Хезмәт

Пукро – сӥзьыллэн праздникез

14 октябре асьмеос пусйиськом Пукроез — бадӟым черк праздникъёслэсь одӥгзэ.

Историысь
Инмар Анайлэн Покровезлы сӥзем нунал асьме дорын сӥлы кариське. Вашкала ӟуч музъем вылэ со Византиысь вуиз но тужгес данъямонэз праздник луиз. Ас выжыосыныз та праздник туж вашкала дыръёсы кошке. 910-тӥ арын со дыре бадӟым но дано город луись Константинополез сарацинъёс киултыны выриллям. Нокин ӧвӧл оскем ини, тушмонлэсь мозмытскыны быгатозы шуыса. 14 октябрь азьын городын улӥсьёс, вань осконзэс ыштыса, храме люкаськиллям. Соос жадёнэз тодытэк вӧсяськыны кутскиллям — шӧдтэк шорысь вӧсяськись калык йылын Инмар Анайлэн тусбуйыз кылдэм. Со котыртэмын луэм кылчинъёсын. Инмар Анай бӧрдыса вӧсяськем калык понна, сое утьыны курыса, вазиськем Ин Эксэйлы. Адямиослы та зэмос паймон луэм! Собере йыр вылысьтыз шобыретсэ басьтыса, сое адямиос вадьсын вӧлъям, таин соосты утем. Та паймымон учыр бере тушмонъёс город дорысь кошкиллям — со утиськыса кылем. Вашкала веранъя, Инмар Анайлэн шобретэз сайкыт пиштэм, солэн сиосыз шундылэсь но югытгес вылӥллям, нош со нуналэ храмын луэм калык каньыллык шӧдэм. Ӵапак со нуналысен ик оскись муртъёс шобретлы юрттэт курыса вазиськыны кутскиллям, со котькыӵе шуг-секытын соосты шобыртыса утёз шуыса оскиллям.

Инмар Анайлэн православной дӥсез со черкын утиськем: ризаез, йыр вылысьтыз шобыретэз но кускерттонэзлэн люкетэз. Шобыретэзлэн кужмыз зэмзэ но пумтэм юн вылэм, котькуд оскись муртлы со юрттыны быгатэм. Та быдӟым учырез тодазы возись оскисьёс сое дун-чылкыт праздникез кадь пусйыны кутскиллям. Уно аръёс ӟоже со пӧртэм социальной статусэн пӧртэм ӧнерысь адямиослы, огкадь нылкышноослы но, воргоронъёслы но матын луись пумтэм трос сямъёсты люкам.

Ӟуч Черкын Пукро нунал XII даурысен пусйиське. Со нуналлы сӥзьыса, 1165 арын Владимирской князен, Андрей Боголюбскиен, тужгес чеберез православной храм ӝутэмын вал — «Покров на Нерли» нимо черк.

Пукро сямъёс но тодметъёс
Вашкала ӟучъёслэн Пукро нунал сӥзьыллэн праздникеныз лыдъяськем. Калык верамъя, соку сӥзьыл толэн пумиськем. Праздниклэсь нимзэ но музъемез шобыртӥсь нырысетӥ кынтэмен, пужмерен герӟаллям, та ик нырысетӥ кезьытлэсь вуэмзэ ивортон но луэм. Праздник азьын йылпумъяно вылэм музъемен, юртэз шуныт каронэн герӟаськем вань ужъёсты.Та дырысен коркаез эстыны кутскиллям, нылкышноос черсыны но куиськыны пуксиллям.

Озьы ик Пукро нуналлы кузёкышноос уногес табань пыжыны но пукро нянь колды (каравай) дасяны тыршиллям. Но табань ӝӧк вылэ вуытозь нырысь, соин коркаез котыртыса, Инмар Анайлы вӧсяськоно вылэм. Пукро няньлэсь юдэсъёс ке кылиллям, соосты Быдӟым Кӧсутён дырозь утиллям. Та нуналэ выль урожайлэсь мукет трос пӧртэм сиёнъёс дасяны тыршиллям.

Гурт хозяйство понна та дыр тол сезонлэн кутскемез луэм. Пудолы тырмыт сиён дасяса, соосты кыре ӧвӧл поталлям ини. Калык сямъя, та дырлы вань пудоез тулыс вуытозь азбаре пыртыса, со толбытскын медаз восьмы шуыса, сомында турын сётоно, пе, кӧня со сутка ӵоже сиыны быгатэ. Та дыре ик муш бакчаосты но пытсаллям. Кутскылӥллям сӥзьыл ярмаркаос но мукет вузкарон.

Праздник бере уно сюанъёс шудӥллям. Та нуналэ макем трос лымы луиз, сокем уно со арын сюанъёс но луозы шуыса лыдъяллям. Озьы ик 13 октябрьысен 14 октябре выжон уйе егит нылъёс вуоно картсэс тодон понна тунаськиллям но Инмар Анайлэсь умой кузпал шедьтон сярысь куриллям. Та нуналэ уг яра вылэм курасьёслы отказ сётыны, собере куинь ар ӵоже бызьытэк кыльыны луэ шуыса. 14 октябре пичи нылпиосты ӧс янакын пуж пыр вуэн пылатиллям — озьы соосты быдэс арлы висёнъёслэсь утиллям.

Та празднике Инмар Анайлэсь куректонлэсь, кайгулэсь утемзэ, висись нылпилэсь тупатскемзэ курыны луэ.

Мар уг яра карыны
Нимысьтыз чурыт алонъёс та нуналэ уг пуктӥсько, но, мукет черк праздникъёс дыръя кадь ик, уг яра «кырсь» ужъёсты быдэсъяны: утялскыны, мисьтаськыны, вуриськыны но пужыятӥськыны но мукетсэ. Озьы ик уг яра керетыны, тышкаськыны, спирто юонъёсты юыны, озьы ик пунэмен коньдон сётыны кенеш уг сёто.

Кулэмъёсты буре ваён
Пукро азьын субботае куд-ог палъёсын тодэ ваё кулэм муртъёсты. Черк уставъя со поминка уг луы, но калык та нуналэ черке лыктыса вӧсяське но собере шайвылэ мынэ, та дуннеысь кошкемъёсты буре ваё. Кулэмъёсты буре вайыку вӧсяськыса, тазьы верано:

«Кузё-Инмаре, буре вай кулэм муртъёстэ: (адямиослэсь нимъёссэс верано) — ваньзэс та дуннеысь кошкем выжы-кумыосме, иськавынъёсме, эшъёсме-матысьёсме, Атыкай музъемез утьыса оже быремъёсты — вань кулэм православной христианъёсты. Соослэсь тодыса но тодытэк, ас эриксыя но эриктэм лэсьтэм вань сьӧлыкъёссэс кушты но пумтэм вапумъёс ӵоже каньыллыко улон азяд дун-сьӧлыктэмъёсын огазе интыя (кирос карыса йыбырттоно)».

 

Статья Интернет источникъёсын пайдаяськыса дасямын.

Реклама
Теги: Покров
Нравится
Поделиться:
Реклама
Комментарии (0)
Осталось символов: