Шаерамы 14-тӥзэ «Бадӟым удмурт диктант» акция ортчиз

12-тӥ оштолэзе шаерамы 14-тӥзэ «Бадӟым удмурт диктант» шуыса нимаськись Улосвылкуспо дышетон акция ортчиз. Туэ ужрадэз Атыкай музъемез утисьлэн арезлы но Быдӟым Атыкай ожын Вормонлы 80 ар тырмонлы сӥзизы.

Таяз радэ текстлэн авторез луиз Удмуртилэн Кун премиезлэн лауреатэз, Россиысь писательёслэн Огазеяськонзылэн ёзчиез но кунысьтымы журналистъёслэн Огазеяськонзылэн ёзчиез — Владимир Михайлов. Со диктантлы «Ӧрӟи» текстэз дасяз, кудӥз сӥземын вал Быдӟым тыложе пыриськем муртлы, Можга ёросын вордскем Пётр Бабкинлы.

Туэ Россиын Удмурт диктант гожтон понна 200-лэсь трос площадкаос усьтэмын вал но акцие 2 сюрс пала адями пыриськиз шуыса тодмо. Диктант, котьку сямен, кык форматэн радъяськиз: очной но заочной (радиодиктант). 

Котькуд аре сямен ик диктант гожтонэ Удмуртилэн палэназ — Татарстанын, Марий Элын, Башкириын, Киров улосын, Пермь шаерын, Москваын, Санкт-Петербургын — улӥсьёс но пыриськизы, соос пӧлын Балтась ёросысь удмуртъёс но. Покчи Лӧзя, Шор Кушкет но Ципья шоръёзо школаосын та нуналэ ужазы нимысьтыз площадкаос. Огъя Балтась ёросын 45 мурт удмурт кылын диктант гожтӥз. 

Тодэ вайытон вылысь, диктантэз Удмурт кун университетысь удмурт кылосбуръя, финно-угроведениея но журналистикая институт, «Удмуртия» телерадиокомпания, Удмурт Элькунысь Йӧскалык политикая министерство радъяло.
Диктантлы йылпумъянъёс лэсьтэмын луозы куартолэзе. Бератаз котькуд пыриськись йылпумъянъёсын нимлыко сертификатсэ скачать карыны быгатоз.