Шудо анай, песянай но кузпал

Надежда Антонова —

семьялэн шунтӥсез

Выжы юртсылэсь шунытсэ утись, ӵыжы-выжыоссэ гажась, гуртооссэ матын карись, котьку юрттыны дась луись — сыӵе кузё кышно пумитаз монэ Сизнерын, Надежда Николаевна Антонова. Юнме гинэ Надя апай сярысь сыӵе малпанъёсы кылдымтэзы вылэм — со сярысь пиосыз но, кенъёсыз но туж ӟеч кылъёс гинэ веразы. Каньыл, лякыт нылкышно луэмез, зэмзэ но, соку ик шӧдӥськиз.

Надежда Николаевна 1953-тӥ арын Сизнер гуртын вордскемын. Анай-атаез но гурт адямиос луиллям, кыкназы ик вал сюдӥсь луыса ужаллям. Атаез кӧня ке дыр ӵоже колхозэн но кивалтэм. Семьяязы соос ньыль кузя нылпи луо, Надя апай — самой покчиез. Солэн агаез но татын ик, гуртын улэ. Одӥгез апаез Калининоын, кыкетӥез — Ушмаын. Школазэ йылпумъямез бере (4-тӥ классозь Сизнерын дышетске, 8-тӥ классозь — Ципьяын), Балтасьысь мех фабрикае ужаны интыяське, со дыре ик вечерней школаын дышетске, отын 11-тӥ классэ йылпумъя.

— 1968-тӥ арысен ужаны кутски шуыны кулэ ини. Вить ар ӵоже Балтасьын вуриськись луыса ужаме бере, Ципьяысь мех фабрикае ужаны интыяськи, отын но куать арлы матэ тырши. Соку туала дыре кадь машинаос трос ӧй вал бере, уже ӵемысь пыдын ветлыны тупаз, куддыръя ортчись машинаос пуктылӥзы, — ортчем аръёссэ тодаз вайыса вера кышномурт.  — Собере надомница луыса ужай — мукет сямен вераса, дорын вуриськыса, вурем арбериосме мех фабрикае нуллӥ.

Берлогес Надежда Николаевна гуртысьтыз магазинын выж миськыны кутске, ачиз ик оператор но луэ. Колхозын но ужаны вутске со — больничнойын луэмъёсты, отпуске шутэтскыны потэмъёсты вошъя. Табере тани дас куинь ар ини со дано шутэтсконын.  

Кытын вордскизы,

отын ик кулэ луизы

Антоновъёс — ваньзы Сизнер гуртысь. Надежда Николаевналэн кузпалыз, Михаил Серафимович, кылсярысь, бускеляз гинэ улэм. Соин соос пичи дырысенызы ог-огзэс тодӥллям, валче будӥллям шуыны кулэ.

 — Кузпалэ, 8-тӥ классэ йылпумъямез бере, Можгае каменщиклы дышетскыны мынӥз. Дышетсконзэ йылпумъям бераз ӧжыт ужаз, собере сое армие басьтӥзы. Кык ар ӵоже мон сое армиысь вити. 1974-тӥ арын ми кузпалъяськимы, сюан ортчытӥмы, — шуэ Надежда Николаевна.

Михаил Серафимович ассэ кӧня ке интыужын эскерыса уте: гуртысь фермаын но ужа, Ципьяысь сельхозтехникаын но тырше, берло дас вить арзэ, пенсие потытозяз, Смаиль гуртысь школаын оператор луыса ужа.

Антоновъёслэн кык пиоссы — кык оскымон юрттӥсьёссы вань. Бадӟымез, Иван, 1977-тӥ арын вордске, со нимаз ужбергатӥсь. Озьы ик Смаиль гурт поселенилэн депутатэз но со. Кыӵе ке праздникез яке гуртэз чылкытатон, чебертон ужрадъёсты радъясез но со. Покчиез Валерий вордскемын 1979-тӥ арын. Кыкназы ик воргоронъёс парзэс кыдёкысь уг утчало — Сизнер гуртысь ик шедьто. Иван Михайловичлэн кышноез, Людмила, гуртысь клубын тырше. Кузпалъёслэн куинь нылпизы вань — Андрей (туннэ нуналэ арми радъёсын служить каре), Анна (школаын дышетске), Арсений (нылпи садэ ветлэ). Валерий агайлэн кышноез, Светлана, озьы ик Сизнерысь. Кыкназы ик кузпалъёс Смаиль гуртысь фермаын тыршо — Светлана скалъёсты кыске, Валерий — пудо утись. Соослэн но нылпиоссы куинь — Артём (Яныльын механизаторлы дышетске), Полина (школаын дышетске), Максим (туэ нырысетӥ классэ мыныны дасяське).

Нылпиосыныз, кенъёсыныз, внукъёсыныз туж данъяське Надежда Николаевна. Солэн данъяськыны мугез зэмзэ но вань, одӥг гинэ но ӧвӧл. Пиосыз но, кенъёсыз но йӧноесь, ужасесь, семьязы понна котьма карыны дась, гурт калыксы понна сюлмасько, нылпиоссэс умой вордо, анай-атайзэс гажало. Кенъёссэ, Людмилаез но Светланаез, нимысьтыз ушъя Надя апай. Соос котьма ужаны но вутско, нылпиоссэс но утё, пудо но вордо. Куспазы туж умой тупаса, котьку ог-огзылы юрттыса, вань ужъёсты валче быдэстыса уло.

— Котькуд анай понна ас нылпиосыз самой йӧноосыз луо, дыр. Мынам пиосы но кыкназы ик туж быгатӥсесь. Котькыӵе уж борды басьтӥськизы ке но, рос-прос быдэсто. Соос сварщикъёс но, плотникъёс но, механизаторъёс но. Огъя вераса, ваньзэ карыны быгато, зэмос воргоронъёс. Гужем вуиз ке, соосты шабашкае ужаны ӧтё ини. Мон туж шумпотӥсько. Кенъёсын но мыным туж удалтӥз. Нимаз улыны кутскытозь, кык ар ӵоже ми валче куинь семья улӥмы. Внукъёсы но вань вал ини соку. Куспамы туж тупаса улӥмы, ог-огмылы юрттыса. Аслам нылъёсы ӧвӧл, нош тани кенъёсылы туж шумпотӥсько, — шуэ Надя апай.

Котьмалы кибашлы

кышномурт

Сизнер гуртын азьло дырысен Надежда Николаевна тужгес адӟем карымон кышномуртъёс пӧлысь одӥгез луэм, али но со данзэ уг ышты Надя апай. Азьвыл дырысен гуртлэн улоназ мыло-кыдо пыриськеменыз со Сизнерын аслыз сӥ-дан басьтыны быгатэм. Кылсярысь, егит дырысеныз со гуртысь ансамбле пыриськем — Надя апай кырӟаны яратэ. Ас дыраз трос концертъёсы пыриськем ини со, ёросысь Культура юртлэн сценаяз но сылэмез вань. Сизнерын магазин лэсьтыкузы, ужасьёсты сюдыны Надя апайлы оско. Гуртазы кырӟанъя но эктонъя «Айкай» кун театр вуылыку но Антоновъёс соосты ас юртазы куно каро. Сизнерын амбар лэсьтӥськыку но ужасьёссэ, колхозлэн куремезъя, Надя апай сюдэ. Секыт ке но, шулдыр дыръёс луиллям со.

— Гуртын азьло туж шулдыр вал. Вань егитъёсын люкаськыса юмшаны потӥськомы вал, урам кузя васькыса шулдыръяськимы. Мызганчимы но вал. Жадёнэз но тодӥськымтэмы соку… Туала дыре но ӝожтӥськыны уг луы. Но азьло кадь ӧвӧл ини, — шуэ кышномурт.

Артём внуксы — мызганчи

Шулдыръяськон сярысь кыл потэм бере, пусйыны кулэ тани мае но. Миша агай тальянкаен шудыны яратэ вылэм. Табере инструментсэ шер гинэ поттэ ке но, быгатонлыкъёссэ со уг вунэты. Кузпалъёс туж шумпото, Артём внуксы мызганэн шудыны быгатэ но яратэ шуыса. Ужрадъёс ортчыку Артём котьку мызганэныз сцена вылын, праздникъёсы но сое ӵемысь мызганчи карыса ӧтё вылэм. Интервью басьтыны мынэм нуналэ гинэ но Артём мызганэн шудыны сюанэ мыныны дасяське вал. «Ачиз кулэ карыса, кельшытыса мызганэн шудыны дышетскиз. Котьма кулэ карон бордысен кутске ук со. Ми талы пумтэм шумпотӥськомы», — шуо семьяын. Анна но Полина внучкаоссы но палэнэ уг кылё — гуртлэн нуналыз-а, кыӵе ке праздник-а, школаын кыӵе ке ужрад-а — кыкназы ик нылъёс отчы мыло-кыдо пырисько. Андрей внуксы туннэ нуналэ арми радъёсын служить каре, соин но туж данъясько песяен бабаез.

— Внукъёсы но, Инмарлы тау, туннэ нуналэ возьытэ ӧз уськытэ. Бен, котькинлэн озьы ведь со: нырысь нылпиос, собере внукъёс шумпотто но, куддыръя бӧрдыто но, шумпоттыса но бӧрдыто — озьы но луэ. Сюлмаськонэз но луэ ини… Но ышан улэмзы внукъёсылэн ӧвӧл. Соос понна ми шумпотыса улӥськомы, сӧл-таза гинэ мед луозы. Тани нош мае пусъеме потэ: Гуртлэн нуналыз дыръя Анютаен, Полинаен но Артёмен арапа люканэ но мыло-кыдо пыриськимы, праздниказ но. Мон понна та туж шумпотымон вал. Только зоутъёсмы уггес тупало. Нылъёс мукетгес зоутэн кырӟало, мон — мукетгес.

Сизнер гурт — пыраклы сюлмазы

Та гуртын вордскем, улэм, яратонзэс шедьтэм бере, палэнэ нокытчы кошкемзы уг поты ни Антоновъёслэн огзылэн но. Каньыл гурт улон соослы кельше. Соос тыршыса-тыршыса, трос кужым поныса, валче ужаса, асьсэлы чебер юртъёс пуктӥзы. Табере соослэн ӝутэм куинь юртъёссы но огазе, артэн-артэн сыло. Соос но эшлыко, тупаса улӥсь семьялэн тодметэз луо кадь.