Хезмәт

«Сыӵе секыт условиосын но ужаськеммы…»

Ципьяысь «Сельхозтехникаын» ужам аръёсыз сярысь — Александр Андреев

Ципьяын кема аръёс ӵоже «Сельхозтехника» гурласа ужаз. Ас дыраз со гуртлэн тужгес данъяськымон организациез вал. Отчы ёросысь пӧртэм гуртъёсысь адямиос ужаны ветлӥзы, техникаез эскерон-чакланъя но тупатъянъя услугаосты возьматӥзы. Организациын ужам аръёсыз сярысь тодаз ваёнъёссэ вераз кема аръёс ӵоже со организациын ужам Александр Павлович Андреев.

Александр Павлович Андреев 22 сентябре 1938-тӥ арын Кушкет гуртын огшоры крестьян семьян вордскемын. Анаез Мария Михайловна гумырыз ӵоже колхозын ужам, атаез Павел Михайлович колхозын но ужам, Финляндиын жугиськонын но луэм, Быдӟым Атыкай оже но пыриськем, отысь ини сӧсырмыса бертэм. «1943-тӥ арын жугиськонысь бертэмез бере, атайме репрессировать каризы, пытсэт сьӧры пуктӥзы. Мон соку пичи вал али. Осколокен сӧсырмемен сэрен демобилизовать каризы сое, паллян киыз уг ужа вал солэн. Бертэм бераз кӧня ке колхозын ужам атай, собере ини (закрасьёсыз луиллям, дыр, — пенси но басьтэ вал, сапег но лэсьтӥз одӥг киын ке но), сое пуктӥзы. Сизьым ар ортчыса, со пытсэт сьӧрысь потӥз. Жугиськон дыръя сютэм улонъёс сярысь трос верало но гожъяло ведь, со озьы ик луэм, дыр — ачим пичи вал бере, уг тодӥськы. Тодӥсько гинэ, анай-атаелы, гуртоосылы, тросэзлы калыклы капчи ӧй вал шуыса. Скал вордӥсьёс, пудо утисьёс ӧжыт ӵабъяськиллям, йӧлзы ке но луэм соослэн. Сютэм улӥсез но трос луэм, дыр, ини…», — шуэ Александр Павлович.

Атайзэс пытсэт сьӧры басьтыкузы, соос куинь кузя нылпиос кылё — ачиз Александр, Татьяна апаез но Нина сузэрыз. Анайзы ньылетӥ нылпиеныз секыто кыле. Самой бадӟым нылпизылы соку 15 арес луэ. Секыт сизьым аръёс ӝог уг ортчо. Атайзы бертэм бере, семьяын нош кык нылпизы вордске. 1967-тӥ арын со кулэ, анаез нош кема улэ — 86 аресозь.

Александр Павлович Кушкет школаын дышетскем.

— Азьло Кушкетын бадӟым сизьым аръем школа вал. Отчы Кисальысь, Кутэшысь, Починкаысь, Турьяысь нылпиос дышетскыны ветло вал, 200 нылпи тодон-валан басьтӥз отын ас дыраз. Со быдӟаесь классъёс вал, — малпанъёсызлы сётскиз Александр агай. — Со школаын мон сизьым класс быдтӥ. Туж потэ вал мынам школае дышетскыны мынэме, но нырысь сизьым аресэ тырмымтэысь ӧз басьтэ. Апайлэсь кылбур лыдӟемъёссэ яратӥсько вал кылзӥськыны, букваосты тодӥсько вал ини — но монэ уг гинэ басьто вал, собере, мылкыдме адӟыса, вольнослушателез кадь басьтӥзы. Озьы дышетскыны кутски, сизьыметӥ классэ вуи. Огъёзоосылэсь котьку но пичи вал мон, тазалык ласянь учконо ке но. Соин нош одӥг ар сизьыметӥ классэ кыльыны малпай (серекъя). Завучмы, юри дышетскыны кыльыны турттэмме тодыса, «саньык кутыса колхозэ ужаны мынод» шуиз. Озьыен, нош одӥг ар сизьыметӥ классын дышетскон малпанъёсы сярысь вунэтоно луиз. 1952-тӥ арын Ципьяе дышетскыны пыри. Отын удмурт шоръёзо школа вал. 10 классэз татын йылпумъяй. Нырысь милемлы общежитие но ӧй вал, корка но ӧй вал — улон инты сирота кылем нылпиослы яке кинлэн жугиськонын атайёссы бырем, соослы гинэ сётӥсько вал. Анай, мон сютэм медам улы шуыса, салазкие тырыса картофка вае вал. Сыӵе тӥни дыръёс вал со… Но зэмзэ вераны кулэ, кӧня ке дыр ортчыса, общежитиын мыным инты висъяло. 

7-тӥ классэ быдтэмез бере гужемъёсы Александр Кушкет гуртысь колхозын ужаны кутске: турын турна, валэн ужа, пӧртэм ужъёсты быдэсъя. 10 классэ йылпумъямез бере тодмо пиосыз, огъёзоосыз, ӵекто Чистополе дышетскыны мыныны. Александрлы та малпан кельше но, со соосын ӵош дышетскыны мыныны малпа. Дышетскыны пыре Чистопольысь гурт возёсэз механизировать каронъя техникуме. Отын кык арлэсь кемагес дышетске но тракторъёсын, комбайнъёсын, автомашинаосын ужанъя техник-механиклэсь ӧнерзэ басьтэ. Диплом басьтыса, 1959-тӥ арын гуртаз бертэ.

— Кушкет гуртлэн колхозэз соку туж кужмо вал. Куинь машина, мотоцикл, стогометательёс но вань вал. Сыӵе техникаен со дыре котькуд колхоз ушъяськыны ӧз быгаты. Мон дышетскыса бертэм бере, колхоз «Яна тормыш» шуыса нимаське вал ини, но, жаляса верано, мыным отын ужаны инты ӧз луы. Одӥг адями интые ужаны кыльыны куро вал, но муртлэн интыяз ужаны пырыны мон соглаш ӧй луы. Озьы мон кошки Киров улосэ, отын ФЗО-я школае (фабрично-заводское обучение) ужаны интыяськи. Со школаын плотникъёслы, трактористъёслы дышетӥзы. Монэ отчы механикез кадь лэзизы, — маде пиосмурт.

Та ужан интыысеныз 1959-тӥ арын ик Александр Павлович армие кошке, куинь арлы матэ Литваын служить каре. Бертэм бераз, 1962-тӥ арын, Казаньысь  институтэ дышетскыны пыре, но улонзы начар луэмысь (соку Андреевъёс семьяязы куать ӵошен луо, атаез висе, анаез колхозын ужа), одӥг семестрзэ дышетскыса, кошконо каре, Балтасе бертэ но «Сельхозтехникае» уж курыса мынэ. Александр Павловичез басьто ужаны Балтасьысь РТС-э (ремонтно-технической станция), со отын трактористъёсты дышетэ. «Ачид но дышетскемдэ тодад ваёд, соосты но дышетод шуыса веразы, — маде Александр Павлович. — Ньыль толэзь соосты уен-нуналэн дышетыны курадӟи. Мырдэм соосты тракторист кари (серекъя). Дышетскисьёс куамын мында вал. Мон ведь соослы ӟуч кылын валэктыны курадӟисько, нош соос ваньзы бигеръёс. Верасько, верасько, нош соос мыным: «Абый, мин белмим» гинэ шуо. Уг луы таосын татын шуыса малпай. Но ньыль толэзь ӵоже ӟучен-бигерен дышетӥ-таки соосты».

Та ужзэ кельтыса, Александр Павлович Ципьяысь РТС-э ужаны интыяське. Соку филиаллэн кивалтӥсез Кузьма Андреевич Садаков вал — чурыт куронъёсты пуктӥсь кивалтӥсь, ӝикыт кутэм со ваньзэ но. Татын Александр Павлович дефектовщик-контролёр луыса ужаны кутске, колхозысь тракторъёслы ремонт каре. Толэзьлы быдэ кызь тракторлы ремонт карон дыръёссы но луо татын. Кык ар ӵоже ужамез бере, 1964-тӥ арын, РТС-ысен лэзё пиосмуртэз «Активист» колхозэ механик карыса. Отын но со кык ар ужа. 

— 1966-тӥ арын май толэзьын пленум луэ. Отын «О механизации, химизации сельского хозяйства» шуэм постановление потто. Ципьяе «Сельхозтехникалэсь» нимаз ёзэтсэ кылдытыны малпало. Азьвылэз филиал гинэ вал ук, отын мастерской гинэ вань вал. Табере ас понназ «Сельхозтехника» кылдытыны ужпум пуктӥськиз. Трос ужано луиз соку: выльысен ваньзэ ӝутоно, юртъёс но ӧй вал. «Сельхозтехникае» Сергеев Иван Ивановичез заведующий карыса тодмосто. Указ потэм бере, со монэ механизированной отрядлэн начальникез карыса ужаны ӧте. Мон соглаш луи но 1966-тӥ арын ужаны лыктӥ. Ми пӧртэм ужъёсын выримы: торф, кыед, изваска куямы, отрядэн колхозъёсын ужамы. Тракторъёс вуылӥзы ми доры. Со тракторъёсты эскерон-чаклан понна цех лэсьтытӥз Иван Иванович. Со мыным отын инженер-технолог луыса ужаны ӵектӥз. Азьло комбайнъёсын ужай вал ке, со дырысен тракторъёсын ужаны кутски ини. Казане базае ветлӥмы, Харькове мынэммы но вал, отын котькуд республикалы воштос ёзъёс висъяса сёто вал. Кӧня пол мынӥ меда мон отчы… 90-тӥ аръёсы бартерен но ужамы, — шуэ воргорон.

Александр Павловичлэн верамъёсызъя ик валаны луиз, макем со ас ужезлы сётскемын луэм, макем ӟеч аслэсьтыз ужзэ быдэстэм. Со дыръёсы шутэтскон нуналъёсты но тодытэк ужаллям. Александр агайлэн ужам вакытаз трос лэсьтӥськонъёс луиллям «Сельхозтехникаын». Выль ар праздник дыръя но шутэтскон нуналъёсты тодымтэзы соос. «Али мон паймисько, кызьы дас нунал шутэтскыны быгато адямиос? Ми сыӵе секыт условиосын но ужаськеммы — шутэтскон нуналъёсмы но ӧй вал. Комбайнэз ремонт карон депо лэсьтӥмы, собере комбайнъёс вайыны кутскизы. Татарстанын, Балтась районын толалтэ комбайнъёслы ремонт но каро шуыса милесьтым ужмес ушъяса возьмато вал. Мастерской, конторъёс, квартираос лэсьтыны кулэ вал — ваньмыз та ми вылын луиз. Трос ужъёс лэсьтӥськизы соку татын, мазэ веранэз. Иван Ивановичез, ужаны быгатэм бере, Балтасе управляющий карыса басьтӥзы. Харьковысь Т-150 шуэм тракторъёс бертыны кутскизы. Соку соос кужмо, умой тракторъёсын лыдъяськизы, соослы нимысьтыз эскерон-чаклан кулэ вал, нимысьтыз вӧй, дыраз чаклано но луиз. Валады, дыр, ини, уже мыным туж кельшиз шуыса. Соин  пенсие потытозям но, 2000-тӥ арозь, отын тырши. Туж трос уже сярысь вераны быгатӥсько, ваньзэ вераса но уд быдты», — ватса Александр Павлович.

Нырысь пиосмурт Ципьяысь общежитиын улэ, шутэтскон нуналъёсы гуртаз бертыса ветлэ. Со общежитиын улӥллям трактористъёс, комбайнёръёс — огъя вераса, тросэз ужасьёс. 1966-тӥ арын соос Ципья гуртысь Нина нимо нылэн кузпалъясько. Нина апай бухгалтер луыса ужам та организациын ик. «Мон весь бухгалтерие пырыса ветлӥсько вал уж ласянь, озьы ик тодматскимы. Со дырысен ӵош ини», — валэктэ Александр агай.

Нина апай но, кузпалэз кадь ик, огшоры семьяысь. Со 1939-тӥ арын Ципья гуртын ворсдкем. Анаен-атаез колхозын ужам, семьяязы соос тямыс кузя нылпиос луиллям. Туннэ нуналэ кыкез соос пӧлысь улэп вылэм али.

— Мон 8-тӥ классэз йылпумъяй но мукет ӧй дышетскы ни. Киров улосвылэ ужаны кошки. Со дыръёсы тазагес муртъёс палэнэ ужаны ветлӥзы. Кин кызьы быгатӥз, озьы улӥз ини, — вераськонамы итӥське Нина апай. — Отын шӧдскымон кема ужай, собере та пала бертӥ. Ужаны интыяськи бухгалтер луыса «Ципьяысь Сельхозтехникае». Кӧня ар ужамме уг тодӥськы ни, но пенсие 1994-тӥ арын нылпи садысен потӥ. Отын нянечка луыса ужай.

Нина апай ужзэ яратыса быдэстэм, кылкутӥсь ужась луэм. «Бухгалтериын ужан секытгес вал, нылпиосын — капчигес. Но соиз но, таиз но ужъёсы кельшизы. Нылпиос шорам гинэ учкыса пуко вал, сыӵе яратӥсько вал мон соосты. Бухгалтериын ведь секыт, весь кагаз ужъёсын выроно. Трактористъёсты кыскано, «малы уд ужаськы» шуыса (серекъя). План тырмытоно, куддыръя изён но ӧз йӧты. Нош детсадэ мынӥськод, нылпиосын шудӥськод, капчи мылкыдын бертӥськод».

Нылпиосты туж яратэ ке но, Нина апайлы, жаляса верано, анай луыны кылдымтэ. Туннэ нуналэ кузпалэнызы кыкназы Ципьяын уло соос. Тунсыко, улоно юртсы азьвыл «Сельхозтехникалэн» квартираез луэм.

Кыкназы ик кузпалъёс ужазы гажамон ужасьёс луиллям, гуртын но гажамон адямиос соос. Грамотаос сярысь вераськон потэм бере, Александр Павлович шуиз, кагазъёсты ноку но кулэ ӧз кары шуыса. Ужез, пе, быдэстэм ужъёсъя дунъяно.

... «Сельхозтехника» организация кема аръёс ӧвӧл ини. Соин азьло луэм бадӟым, гурласа улэм «Сельхозтехникалэсь» Александр Павлович мӧзме. Трос аръёс ортчыса но, со ужзэ уг вунэты, ӵем гинэ тодаз вае со валче ужам эшъёссэ, ас кужыменыз тупатэм техникаез, ужъёсызъя городэ ветлэмъёссэ. «Яратыса ужам интыужез вунэтыны уг луы вылэм», — шуэ со.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: