Рамиль Валиев: «Кытын вордӥськид, отын ик кулэ луиськод» (фото)

Нимысьтыз ӧнер праздник луыса та нунал 2002-тӥ арын тодмостӥськиз. Озьы ке но, «калыкен юн кусып возьыса ужасьёслы» та нуналэ шутэтскон ӧвӧл — службазы азьлань мынэ.

Полициысь участковой уполномоченной — данъяськымон но чурыт кылӥське. Соин участковойлэн интыужез валтӥсен но кулэ луисен лыдъяське, малы ке шуоно юрттэт понна нырысь ик калык со доры вазиське. Туала участковой — со эшшо калыкез катчаклась ёзэтъёсын (правоохранительной органъёсын) герӟась ӧнерчи. Соос уйиськонэ но, юалляськонэ но, йыружъёсты эскеронъёсы но пырисько. Одӥг кылын вераса, кунпуш ужъёсъя министерстволэн троспӧртэмлыко (универсальной) ужасьёсыз луо. 

Календарьлэсь бамъёссэ берыкъяку ӧнер праздникез адӟиськод ке, йыре соку ик кема ужась адями лыктэ. Бен, опыт люкам ужасьёс — данъяськымон адямиос, но со дыре ик егитъёсты но палэнтоно ӧвӧл, соос — улонэз азинтӥсьёс, ужазы выль амалъёсты пыртӥсьёс, соин ик соослы секыт ужъёсты быдэстыны оскыны кулэ. Ивор вӧлмытон ёзъёсысь егитъёслэн вормонъёссы сярысь лыдӟиськод ке, азьланезлы оскон эшшо но будэ, юнма. 

Туала дыре участковойлэн ужез кун пушкысь радлыкез утёнын бадӟым инты басьтэ. Соос нуналлы быдэ пӧртэм учыръёсын пумисько но кылдэм югдуръёсты капчиен сэрттыны-пертчыны быгато. Калыкен ялан сямен вераськон, котькуд жингыртэмъя сак луон, праздникъёстэк но шутэтскон нуналъёстэк ужан, гуртъёсысь калыкен огкылысь улон, адямиослэсь малпанъёссэс гажан, тодмотэм муртлэсь югдурзэ матэ карыса быдэстон — ваньмыз та участковойлэн пельпумъёсаз выдэ. 

Сыӵе ӟеч сямо ик луэ егит участковой уполномоченной — Рамиль Шамилович Валиев. Ас интыужаз со 2022 арысен гинэ тырше на, озьы ке но одӥг ар куспын ассэ тыршись, капчи мылкыдо ужасен возьматӥз, калыкын но, ӵош ужасьёсыз пӧлын но гажамон адями луиз. Егит, чупрес, сюлмо, лякыт вераськись, ӟеч сямо, эшлыко, юрттыны котьку дась — ваньмыз та статьялэн героез сярысь. Огшоры кылъёс ӧвӧл та, зэмос калыкен юнматэм веран. 

Котькуд адямилэн аслаз ужан графикез вань: кин ке кык нунал ужаса, кык нунал шутэтске, кин ке тямыс часысен вить часозь ужзэ быдэстэ, кин ке вахта амалэн ужа, нош эрикрадлыкез утён удысын ужасьёс шутэтсконэз льӧль малпанъёсазы гинэ адӟо. 
Гуртын ужанлэн спецификаез пӧртэм пумо но яркыт буёло: нюлэс пушкын йыромем адямиез утчанысен гурт тылобурдоез эскерон но бускель садэ пырем сюро таза пудоен «вераськонозь». Туж тунсыко, озьы ук? Та ужлэн валтӥсь тӥрлыкез — калыкен вачевераськон, кудӥз котькуд адями понна секытэн сётӥське, куддыр адеквато луисьтэм адямиосын пумиськонъёс но кылдо.

Лейтенант Валиевлэн ужан нуналэз котьку пӧртэм сямен кутске: планёркаос, нарядъёс, дежурствоос, вызовъёс — котькуд нунал аспӧртэмлыко но малпаны луонтэм. Инструкциос но информация басьтыса, егит лейтенант аслэсьтыз «возёсъёссэ» эскерыны потэ. 
Куд-ог удмурт гуртъёсысь калык понна та егит пияшлэн нимыз тодмо ни: соин герӟасько котькуд кат паласен кылдэм учыръёссы.

Рамилез адӟоно луиськиз уждураз но, шутэтскон нуналъёсаз но (та вакытэ но гуртъёссэ синйылтыса кошке). Та ужась сярысь гожтон малпанъёсы кемалась кылдӥллям вал ини. Одӥг ӝытэ солы гожтӥ но, ответсэ кема витёно ӧз луы, соку ик соглаш кариськиз: «Мыным аслым но туж тунсыко. Адямиослэн мон сярысь малпанъёссэс шараямзы ӟеч мылкыдъёс гинэ кылдыто». Котькуд юанлы мылысь-кыдысь валэктон сётӥз, одӥг нуналэн гинэ пумиськонмы ӧз быры, телефон пыр но куд-ог юанъёсты шонеръяно луиз. 

Нимысьтыз вераськонмы ужан нуналаз ик тупаз, соин ик калыкен вераськемзэ но ужамзэ меӵак адӟыны быгатӥ. Со котькуд ужрадъёсын одно ик ужаны кутэмын луэ. Егит луыса, аслэсьтыз ужзэ рос-прос лэсьтыны быгатэ, котькуд учыре калык понна умой карыны тырше. Соин но, дыр, сое гажало пиналэз но, егитэз но, арлыдоез но. Ваньмыныз огъя кыл шедьтыны быгатэ, капчиен вераськон мытэ.

Рамиль Шамилович 1996 арын Балтась каргуртын шоро-куспо семьяын вордӥськиз: анаез — архив ужын тыршись, атаез — водитель-экспедитор. Семья — со инты, кытын дунлыкъёс вордӥсько, котыр дуннеен кусыпъёс юнмало. Шудо семья — котькуд нылпилэн шудо улон сюрес кутсконэз. Рамильлы но удалтӥз: вордэм борддоръёсызлэн шунытэз вордскем шаерезлы юн яратон пыӵатӥз. Озьы ик анай-атаезлы, сузэрезлы но юн пыкет луиз со: котькуд ужын воштонтэм юрттӥсь. 

— Пинал дырды сярысь рос-просгес вералэ вал, радлыкез утён мылкыд пичи дыръёсады ик кылдӥз-а?

— Пинал дыр котькуд гуртысь пияшъёслэн кадь ик ортчиз ини, пӧртэмлыкез ӧй вал. 2002 арын Балтась гимназие нырысетӥ классэ дышетскыны пыри. Шоро-куспо дышетски ке но, котьку зэмлыкез но шонерлыкез утьыны тырши. Дышетскон предметъёс пӧлысь география, история, обществознани предметъёсты висъясал. Туж тунсыко потэ вал пӧртэм кунъёсты эскерыны, вашкала улонэн тодматскыны, оглом дуннеысь кунъёслэн ог-огенызы кусып воземзэс дышетыны. Собере дышетскон сюресме Казаньысь кооперативной институтэн герӟай, «Таможенное дело» ӧнеръя тодон-валан басьтӥ.

2019 арын йылпумъяй но «Специалист-таможенник» луи. Азям улон сюресме азинтон юан пуксиз: ма кароно? Пумаз-йылаз валаса уг вуттӥськы вал зэмос мылкыдъёсме. Озьы, 2019 арын ик армие кошки. 2019-2021 аръёсы контракт амалэн Киров улосвылысь Мирный каргуртын службаме ортчи. Водитель-заправщик луыса служить кари. Ужме котьку пайдаё но ӟечлыко лэсьтыны тырши. Татын азьпал улонме полициен герӟан пумысен юн малпан кылдӥз. 

— Малы карын ужанэз гуртысь ужен воштоно кариды? 

— Тодӥськоды-а, калыкын вань тодмо веран — «кытын вордскид, отын ик кулэ луиськод». Мон понна мур пуштросо кылъёс та. Бен, городэ кошкыса ужаны луонлык вань вал, радлыко мынӥсь графикен уж шедьтыса, улонэз азьланьтыны. Но гуртысь улон бордаз юн кыске, эшшо пӧртэм технологиос нуналлы быдэ паськыт вӧлмо. Гуртысь инкуазез нош учкид ке! Сэзь нунал, чылкыт омыр, паськыт бусыос, кышкыттэм ветлоно сюресъёс, ас киын будэтэм бакча емышъёс. Ужамъя ужам потэ! Но валтӥсез — семьялы матын луон, мӧйыос асьмелэсь юрттэтмес возьмало: улон кема уг кыстӥськы, соин ик матэ луыны кулэ соослы, котькуд ваньмон дырез матысьёслы сӥзёно. Вашкала дыре озьы ик луэм ук: бадӟым семья, котькудӥз аслэсьтыз ужзэ быдэсъям, дэмен тыршиллям, ужъёс но капчиен лэсьтӥськиллям. 

Егит пилэн таӵе малпанъёсыз туж паймытӥзы: ваньзэ лад-лад вераз, рос-прос валэктӥз. Тросэз егитъёс туала вакытэ карысь улонэ выжыны тыршо. Бен, отын ужъёс каньылгес, гуртысь ужан вакытэн ӵошатонэз ик ӧвӧл. Асьме ёросысь егитъёслэн котькудӥзлэн таӵе малпанъёссы луысалзы ке, гуртъёс сяськаясалзы но йылысалзы! 

— Кӧня гуртъёс понна тӥ туннэ нуналлы кулэ луиськоды? 

— Туннэ нуналэ мон 8 гуртъёсын ужасько: Бурбаш, Бурбаш Сардыган, Алан, Бурнак, Янгул, Вуж Кушкет, Починка, Вуж Турья. Огъя ужан территорие бадӟым ке но, котькуд гуртлы саклык висъяно луэ, калыкен тодматсконо, котькудаз гурт клубъёс яке лулчеберетъя юртъёс, нылпи садъёс яке школаос, соосты но эскероно, ужтэк пукыны дыр ӧвӧл. 

Зэмзэ но, ужзэ яратӥсь лейтенант ужудысэз шоры бадӟым кылкутонэн учке: семинаръёсы пыриське, калык пӧлын пӧртэм профилактической вераськонъёс нуэ, егитъёсын огкылысь тупаса улэ, дышетскись пиналъёслы но ужзэ валэктыны дыр шедьтэ.

— Маин ужды кельше но мукетъёсызлэсь пӧртэмгес луэ? 

— Нырысь ик со адямиосын вачевераськон. Кыкетӥез — адямиослы юрттон. Умой мылкыдъёс кылдо, куке юрттэмед пайдаё луэ. Котькуд кылдэм юанъя соку ик пумкылъян (решение) шедьтыны тыршисько, милесьтым адямиос юрттэт но валан витё ук.

— Кылсярысь, кылдо ук учыръёс, куке тӥ мукет ужъёсты быдэсьтӥськоды, та учыре адямиос юрттэт кема возьмано луо-а?

— Та нимысьтыз юан. Милям котькудмылэн опорной пунктмы вань, но одӥг адресъя ми ум пукиське, котьку кыӵе ке гуртын информация люкаськом, эскериськом, следовательёслы, оперативникъёслы юрттӥськом, завлениосты люкаськом. Секыт югдуре вуэм адямилы котьку юрттыны тыршиськом, со юрттэт шӧдскымон бадӟым ӧз луы ке но, адямиос валаны кутско: соос понна сюлмасько, обидьыны уг сёто, ӝутскем мылкыдъёс соослы пӧртэм пумо вормонъёсы вутскыны но юртто.

Котькин тодэ, туннэ нуналэ ми понна эшшо одӥг уж ватсаськиз: ожгар комиссариат дорысь мерлыко радлыкез утён, но милям валтӥсь ужмы вылын та уродэн уг шӧдӥськы, огдышем сямен ик ужаськом. Ӝог быдэстоно ужъёс кылдӥзы ке, милям котькудмылэн напарникмы вань, со котьку юрттыны но адресъя мыныны дась. Ми понна «тынад» яке «мынам» территориосмы ӧвӧл, луонлык кылдон вакытэ ог-огмылы информация сётӥськом. Ог-огмылы юрттон милям ужамы воштонтэм луэ.

— Туннэ нуналэ егитъёслэн фильмъёсын но сериалъёсын туж трос кумиръёсыз. Тӥляд сыӵе кумирды вань-а? 

— Нимысьтыз кумиръёсты висъяны уг быгатӥськы. Котькуд адями аспӧртэмлыко, урод яке ӟеч палэз котькуд адямилэн вань. Лыз экран вылын ваньмыз умоен возьматэмын, но котькудмы валаськом ук: кино — со улон ӧвӧл, дугдытыны ум быгатӥське, янгышъёс вылын дышетсконо луиськом.

— Тӥляд ужды удмуртъёсын но, бигеръёсын но, ӟучъёсын но герӟаськемын. Та пӧртэмлыкъёс ужады шуг-секытъёс кылдыто-а? Калыкъёс ог-огезлэсь висъясько-а?

— Калыкез ог-огезлэсь висъяны луэ шуыса вераны уг быгатӥськы. Нырысь ик, дунне вылын ваньмы адямиос. Кыкетӥез — калыкъёсты висъяны уг яра. Шудтэм учыр калыкез уг бырйы, йӧскалык шоры учкыса ужад ке, со одно ик берытскоз, нош милемлы, калыкез утисьёслы, котькуд учыре адямиен валче ужаны кулэ.

— Шутэтскон дырдэс нош кызьы ортчытӥськоды?

— Зэмзэ вераса, милям ужмы шутэтскон дырен «мултэс уг эркея». Вань дырмес калыклы сӥзиськом. Милям ужан дырмы эсэпъямтэ (ненормированной), соин ик ми адямилэсь каньыл улонзэ утисьёс. Адямиослы валаны кулэ: милям уг поты калыкез янгыше уськытэм, кышкатэм, котькуд вуэм иворез ми одно ик эскериськом. Милесьтым кышкано ӧвӧл, ми котьку кылзыны, визьнод сётыны дась. Калык милемын тупаса огкылысь гажаса улӥз ке, ми но котьку юрттыны дась луомы. 

— Вераськемды понна бадӟым тау, Рамиль Шамилович! Тӥледлы азьланяз но дэлето ужан сӥзиськом, валась калыкен валче ужаны.
Кунпуш ужъёсъя ёзэтъёсысь егит ужасьлэн пальышась ымнырыз шоры учкыса, соку ик малпан кылдэ: аслэсьтыз ужан удыссэ шонер быръем та пияш. Кулэ дыръя со ассэ чурыт возе, котькуд адямиен огъя кыл шедьтыны быгатэ, вылтӥяськон сямыз ӧвӧл. Рамиль чурытлык но шонерлык вискын баланс шедьтыны быгатэ, тае гуртын улӥсьёс но пусъё. Адӟиське: погонъёсысь кизилиос понна уг тыршы, аслэсьтыз ужзэ шонер но сюлмысь быдэсъя, данъя но яратэ, нош ужез яратон — со зэмос шудбур!

Рамиль Шамиловичез, вань участковойёсты, ветеранъёсты но та удысэн герӟаськемъёсты ӧнер праздникенызы ӟечкыласьком! Сӥзиськом ужазы азинлык, каньыл ужан нуналъёс но юрттыны дась луись эшъёс. Дорады матысь яратоно адямиосты мед возьмалозы, тазалыкты ноку медаз уродмы, нош ваньбурды мед йылоз. Адямиос но югдуръёс тӥледыз ноку медаз чигтэ!