудо вордонын тодӥсь но валась адямитэк азьлань мыныны нокызьы уг луы.

Туннэ тӥледыз Янгул гуртысь участковой ветеринарной пунктын ужасьёсын тодматӥськом. Татын ужасьёс асьсэлэн каньыл мылкыдэнызы но эшлыко ужаменызы висъясько. Кивалтӥсьсы — Александр Уськеев — огшоры гуртысь удмурт воргорон. 

— Александр Германович, асьтэлэн уженыды но ужасьёсыныды тодматэ вал.

— Мынам ужан сюресэ котьку гурт улонэн герӟаськемын вал. Казаньысь Бауман нимо ветеринарной кун академиез йылпумъяса, вордскем палъёсы ик бертоно кариськи, котьку сюлмы гуртэ кыскиз. Трос аръёс ӵоже «Дуслык» возёсын ветеринар луыса ужай. Али валтӥсь уж сяна, гуртоос но ӧтчало, пӧртэм пудо висёнъёсты эскероно луылэ, мукет гуртъёсысь но жингырто. 

2019 арын кема аръёс ӵоже ветеринарной пунктлэн заведующиез луыса ужам Тахир Хуснутдиновез воштӥ. Выль зданимы 2016 арлэн оштолэзяз усьтэмын. (Выль здани зэмзэ но синмаськымон. Туала куронъёслы тупась, чылкыт, вань кулэ луись техника но тырмыт, котырысь территориез но бадӟым. Нимысьтыз кабинетъёс но чакламын, эмъюм возён интызы но лад-лад радъямын — Ю.Щ.). Коллективмы умой, тыршись, керетонъёсмы кылдӥзы ке но, вакчи дыр куспын ваньмыз ортче. Мон сяна, куинь ӧнерчиос ужало на: Елена Евдокимова но Инсаф Гильмутдинов — ветеринарной фельдшеръёс, Зиля Закиева — ветеринарной санитарка. Ваньзы асьсэлэсь ужзэс тыршыса быдэсто, ӝожтӥськыны уг луы. Ваньмы ик гуртъёсы но потаськом, тросгес сюро таза пудоен пумиськиськом. Зиля Ильдаровна здани котырысь территориез утялтыса возе, сяськаосыз но арлы быдэ синмаськымон будо. Инсаф Навилович ини ас ужзэ вить чиньызэ кадь тодэ, бадӟым опытэн ужась ӧнерчи.

Милям ужмы секыт, ватонэз ӧвӧл. Графикмы но туж ӝикыт, ваньзэ дыраз лэсьтыса ӧд ке вуы, ваньмыз чигна, соин сэрен мукет графикъёс но бере кылё. Дыраз вир басьтыса, анализэ сётоно, ас дыраз прививка пуктоно, эскероно. Скалъёслы, кунянъёслы бирка но тыриськом али, котькуд пудо нимысьтыз чотын. Туннэ тани (вераськонмы 23 гудырикошконэ вал — Ю.Щ.) «Маяк» возёсэ туберкулёз читкае потӥськом, соин валче сибирской язвалы пумит прививка но пуктӥськом. Гурт калык понна троссэ пудо-живот йӧнатон но искусственной бызьылытонъя услугаос сётӥськом. Возёсъёсы пудо-живот басьтыны лыктэм машинаослы дезинфекци но лэсьтӥськом, бератаз соослы ветеринарной справка гожтӥськом.

— Туннэ нуналэ тӥ кӧня гуртъёслы юрттэт сётӥськоды?

— Ми укмыс гуртъёслы юрттэт сётӥськом: Шишинер, Ура, Янгул, Вуж Кушкет, Бурнак, Вуж Турья, Карек-Серма, Смаиль но Сизнер. Котькуд гуртъёс аспӧртэмлыко, татын пудо сярысь гинэ малпаськоно ӧвӧл, кузёезлы но тупаны кулэ ук. Ужмы соин но аспӧртэмлыко луэ на. Гуртъёс сяна, ми доры ньыль возёсъёс юнматэмын на: «Яна тормыш», «Маяк», «Борнак», «Смаиль». Ваньзы доры пуктэм графикъя потӥськом. Смаильын самой трос сюро таза пудо, ог 400 пала люкаське. Возёсъёсын но 1000-лэсь трос пудо люкаське. Валамон ни, одӥг нуналскын ваньзэс ортчыны уг луы.

Александр Германовичен вераськон вакытэ дорамы Инсаф Навилович но итӥськиз. Солэсь но ужан аспӧртэмлыкъёсыз сярысь юалляськи, со но ваньзэ рос-прос валэктӥз:

— 20 арлэсь трос «Борнак» обществоын валтӥсь ветеринар луыса ужай. Секыт уж, ватонэз ӧвӧл. 2015 арысен ини Янгулысь участковой ветеринарной пунктэ ужаны интыяськи. Ужлэн спецификаез огкадь ке но, возёсын ветеринар понна отпуск но, шутэтскон нунал но ӧвӧл, малы ке шуоно со вылын туж бадӟым кылкутон, пудо-животлэн тазалыкез быдэсак со вылын луэ. Жингыртӥзы ке, соку ик уже лыктоно луэ, со сяна огшоры калык но дораз ӧтча. Нош татын арняяз кык пол шутэтскиськод, отпуске но кошкиськод, ужан график но пуктэмын, нышыран дыр но чакламын. Коллективмы туж умой, син медаз усьы, ваньзы оскымон адямиос, кивалтӥсь но котьку югдурамы пыре, ӝегатскыны тупа ке, жингыртӥськом гинэ. Но гурт калык уйин али но жингыртэ, куара кылзоно ук, ог-огедлы юрттытэк улыны нокызьы уг луы.

— Гуртысь ветеринар со психолог но, лыдъяськись но, эмъясь но, филолог но. Туала адямилы туж бырйиськыса вераськоно, мултэссэ вератэк, пудо кузёослы чурыт вазьытэк. Но котькуд ужын аслаз шумпотонъёсыз но луыло, кылсярысь, выль адямиосын тодматскон. Аслэсьтыд уждэ рос-прос лэсьтӥськод ке, мылкыд но ӝутӥське, ужаны стимул но тросгес луэ. Соин егит ӧнерчилы но пӧртэм югдуръёслы дась луоно, ужмы капчи ӧвӧл, льӧль малпанъёсын улыны уг тупа, — огкылысь верало ӧнерчиос.

— Вераськемды понна бадӟым тау, ужъёсады азинсконъёс гинэ мед луозы!

Туспуктэмъёс: Юлия Щербакова, Александр Уськеев