Хезмәт

Солдат улонысь тодэ ваёнъёс воспомина

Котькуд адямилэн улоназ вунэтонтэм, улыса-вылыса, выльысь но выльысь тодаз уськытымон дыръёсыз луыло. Вож гуждор вылтӥ гольык пыдын бызьылон пичи дыр, быдэ вуон но егит дыр...

Армиын служить карем аръёс но улон сюресэ нимысьтыз пытьы кельто, аръёс ортчыса но уг вуно. Тани, Атаймузъеммес утисьёслэн нуналзы матынъяськыку, мон но солдат улонысьтым куд-ог «вужеръёсты» тодам уськытӥ. Малы «вужер» шуисько, ведь со дырысен ини ӝыны даурлы матэ улонэ ортчем. Озьы но со нуналъёс, аръёс, ӵош служить карем эшъёс, командиръёс, серемес учыръёс ялан уг вуно.
Учениосын
Армиын служить карем котькин тодэ мар со учениос. Со классын, строевой плацын, стрельбищеын басьтэм тодон-валанэз боевой условиослы матын карыса эскерон, экзамен сётон. Куинь ар служить карон аръёсы кыӵе гинэ учениосы пыриськыны ӧз тупа милемлы. Арлы огпол ке но быдэс дивизиез, армиез учениосы потто вал. Советской войскоослэн Германиысь группаязы служить каремъёслэн уноез ӟеч тодо Магдебург дорысь сю иськем кузьдалаен но сю иськем пасьталаен дышетскон полигонэз. Верамзыя, куке но та полигонэз Гитлер лэсьтытэм, татын со учениос ортчытъям, пе. Полигон со дырысен олома воштӥськымтэ. Бетонлэсь кисьтэм траншеяос, блиндажъёс, кужен-вамен из вӧлдэм сюресъёс. Али дыре отын мар меда, созэ вераны уг быгатӥськы. Тӥни со полигонын ог дас пол луимы, дыр. Мадё отын луэм куд-ог учыръёсты.
Милям ротаысьтымы кык пиос быдэс арня ӵоже тодмоям интыязы сютэм сямен (кык нуналлы шуэм кӧс паёксы луэм) сылӥллям. Инты тодмояллям, нош отысь басьтыса кошкыны вунэтӥллям. Со понна командиръёслы кыл йӧтэм, дыр, нош дивизилэн командирез пиосты именной часъёсын пусйиз.
Уг вуны мукетыз учыр. Кубаньысь Жора (Георгий) нимо пиен тодмоям интыын кык сутка сылӥмы. Кӧтмы сюмам бере сиськыны пуксимы но кӧс паёкысь консерва банкаосты усьтыны кутскимы. Нош пуртмы огмылэн но ӧвӧл. Маин усьтӥмы шуиськоды? ...Сурон сапеглэн пыдэсысьтыз волям дагаен.
Та полигонын мон пумитай Глазов ёросысь удмурт пиез. Нош удмурт луэмзэ шӧдӥ вераськемезъя. Ог ӝыны час ёрос удмурт кылын «лабыртӥмы». Кыӵе бадӟым шумпотон вал со!
Учениосын луылыкумы нош ик вунонтэм луыса кылем Эльба шур вамен бронетранспортёрен уяса потэммы. Эльба - со Вяткалэсь унолы паськытгес но кужмогес бызись шур. Бронетранспортёр, уясь ке но, лодка ӧвӧл ук со, секыт корт «коробка» выллем, каллен уя. Вуэ пырон азьын омырен тырмытэм жилет дӥсяськод, инмарез тодэ уськытӥськод но, азьлань мынӥськод. Кужмо тулкымъёс бронетранспортёр вылэ ик пальккисько, туж кышкыт. Одӥг ярдурысен мукетаз потытозь, боевой машина одӥг иськем мында уллапала ваське.
Нош одӥгаз учениосын куинь толэзь ӵоже нюлэскын возизы. Солдатъёс номыр со-та ӧз тодэ, солдатлы сиён но изён гинэ кулэ ук. Ми берло гинэ тодӥмы: со Чехословакиын луэм событиосын герӟаськемын вылэм. Тодэммыя, та событиосы асьме войскоос но пыриськизы ук.
Ӟуч кыл тодаз усиз
Ротаямы Цилосани фамилиен грузин пи служить кариз. Нырысетӥ но кыкетӥ арзэ служить карыкуз, Цилосаниед ӟуч кылэз «вунэтӥз». Теория ласянь мар ке юало ке, вань веранэз «не понимаю» вал. Озьы кык ар ортчиз, «пересьёс» доразы кошкизы, соос интые ми кылимы. Тӥни соку Цилосани ӟуч кылэз туж умой тодаз уськытӥз, командир луон сямыз но шараяськиз. «Салагаосты» (нырысетӥ арзэ служить карисьёс) соизлы-таизлы дышетэ, косъяське. Малпалод, зэмос солдат луыса вордскем, ваньзэ тодэ. Служба солы кельшем, лэся, милемын ӵош дораз бертоно вал ке но, кыӵе ке но складэ ужаны кылиз (сверхсрочник).
Суйбыгытъёссэ уйбыт юнматэм
Армиын спортъя со яке та нормативез быдэстыны ӧд ке быгаты, мукетъёс сямен каньылэн шутэтско шуыса эн малпа. Шутэтскон нуналъёсы адямиос киное, библиотекае мыно, доразы гожтэт гожъяло, нош тон «сьӧд списокын» ке, тыныд сюрес спортзалэ яке спортплощадкае.
Взводамы казах пи Дусюмбаев вань вал. Со монэным ас кылыныз вераськыны (казах кыл бигер кыллы матын) тыршиз. Верамзэ уг вунэтӥськы: нырысетӥ арзэ служить карыкуз, секталаез дас кык килолы мултэсмем, пе. Солдат сиён, режим кельшем, дыр. Нош тани турникын ӝутъяськон солы туж секытэн сётӥськиз. Котькызьы тыршиз ке но, нормативез быдэстыны уг быгаты вал. Огпол изьыны выдэм бере, командирмы Дусюмбаевез сайкатӥз но выж вылысен киосыныз ӝутъяськыны косӥз. Шутэтскыса-шутэтскыса, сю пол ӝутъяськод, пе. Мон солэсь секыт шокамзэ кӧня ке кылзӥськыса кылли но умме усиськем. †укна куать часэн вырӟыны команда луиз, казах пиед кроватьысьтыз ӧвӧл, выж вылысь тэтчыса султӥз. Берло серекъямы ини, ки вылаз ӝутъяськон сяменыз ик умме усем вылэм, ӵукнаозь номыр шӧдымтэ.
Фото: http://www.sovacity.ru/photo/5-0-1073

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: