Шуг-секытъёссэ шумпотонэн воштӥз

Покчи Лӧзя гуртысь ужысь ветеран Мария Гурьяновна Изосимова 13-тӥ коньывуонэ (октябре) пусйиз аслэсьтыз 90 аресъем юбилейзэ. Сӥлы карыса, юбилейзэ ортчытӥсь ветеран доры куное ёрос администрациысен но гурт поселениысен представительёс вуизы. Лыктэм куноос Россилэн Президентэзлэн ӟечкылан открыткаеныз, Балтась ёрослэн главаезлэн Таукарон гожтэтэныз но кузьымъёсын песянайлэсь мылкыдзэ ӝутӥзы.

Улон — со аспӧртэмлыко кыстӥськись сюрес. Со сюрес пӧртэм пумо интыосы вуттыны быгатэ, пӧртэм адямиосын пумиськытэ, шуг-секытъёс пыр но поттэ... Статьялэн валтӥсь героиняез — Мария Гурьяновна Изосимова — улон сюресаз трос ыштонъёсын пумиськем нылкышно. Нялтас вераса, вераськонмы туж секытэн ортчиз. Улонысьтыз котькуд историзэ веракуз, асме кутыны тырши: синкыли пыр кылзӥ песянайлэсь котькуд улон этапез сярысь верамзэ. Со сюрес ыштонъёсын но шумпотонэн тырмемын, нош секыт вакытлэн ӵашетэмъёсыз али но сюлэмзэ чигто. 

Балтась ёросысь гуртъёс XX даурлэн кутсконаз трос калыкъем луиллям. Удмурт калык котькуд вакытэ аслаз тыршеменыз но ужез яратэменыз висъяськиз. Ужзэ соос рос-прос лэсьтылӥзы, соин ик бадӟымесь вормонъёсы но вутскизы. Одӥгаз сыӵе гуртын, Ӟаныын, Филипповъёслэн семьяязы куинетӥ нылпи луыса 1933 арын вордӥськиз Мария Гурьяновна. Озьы ик будӥз на бадӟым агаез.

Атайзы 1939-1940 аръёсы мынэм финской оже пыриськем. Соин ик нылпиоссылэн син азязы зэмос пиосмуртлэн примерез луэм. Семьяезлы, шаерезлы юн пыкет луыны быгатэменыз сое быдэс гурт но данъям, дыр. 

— Финской ож кема ӧз кыстӥськы, гужем, жугиськон йылпумъяськем бере, атай бертӥз ни. 1941 арын ожмаськыса басьтэм музъеме вербовщик лыктэ, соку 18-19 кузя бигеръёс но, удмуртъёс но, поръёс но улӥзы со музъемын. Сӥзьыл вал со, син азям кадь али но: товарной вагонэн нуизы, отчы мыныса вуэм бере — интыязы. Толэз озьы но тазьы потӥмы. 1941 ар... 7 арес тырмымтэ вал ай соку. Гужем, шулдыр  куазь. Анаен-атай кошкизы ужаны. Кык сузэре вань вал, соосын ветлӥськом гидкуазьын, финн музъемын, отчы машина лыктӥз, ма милям машина адӟеммы ик ӧй вал! Табере мон кышкай, сузэръёсы пичиесь, али одӥгез ветлыны гинэ дышетске вал. Отысь военной дӥськутэн  бадӟым воргорон потӥз, мон доры лыктӥз но вера, вера, вера... Нош мон аслэсьтым вордскем анай кылме но умой уг тодӥськы на, кытысен мукетсэ тодом ни. Ӧй вала верамъёссэ. Бускельын Чутай гуртысь егит семья улэ вал, егит воргорон удмурт кылын но умой тодӥз, куддыръя милемын но шудылэ вал. Вал гидаз маке лэсьтӥськиз, со доры бызьыса лыктӥ но шуисько: «Олокин лыктӥз, вера, вера, вера...» 

Со воргорон ужан арбериоссэ вал гидаз куштӥз но, мынӥз лыктэм машина доры, воргорон доры. Соос тодматскизы, «куно» мон доры лыктӥз но йырме маялтӥз. «Э-э, мон тынад атаедлы повестка вайи» шуиз, дыр, ини со ас понназ.., — секытэн вера Мария Гурьяновна. — Со жугиськон кутскон нуналэ ик вал. Вань кадь адямиос ми доры лыктӥзы, атай бригадир вал, начальник кадь ик луэмысьтыз-а, мар-а. Мар карод? Вань гуртоос атаез но эшшо кык бигеръёсты озьы келязы, ӵуказеяз ӵукна ик кошконо вал ни соослы.Кыӵе мылкыдъёсыз луыны кулэ егит воргоронлэн, куке солы семьязэ кельтыса, ожлудэ кошконо? Кӧня юанъёс кылдӥллям меда со вакытэ воргоронъёслэн? Шӧдтэк шорысь радъяськем улоназы тушмон пырыса вань умоезлы осконъёсты копак тэргаса, сьӧд буёлэн суредаз уга... 

Секытэн тырмем синъёсын учкыса, Мария Гурьяновна веранзэ азьланьтӥз:

— Анай ньыль нылпиен кылиз. Самой покчи сузэрмы уг но ветлы вал али. Анай ӟуч, бигер кылын уг тоды вал, гожъяськыны но дышетскымтэ. Ожмаськон кутскем бере арняскын-а, мар-а, милемыз со финн музъемысь уллязы. Ми Ленинградской улосвылын улӥськомы вал. Мар басьтоно сьӧрамы? Кык семьялы одӥг вал, уробо, туала дыре кадь автобус-машина ӧвӧл, уй-нунал мынӥськом, мынам самой покчиез сузэре уробоын мынӥз, нош ми кытӥ пыдын, кытӥ уробоын. Агай скалмес, кунянмес басьтӥз. Трос иськем ортчим! Кыӵе ке бадӟым ву дуре дугдӥм. Со финской залив луиз, дыр. Ми асьме воляен ум мынӥське ук, заключённойёсты кадь, пудоез кадь улляса нуо. 

Отчы вуэм бере милемыз баржае пуктӥзы, со туж бадӟым пароход. Выламы но дӥськут — мар вань со, йыр улэ поныны 1-2 миндэр, ваньмылы но уг тырмы вал. Анай ӟуч сямен тодымтэ бере, солы киын возьматӥзы, скалэз кысконо шуыса. Одӥг ведра йӧл кыскиз но, отысь солдатъёслы со йӧлэз кружкаосазы лэзиз. Скалэз вандӥзы, со интые пичи кагаз сётӥзы, кытчы интыяськомы, отысен басьтыны луэ шуыса. Скалмы озьы ик кагазэ кылиз... Баржаен туж кема мынӥмы.

Архангельской улосвылэ нуизы милемыз, отын 1941-1943 аръёсы улӥм. Дышетскыны пырон аресэ вуиз но монэ 1942-1943 дышетскон аре басьтӥзы. Мон ӟуч кыл уг тодӥськы ведь, отын гуртысь гуртэ, интыысен интые ветлӥм кӧчыса, кинлэн вуж коркаез вань, куддыръя укно вылын пуксьыса пукиськом вал, бӧрдыса. Анай лесопильной заводын ужаз, отын нюлэс корало, асьсэос ик вайыса берто вал. Кызъёслэсь, пужымъёслэсь фанер, поезд сюресъёслы шпалъёс лэсьтӥллям. Анай тэк ӧз ул, нылпиосыз понна юн тыршиз. Агаймы ФЗО-е (школа фабрично-заводского обучения — ред.) пыриз, отын сюдо шуыса. Сузэрен школаысь бертӥськом вал но одӥгаз бӧлемын песяйёс керттӥсько вал. Али но телевизорын возьмато, кызьы песяйёс ожмаськонэ пыриськисьёслы носкиос, пӧзьёс кертто. Керттӥськись песяйёслы юрттыса, ми сузэрен бугорзэс биньыны потӥськом вал, шортсэс но кутӥськом вал. Соос милемыз вешаса-вешаса «э-э-эй» шуо вал. Кудӥз пичияк нянь но сётылӥз. Ми соос доры пырыса, шуныт коркан пукыса юрттӥським. 1944 арын милемлы доре бертыны приказ лыктӥз. Вордскем палъёсы бертон сюрес капчи ӧй вал: азьло Казане, Казаньысен — Шеморданэ, Шеморданысен пыдын. Кидыслы лыктэм нылкышноослэн уробоязы арбериез поныса, соос сьӧры нюштыр-нюштыр Кушкетэ вуытозь бертӥмы. Нош милям коркамы эстонъёс улӥллям, соослы приказ вуытэк, корка пырыны ӧз лэзе. Озьы тӥни улӥм ини. Атаймы ожысь ӧз ни берты... Солэсь одӥг гожтэтсэ но ӧм басьтэ. Ӟаныын бадӟым апаез вань вал солэн, солы гинэ одӥгзэ лэзем. Сое но лыдӟытэк кыли...

Озьы Быдӟым Атыкай ож нылпиосты одӥг бурдэн кельтӥз, сӧсыртӥз. Зэмзэ ик, матысь адямиеныд пыраклы люкиськонлэсь секытэз номыр но ӧвӧл. Уйвӧтъёсын, малпанъёсын гинэ выльысь но выльысь пумиськоно луиськод сюлэмез шунтӥсь ымнырен. Егит нылаш быдэ вуымтэ улон сюресаз ик нырысетӥ ыштонэн пумиськоно луиз, улон, зэмзэ ик, нылашлэсь юнлыксэ эскериз кадь. 

— Дышетскыны ӧй быгаты, начар дышетски. 7-тӥ классэз озьы но тазьы йылпумъяй но гуртысьтымы колхозын ужась анаелы ыж сюдыны но скал кыскыны юрттыны ветлӥ. Колхозын толалтэ но, гужем но ужано луиз. Вуэм ӟегез киын араса ветлӥм анай урдсын. 18 аресэ тырмем бере, паспорт басьтӥ. Паспорт басьтэм бере мар кароно? Прописка но одӥг арлы гинэ. Кушкетысь песяйёс сьӧры Удмуртие кошки. 

Удмуртиын Сюрек гуртысь леспромхозэ ужаны пыри. Со лесничество гинэ ӧй вал, туж бадӟым производство. Одӥг бригадаез Ельцин нимо, кыкетӥез — Зималеев нимо, отыназ бигеръёс ужазы, монэ но отчы интыязы. Улвай корась (сучкоруб) луыса ужай. 18 арес кыӵе али мынам кужым! Трос лымы, кот. Лопата сётӥзы. Лопатаез ӝутод-а, лымыез ӝутод-а? (серектыса). Уж секыт вал, кезьытэн но, гӧпен но, зорен но, пӧсен но. Ужай ини, 1952-1956 аръёсы, 1956 арын июнь-июль толэзьёсы бертӥ кадь гуртам. Сӥзьыл вуиз. Нош ик ужаны пыроно, кытчы ке интыяськоно. Балтасе мучоло поттыны пыри. Сӥзьылзэ нош ик кошки. Куинь нылъёсын сюрес кутӥм Чкалов улосвылысь Адамовской ёросэ, целинае. Отын быдэс сезон — тулысысен сӥзьылозь — ужамы. Тулыс кизимы, гужем будэтӥмы, сӥзьыл октӥмы. Одӥг нылмы отчы ик кылиз, ӧз берты. 

...1957 ар, сӥзьыл. Кытчы ке но кошкыны кулэ шуисько анайлы. Дорамы агай но вань, кышно ӧз басьты вал ай соку, сузэре но гуртын. Анай шуэ: «Э-эй, Марья, Марья, Олька но ветлэ тӥни, Балтасе гинэ пыры, матын но луоз, мынод-бертод. Ярак-Чурмаын апае доры но кылёд». Анайлэсь кылзӥськи. Озьы, 1957-1990 аръёсы Балтасьын меховой фабрикаын ужай. 1988 арын пенсие потӥ, собере но 2 ар ужано кариськи ай. Азьло Промкомбинат, собере артель луиз, бератаз Стахановецъёслэн артельзы, собере Карадуванысь меховой фабрикаен огазеяськизы. Трос воштӥськонъёс пыр ортчыны тупаз. Меховой фабрикаын мех вандылӥмы, тызӥмы, фанер сётӥзы, отчы мехез тыриськом вал, гонзэ учкыса, сьӧдзэ сьӧдэн, пурысьсэ пурысен, тӧдьызэ тӧдьыен тырим. Трос ужамы, тузон, 
апара пушкын «уямы» ини. Озьы тӥни гумыр ортчиз — пересьми, каньыл улӥсько. Ужам ужез сиисько. Яра ужаськеммы али.

Мария апайлы шуд усиз яратонзэ но пумитаны. 1958 арын Покчи Лӧзя гуртысь Иван Николаевич Изосимовен улонзэ герӟаз. Кузпалэзлэн бадӟым семьяез луэм: анаез но апайёсыз. Соос Мария Гурьяновна понна зэмос пыкет луизы. Пудо вордӥллям: скал, вал, ыж, ӟазег, парсь. 

Туала дыре турынэз но капка выжые гинэ ваё, нош азьло дыре ваньзэ ас кужымен, киын ужано вал уга. 

Кузпалъёс куинь пиосты вордӥзы: Владимир (1960), Виталий (1961), Валерий (1965). Чебер выжыкыл лыдӟисьёс малпалозы: «Тани зэмос шудбур! Зэмос яратон! Егит семьялэн сюресаз табере шумпотонъёс, пальышанъёс гинэ луозы ни». Нош улонлэн та ласянь воксё мукет малпанъёсыз луиллям...

— Иванэ, вераны но секыт, малпаны но секыт... 34 аресэ тырмытэк кузпалтэк кыли. Бадӟымез пие нырысетӥ классын дышетске вал, покчиезлы — 2 арес. Ӵукна ужаны кошкиз, Балтасьын колхозлэн пилорамаяз ужаз вал. Ӵукна дорысь ужъёсты ужаса, сиськыса кошкиз. Солэн желудоказ операци лэсьтэмын вал, соин ик секыт ужъёсты ужано ӧй вал. Но гуртын улон котьку секытэн герӟаськемын, азьло дыре тужгес но. Пилорамын кор ӝутъяно, желудокез ялан висе но висе. 1967 ар, сӥзьыл, октябрь толэзь, висиз, кыллиз, ноябрь толэзьлэн кыкетӥ нуналаз вал кыткыса ужаны кошкиз. Апара, кот, зоре, тани туннэ кадь (13 коньывуон нунал вал — ред.), шундыё ӧй вал. Бертыса пыри ке, Иванлэн лулыз ӧвӧл ни. Уробояз кулыса бертэм. «Казыр, казыр, бертыса вуиськом» — берпуметӥ кылъёсыз луизы. Мукет кылъёссэ кылыны ӧз йӧты ни...

Тазьы егит нылкышнолы, анайлы улоназ кыкетӥ бадӟым ыштонэн пумиськоно луиз. 

— Картэ туж умой вал. Апайёсыз но, анаез но туж умой сямо адямиос вал. Керетытэк улӥм. Ужаны котьку тырше вал. Семья пушкын ялан ужаны тыршим. 

— Трос секытъёсын пумиськыса шулдыръяськонъёслы дырды кыле вал-а?

— Шулдыръяськыны дыр ӧз йӧты. Кырӟаны но, эктыны но, шулдыръяськыны но уг быгатӥськы. Одӥг удмурт дэреме но кык басма дэреме вань вал. Ужаны интыяськем бере квартирае улыны пыри, тодмое, Наталья апай доры. Ӵошен юбка, лымы пушкын эрезь вуримы. Кыӵе шулдыръяськод! Клубе потон ӧй вал, шудыны мынон ӧй вал, кино адӟыны мынон ӧвӧл, нокыӵе театр, концертъёсы ветлон ӧй вал. 

Нокытчы потон ӧз йӧты. Гумыр ортчиз. Бызем бере но, Иванэн 2-3 пол киное мынӥмы, быдӟымез апаез шуиз: «Тӥ та сямен киное ветлыны лыктӥды-а, мар-а?» (серекъя). Вамыштэм сямен ик кылим, бератаз нокытчы ӧм ветлэ. Вордскем гуртам гинэ бертӥськом вал. Анай доры, отчы но туж шер бертылӥм. Гуртын 18 аресозь улыса, кытысен вутскод, гуртын клуб вань вал, клубе потӥм ке но, ӧс дорын эшеным сэрегын пукыса бертӥськом вал, кытын милемлы шулдыръяськон, кытын эктонъёс. Каньыл улон ӧй адӟы, зэмзэ вераса. 

Куинетӥ но ньылетӥ ыштонъёс луизы пиосыз — Владимир но Виталий. Котькуд анай понна нылпи ыштон со самой бадӟым шуккет. Кӧня кужым но кыӵе чидан кулэ нылкышнолы вань секытъёсты потыны, азьлань мыныны?!

— Дано арлыдады вуыса, тэк уг пукиське. Ялан маин ке выриськоды, ужаськоды. 

— Бен, мар ке ужасько шуыса, пыды ветлэ али, Инмарлы тау. Ай ужасько вал. Тани кемалась ӧвӧл сӧсырми, мар луиз, дыр. Ужаны мар ужалод? Котыръяськыса потӥсько, тусьты-пуньы миськисько, куддыр сиён но пӧзьтӥсько. Чипы-курегъёсты сюдӥсько. Али ӟазег ум вордӥське ини, азьло ӟазегмы но вал. Скалмы но куинетӥ арзэ ӧвӧл ни.

— Туннэ нуналлы тӥ шудо адями-а?

— Туннэ нуналлы мон каньыл улӥсько. Покчи пие монэ утись луиз. Мар кулэ, сое вае, мар косӥ, сое каре. Кенэ но вань, со туж умой, Улын Ушмаысь со. Тани тазалыксы гинэ туж умой ӧвӧл, каньылгес улоно ини соослы. Внукъёсы но трос люкасько, куное берто, утялто. Улон — паймоно сюрес. Котькуд учыр малы ке дышетэ, малы ке луонлык сётэ. Тани кыӵе улон: тодмотэм адями доры мыныса, ӵыжы-выжы но луиськод. Вераськон котырамы, Ӟаны палъёсты тодаз вайыкуз, Кутеш гуртын улӥсь ӵужапайзэ тодаз вайиз. 

— Ӟаны палъёсысь адямиосты умой уг тодӥськы, Кутэшын гинэ ӵужапае улэ, анайлэн агаезлэн, Самсон Петялэн, кышноез.

— Дукеръя апай-а? — паймыса юасько.

— Бен. Самой со.

— Ма со ӵапак мынам ӵужанае ук!

Тӥни озьы вераськонмы нош ик кӧня ке дырлы кыстӥськиз. Тодмо матысь адямизэ карыса-а, Мария Гурьяновна шумпотыса, аслэсьтыз 
нылзэ кадь ӟыгыртӥз. 

Улон... Котькуд адямилэн со аслаз, аспӧртэмлыко но пӧртэм сюресо. Со сюресын ыштонъёс, куректонъёс, шуг-секытъёс пумисько ке но, котькуд адямилы чидамон луо. 

Мария Гурьяновна — зэмос чидась но улонэз пыр потэм песянай. Ас дыраз трос ыштонъёсын пумиськиз ке но, туннэ нунал солы аслэсьтыз зарни дыръёссэ кузьма. Со — яратоно анай, гажано песянай. Инмарен кузьмам дыръёсыз шумпотыса, юн тазалыкен но каньылэн гинэ мед ортчозы!