Школаын ужась библиотекарьёс — огдыре дышетӥсьёс, визьнодасьёс но психологъёс

Библиотекарь улэ но ужа книга дуннеын. Солэн эксэйлыкез — со югыт лыдӟон зал но книгаосын тырмытэм ӝажыос. Ӵапак сыӵе эксэйлыкен кузёяське Васильева Мария Евгеньевна но — Ципья шоръёзо школаысь библиотекалэн кивалтӥсез.

ВАКЧИЯК: Мария вордӥське Бадӟым Лӧзя 1 люкет гуртын 23-тӥ инвожое 1984-тӥ арын Анфиса но Евгений Ермохинъёслэн семьяязы нырысетӥ нылпи луыса. 1990-тӥ арын Сизнер гуртысь покчиёзо школае нырысетӥ классэ дышетскыны пыре (семья мугъёсын сэрен анаезлэн вордскем гуртаз улыны выжо). 2001-тӥ арын Ципья шоръёзо школаын 11 классэз йылпумъя. 2006-тӥ арын, Можга педколледжез пырпотыса, социальной педагоглэсь ӧнерзэ басьтэ, нош 2015-тӥ арын, Казаньысь лулчеберетъя но искусствоосъя кун университетэз йылпумъяса, вылӥ тодон-валан басьтэ, библиотекарь-библиограф, преподаватель луэ. Быземын, куинь нылпилэн анаез луэ.

— Мария Евгеньевна, палэнысен учкыса библиотекарьлэн ужез туж каньыл кадь, но со чик озьы ӧвӧл шуыса тодӥсько. 

— Зэм, школаын ужась библиотекарьлэн ужез — учебникъёсты но программной литератураез сётъян, книгаослэсь учётсэ нуон, кожано кадь. Но таӵе веранэн та удысын ужась одӥгез но ӧнерчи соглаш уз луы. Малы ке шуоно, нырысетӥез, библиотека школьной программаысь книгаослэсь гинэ уг кылды. Кыкетӥез, нылпиос библиотекае мед лыктозы шуыса трос тыршыны кулэ на.

Мазэ веранэз, милям валтӥсь ужпуммы — дышетскисьёсты 100 процентлы учебникъёсын обеспечить карон. Нош книга ёросын ик ӧвӧл ке, соку ини электронной книгаен дышетско, электронной ссылкаосын. Со сяна, документациен выриськом. Та дырозь арлы быдэ Худяковлы сӥзем лыдӟонъёсы пыриськисько вал, жаляса верано, туэ пыриськыны ӧз луы. Нылпиос но котькуд аре пӧртэм конкурсъёсы пырисько, вормонъёсы, азинсконъёсы вутско.

— Маин, тӥ сямен, висъяське школаысь библиотека публичной лыдӟиськоннилэсь?

— Мазэ веранэз, школаысь библиотека висъяське котькудӥзлэсь публичной библиотекалэсь. Татын аслаз аспӧртэмлыко атмосфераез. Ципья шоръёзо школалэн библиотекаяз мон 2007-тӥ арысен ужасько ини. Туннэ нуналэ милям школаямы 357 пинал дышетске. Соосын ми 1-тӥ классысен кутскыса 11-тӥ классозь. Озьыен, котькудӥз нылпи милям син азямы будэ, воштӥське, будэмезъя воштӥсько солэн тунсыкъёсыз но, улон шоры учконъёсыз но. 

Школа библиотекаын ноку но шып уг луы. Пиналъёс татчы котьку пырало, котькудӥныз соосын вераськоно, котькудӥзлы мар ке но ӵектоно. Библиотекарь трос лыдӟиськыны но тодыны, выль иворъёсын тунсыкъяськыса улыны кулэ. Учебной литературалы сяна, школа библиотекаосын бадӟым саклык висъяське чеберлыко литературалы но.

— Кызьы тӥ малпаськоды, кыӵе луыны кулэ туала библиотекарь? 

— Мынам малпамея, туала библиотекарь универсальной ӧнерчи луыны кулэ: солы пӧртэм удысысь информациез тодоно, творческой но позитивной адями луоно. Школа библиотекаын огшоры пукыны уг луы, тон доры пиналъёс лыкто ук, соосты тыныд книга дуннее кысконо, тунсыкъяськытоно. Нылпиез кужмысь лыдӟиськытыны уг луы, сое тунсыкъяськытыны тыршоно, возьматыны, книгаен мӧзмыт ӧвӧл, тунсыко шуыса. Пиналъёсын эшлыко кусыпъёсты тупатыны мыным аслам нырысетӥ басьтэм ӧнере — социальной педагоглэн ӧнерез — но юрттэ, дыр. 

— Нылпиос али ӧжытгес лыдӟо шуыса малпаськоды-а? Вань-а тӥляд трос лыдӟиськись пиналъёсты? Кыӵе литератураез тросгес лыдӟо? Яке дышетскон программая лыдӟонозэ гинэ куро-а? 

— Лыдӟисез лыдӟе, нош лыдӟыны яратӥсьтэмез — уг. Покчи классъёсын дышетскись пиналъёс тунсыкъясько ик али книгаен. Соин валтӥсь лыдӟисьёсы — покчи классысь пиналъёс. Соослы тунсыко ук али ваньмыз но. Тужгес но, соослэн потэ басьтэмзы яркыт буёло книгаосты. Но, жаляса верано, ялан уг вуо сыӵе книгаос. Бадӟым классъёсын дышетскисьёс программаягес лыдӟо ини.

— Туала нылпиослы кыӵе книгаосты лыдӟыны ӵектысалыды?

— Туала нылпиослы туннэ нуналэ туж трос тунсыко авторъёс вань. Но милям библиотекаямы тросэзлэн со авторъёслэн произведениоссы ӧвӧл. Уно нылпиос тунсыкъясько коӵыш-пуны сярысь книгаосын. Татын пусйысал кунгожсьӧр Холли Вебб авторез.

— Туннэ нуналэ тросэз электронной книгаез умоен лыдъяло, тӥ кызьы учкиськоды та выльдӥськон шоры?

— Электронной книгаос сярысь ке верано, мон соосты умоен уг лыдъяськы. Мазэ веранэз, со туала улонлэн куронэз но солэсь нокытчы уд пегӟы. Но котьма ке но, яркыт суредъёсын чебертэм ческыт зыно книга бамъёсты берыкъяса лыдӟонлы номыр но уг вуы, солэн аслаз аспӧртэмлыкез, со трослы умойгес ни, конечно.

— Библиотекарь луыса ужан понна аслыд но книга лыдӟыны яратыны кулэ, дыр. Кыӵе книгаосты асьтэос яратӥды пичи дыръяды лыдӟыны но кудӥз тужгес яркыт тодэ ваён кельтӥз?

— Зэм, лыдӟыны мон котьку яратӥ. Пичи дыръям яратоно книгае вал Виталий Бианкилэн «Лис и мышонок» книгаез. Мон туж яратӥсько вал со книгаез, туж тунсыко потыса эскерылӥ мон шырпилэсь корказэ.

— Нош али кыӵе жанрысь произведениосты, кыӵе авторъёсты кельшытӥськоды?

— Лыдӟыны яратӥсько, но котьку дыры уг тырмы. Тани кемалась ӧвӧл кутскиськем вал лыдӟыны Трофим Архиповлэсь «Лудӟи шур дурын» романэзлэсь ӟуч вариантсэ («У реки Лудзинка»). «Зулейха открывает глаза» романэз кемалась ӧвӧл лыдӟи. Мыным туж кельшиз, туж тунсыко, фильмзэ но учки. Мыным кельшо яратон но военной тематикаен произведениосты лыдӟыны. Кылсярысь, мынэсьтым сюлэмме вырӟытӥз Владимир Богомоловлэн «Иван» повестез. Удмурт авторъёслэн произведениоссы пӧлысь берло лыдӟемез — со Нивклад Самсоновлэн «Адӟон» повестез. Туж кельшо асьме аспалмылэн Николай Никифоровлэн гожъямъёсыз: пиналъёслы кылбуръёсыз, «Толэзен вераськон» книгаез.

— Удмурт книгаос сярысь кыл потэм бере, юан кылдэ: берто-а тӥ доры выль удмурт книгаос?

— Ӵемысь берто, вераны кулэ, ӟуч классикалэсь но ӵемгес. Нылпиослы чаклам удмурт книгаос берто. Лия Малыхлэсь книгаоссэ ярато пиналъёс. Нина Ермолаева, Римма Николаева, Вениамин Ившин, Елена Миннигараева, Алексей Ельцов, Владимир Катков, Егор Загребин, Александр Белоногов, Василий Ванюшев, Надежда Орлова но мукетъёс — таос ваньмыз но удмурт гожъясьёс, кудъёсызлэн книгаоссы ми дорын вань. Пичиослы арлы быдэ мар ке но бертэ. Мазэ веранэз, нылпиос яркыт пичи книгаосты басьто, удмурт кылъя но литературая дышетӥсь Ираида Анатольевна ялан тунсыкъяське выль книгаосын, со татысь ваньзэ лыдӟиз, дыр, ини. Озьы ик пор кылын но пичиослы книгаос вуо. Лыдӟисько шуись муртлы, кыӵеез но ӧвӧл, Но тани ӟуч классика, соосын ӵошатыса, ӧжытгес бертэ. Соин шуг-секытъёс кылдо ик. 

— Кыӵе шуг-секытъёс сярысь тӥ вераськоды?

— Дышетскон программаез воштӥзы, книгаос вужмо, нош выльёсыз уг вуо. Со, конечно, проблема ини. Милемлы ялан выльдӥськон кулэ, тужгес но классической литература, ӟуч книгаос, туала дышетскон программае пыртэм авторъёслэн книгаоссы кулэ. Нылпиос лыкто мон доры книга курыса, нош милям со ӧвӧл. Вот со секыт югдур. «Подари книге вторую жизнь» — одӥгез сыӵе акция, кудӥз та выллем секыт югдурмес капчиятыны юрттэ. Соку нылпиос дорысьтызы библиотекае ваё книгаос. Тӥни со книгаос пӧлын шумпотыса бугыръясько ини пиналъёс. Туэ тужгес но уно вайизы книга нылпиос. Оло, выль, яркыт книгаосмы тросгес луысалзы ке, нылпиос но ӵемгес пырасалзы библиотекае.

Шӧдске, трос дырзэ, сюлэм шунытсэ сётэ Мария Евгеньевна аслаз ужезлы. 

— Лыдӟиськисьёсы медаз кулэсме вал, нылпиос ӵемгес мед пырасалзы. Туала технологиосын ортчыт тунсыкъяськон тужгес ик егитъёсты библиотека бордысь медаз палэнты вал. Медаз вунэтэ вал соос — ӵуказе улонэз соослы лэсьтоно шуыса. Нош ӟеч книгаез лыдӟытэк луод шат умой сюлэмо адями, — сюлэмшугъяськыса но азьланезлы оскыса, веранзэ йылпумъяз библиотекарь.