Хезмәт

Балтач районы

18+
2024 - Гаилә елы
Азьлане

«Сётэм вире 13 муртэз кулонлэсь утиз»

Тазьы шуэ Василий Анисимов, «Россиысь почётной донор» нимез нуллӥсь аспалмы

Арлы быдэ асьме шаерамы 20-тӥ оштолэзе Донорлэсь нуналзэ пусъё. Та праздник сӥземын соослы, кинъёс тодмотэм адямиослы юрттон понна вирзэс но вирзылэсь кизер люкетсэс (плазмазэс) бушын сдавать каро.

Донорлэн нуналэз — асьме аспалмылэн, Ӟаны гуртысь Анисимов Василий Мефодьевичлэн, одӥгез валтӥсь праздникез шуыса гожтыны шонер луоз, дыр. Малы ке шуоно со — «Россиысь почётной донор» гадьпусэн но сое юнматӥсь книжкаен пусъем аспалмы. Со — сюлэсь тросгес пол вирзэ сдавать карыса, трос муртлы юрттэм адями. Донорлэн нуналэзлы сӥзьыса, Василий Мефодьевичен пумиськимы но солэн улон-вылонэз сярысь вераськимы.

«Вордскем дырысен, 1959-тӥ арысен, Хутор урамын улӥсько» 

Тазьы ачиз сярысь вераны кутскиз Василий Мефодьевич. Василий Анисимов 1959-тӥ арын Ӟаны гуртын калыкын Хутор шуыса нимаськись пичи гинэ урамын вордскем. Анаез гумыраз агроном луыса ужам (нялтас вераса, 92 аресъем Анна Дмитриевна туннэ нуналэ но Василий пиезлэн семьяеныз ӵош улэ), атаез Мефодий Васильевич тракторист луэм. Василий, семьяязы одӥг гинэ пи луэм бере (кык апайёсыз но кык сузэръёсыз луиллям), пичи дырысеныз атаез борды кыстӥськем.

— Атае монэ котьку сьӧраз ветлытӥз. Гырыкуз но, кизён ужъёсын вырыкуз но мон со вӧзын вал. Уйин сменаосын ужакуз но монэ сьӧраз басьтылӥз. Пичи дырысен солэсь ужзэ тодыса, адӟыса будэм бере, аслэсьтым улонме но техникаен герӟаме потӥз. Соин, Ӟаны школаысь 10-тӥ классэз йылпумъяме бере (пусъеме потэ, школаын мон умой дышетски, военной подготовка ласянь дышетӥсьёслы но юрттылӥ), Урняке автослесарьлы дышетскыны кошки. 1976-1977-тӥ аръёсы дышетскыса, гуртэ бертӥ но колхозамы (соку со «Дружба» шуыса нимаське вал) «ДТ» гусеничной тракторен ужаны кутски. Озьыен, малпанэ быдэсмиз — мон, атае кадь, техникаен ужаны кутски, — вера Василий Мефодьевич.

Кӧня ке толэзь ӵоже колхозын тыршемез бере, Василиез арми радъёсы служить карыны басьто. Службаез Закарпатьеын пограничной войскоосын ортче. Кык арез ӝог ортче но Василий, вордскем палъёсаз берытскыса, нош ик «ДТ» тракторлэн рулез сьӧры пуксе.

— Атаелы соку ужаны выль «ДТ» трактор сётӥллям вал, но со, арлыды вань ини шуыса, выль техниказэ мыным оскиз. Мон шумпотыса со тракторен ужаны кутски, — азьланьтэ веранзэ пиосмурт.

1983-тӥ арын Василий Мефодьевич Тагашур гуртысь Светлана нимо нылэн кузпалъяське. Света апай Кутэш фермае ужаны ветлэм, отын ик егитъёс тодматскиллям.

Кызь ар ӵоже «ДТ» трактореныз тырше механизатор. Техниказэ ачиз радъя, учке, кулэ луиз ке тупатэ но вал. Но тракторез «пересьмем» бере, техниказэ списать каро но Василий Мефодьевичез скал кыскыны интыяло.

Механизаторысь — скал кыскисе

Кема аръёс ӵоже механизаторлэсь ужзэ быдэсъяса ужась воргоронлы пудоен ужаны кутсконо луэ.

— 2000-тӥ арысен скал кыскыны кутски. Аръёс сыӵе вал — ужасьёс ӧй вал, соин колхозын котькыӵе ужез ужаны кулэ луылӥз. Ма, мон скал кыскыны пумит ӧй луы — гумырам пудо вордэм бере, та ужлы мон дышемын вал ини. Вылаз ик, кышное Светлана Дмитриевна но фермаын скал кыскиз, соин ӵош ужаны кутскимы. Озьы тӥни кӧня ке ар ӵоже ужаме бере, выльысь техникаен ужаны кутски — нош ик «ДТ» трактор сьӧры пукси. Зэмзэ верано ке, колхозын кыӵе гинэ ужъёс ӧй вал, троссэ соос пӧлысь ужаса ути — парсьёсты но сюдӥ, вукозэ но изӥ, скал кыскисьёс дорын оператор луыса но ужай. Пӧртэмез луиз, огъя вераса. Но тросгес ужан дыры техникаен, шонергес вераса, «ДТ» тракторен ортчиз. 2019-тӥ арысен дано шутэтсконын луисько ини, — азьланьтэ веранзэ Василий Мефодьевич.

«Вирме сётыны мон котьку дась»

1976-тӥ арысен кутскыса туннэ нуналозь, Василий Мефодьевич 121 пол вирзэ сётэм ини. 10 сентябре 2007-тӥ арын, 60 пол вирзэ сётэмез бере, сое «Россиысь почётной донор» гадьпусэн но книжкаен пусъё. Нош нырысетӥзэ Василий Мефодьевич вирзэ 1976-тӥ арын сётэм. Соку со 10-тӥ классэз йылпумъям пияш гинэ луэм али.

— Со аръёсы котькуд колхозлы вир сётонъя план пукто вал. Соин ми соку, колхозын ужасьёс, тросэз вирмес сдавать карыны мынӥмы, медпунктэ мынон понна милемлы нимысьтыз автобус но висъязы. Со нырысетӥ вирме сётонэ луиз. Со дырысен, 1976-тӥ арысен, вирме сётэмысь мон ӧй дугды ини. Армиын служить карыкум гинэ но вирме сётылӥ, — тодаз вае воргорон.

Василий Мефодьевичлэн вирызлы дефицит луэм. Соин солэн вирез ас дыраз трос адямиослы кулэ луэм. Та сярысь воргорон шумпотыса вера.

— Сётэм вире 13 муртэ кулонлэсь утиз. Азьло 500 мл вирез басьто вал ке, туннэ нуналэ 430 мл гинэ басьто. Юрттэм адямиосты но ваньзэсты тодӥсько мон. Шумпотӥсько, вире кинлы ке юрттыны быгатӥз шуыса. Донор кадь учётын сылӥсько вал бере, нуналлэн котькуд дыраз, кулэ луыкуз, вир сётыны куро вал. Мон котьку дась луи.

Василий Мефодьевич вирзэ али но сётыны дась. Кылем арын гинэ но кык пол сдавать карем — тулыс но сӥзьыл. Туэ но сётыны малпаське. Уг юы, тамак уг кыскы — малы бен сётонтэмез?

— Быгатыку, адямиослы юрттыны тыршисько. Вань гумыре адямиослы юрттыса ортче — ужын но, улонын но. Мынам вире кинлы ке юрттыны быгатэ бере, мон сое шумпотыса сёто. Гуртоосы кыӵе ке куронэн вазисько вылэм — соослы но ноку отказ сётэме ӧвӧл. Адямилы адями луыны кулэ, — шуэ со.

Мӧзмыны дырыз уг луы

Пенсиын шуыса, Василий агай тэк пуконэз уг вала. Гуртаз со пудо вордэ, нюлэскы ветлыны, губияны, узы-боры люканы яратэ. Со сяна, Василий Мефодьевич мызганэн но шудыны яратэ вылэм — сюанъёсын, пиосты армие келян ӝытъёсын, пересь юонъёсын со ӵемысь куно луэ. Туннэ нуналлы, пе, кызь кык сыӵе ӝытъёсы пыриськи ини.

— Кема аръёс ӵоже колхозын ужай ке но, техникаен улонэ герӟаськемын вал ке но, пенсиын мынам мӧзмыны дыры ӧвӧл. Гуртын мӧзмыны дыр луоз шат? Одӥг ужез быдэстӥськод, кыкетӥез ватсаське. Сое гинэ йылпумъяськод, куинетӥез уж пӧрме… Тӥни озьы ик улӥськомы, — маде Василий Мефодьевич.  Василий Мефодьевич но Светлана Дмитриевна Анисимовъёс вить нылъёсты вордӥллям — Елена, Лариса, Наталья, Марина, Дарья. Туннэ нуналэ вить внукъёсынызы но ушъяськыны быгато кузпалъёс. Ӟаны гуртын вить ӵошен — кык нылъёсынызы но Василий агайлэн анаеныз — соос тупаса, эшлыко семья луыса уло.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Ӟаны Ӟаны гурт донорлэн нуналыз Василий Анисимов