Синпелетъёсын асьме тодэ ваёнъёсмы, синпелетъёсын асьме историмы

Гурт калык сӥё-дано ужрадэ мыло-кыдо лыктӥз. Синпелет валаса но туж быгатыса лэсьтэмын, котырысь территориез радэ пыртэмын, заборен котыртэмын, плитка вӧлдэмын, огъя вераса, калыклэсь батырлыксэ возьматӥсь синпелет котькинэ бордаз кыскыса улэ. 

Выльдэм синпелетын табере сизнеръёслэн 100-лэсь трос гуртооссылэн нимтулъёссы пусъемын, вужаз ог 40 пала гинэ вал.

— Смаиль гурт поселение элькун конкурсэ пыриськыса грант утӥз. Со грантлэсь ог ӝыны миллион манетсэ Сизнер гуртын выль синпелет лэсьтонлы кутӥмы. Синпелетэз Балтась каргуртысь Искандер Шакирзянов лэсьтӥз, нош территоризэ радэ пыртон, заборен котыртон ужъёсты ёросысь ХЭС организация (кивалтӥсез Фагим Сибагатуллин) быдэстӥз. Озьы ик Сизнер гуртысь депутат Иван Антонов Пётр Марков гуртоеныз та ужез быдэстон понна сюлэмзэс сётыса туж тыршизы. Огъя тыршемлэн бервылэз но, кадырез но луэ, шуо, угось. Озьы медло ини, — валэктон сётӥз Смаиль гурт поселенилэн кивалтӥсез Рифнур Юсупов. 

Синпелет усьтонэ мобилизация улсын нимысьтыз ожгар операцие басьтэм но отын батырлыко бырыны шедем Павел Матвеевлэн анай-атаез, апайёсыз-агайёсыз но ӵыжы-выжыосыз ӧтемын вал. Котьку юрттыны дась, шулдыр мылкыдо, ужась пиез пыраклы вунэтонтэм карон понна синпелет борды синпель пул юнматӥзы. 

Шонер верало, синпелетъёсын тодэ ваёнъёс, синпелетъёсын история шуыса. Та синпелет но, калыклэн тодэ ваёнэз луыса, гуртлэн синчеберез кадь мед утиськоз! 

Ольга Плотникова,

Вакиф Закиев.

Туспуктэмъёс Вакиф Закиевлэн.