Тагашур гуртысь гажамон песянайлы — Конькина Екатерина Александровналы — 90 арес

Тагашур гуртысь гажамон песянайлы — Конькина Екатерина Александровналы — 90 арес

15-тӥ толсуре 90 аресъем юбилейзэ пусйиз Екатерина Александровна Конькина — узыр анай но песянай, ӵужанай. Юбилярез вордскем нуналэныз ӟечкыланы вуизы ёросысь кивалтӥсьёс — Балтась ёрослэн главаезлэн воштӥсез Наиль Сабирзянов, социальной дурбасьтонъя ёзэтлэн кивалтӥсез Алсу Гатиятуллина, озьы ик Ципья гурт поселенилэн главаез Азат Нотфуллин но «Труд» обществоысь валтӥсь зоотехник Василий Кумаев. Соос Екатерина Александровналы РФ-лэн Президентэзлэсь ӟечкылан открытказэ но Балтась ёрослэн главаезлэсь Таукарон гожтэтсэ сётӥзы, кузьымъёссэс кузьмазы.

— Тӥледыз гажаса, ӟеч мылкыд каронъёсмес вуттыны вуимы дорады, — кутскизы веранзэс кивалтӥсьёс, Екатерина Александровналы вазиськыса. — Тӥляд улон сюресты адӟем карымон, егитъёслы примере пуктымон. Секыт но сютэм аръёсты чидаса но, жугиськонлэсь бервылъёссэ ас вылады шӧдыса но, тӥ ӧд сётске. Колхозын ужаса, эшлыко семья кылдытыса, улондэс чебер азинтӥды. Шуг-секытъёс палэнтӥ мед ортчозы, пересьмон даурдэс каньылэн, матысь адямиосты вӧзын ортчытыны мед кылдоз.

«Та мынам бадӟым празднике…»

Та ӟечкылан кылъёссэс веракузы, кивалтӥсьёс ӧз но тодэ, дыр, макем шонер, юбилярлы тупамон кылъёс веразы соос.

Улонын кышномурт троссэ адӟем. 11 аресысен, ӵапак ож вакытысен, трос ужаны тупам пичи Катялы. Колхоз бакчаын жадьытозяз, ньыль пыдын ужаса ветлэмъёсыз али кадь син азяз. Со дыръёс ноку но уз вунэ ини.

— Ми туж секытэн будӥмы, нылы, — вера Екатерина Александровна. — Оло, соин но милям поколениысь адямиос чидасесь, дыр. Тӥледлы но, вуоно поколениослы но милесьтым адӟем шуг-секытъёсты адӟыны медаз тупа вал ини. 

Тагашур гуртын Екатерина Александровна самой мӧйыосыз пӧлысь гинэ ӧвӧл, самой гажано адямиосыз пӧлысь но одӥгез луэ. Та гуртын вордскыса, со вань улонзэ Тагашурлы сӥзе. Кузпалзэ но та гуртысь ик шедьтэ (жаляса вераны кулэ, Николай кузпалэз 2016-тӥ арын кулэм). Сизьым нылпиосты будэтыса (Татьяна, Любовь, Борис, Анатолий, Алевтина, Сергей, Лариса), гуртын бадӟым но эшлыко семья луыса улӥллям. Пенсие потытозяз но нылкышно гурт удысын тыршем — колхозын ыжъёсты, валъёсты, ветылъёсты сюдэм.  Киын кӧжы, вика но турнано, нюлэс но кораса ветлоно луэм — ваньзэ киын ужаны тупам. Но шуг-секытъёс солы кужмогес, юнгес луыны юрттӥллям.

— Туннэ мынам бадӟым празднике. Сыӵе нуналэ котькин малпаське, дыр, ортчем улонэз сярысь. Улонын лэсьтэм ӟеч ужъёсыз, быдэсмем яке быдэсмымтэ малпанъёсыз сярысь. Мон аслэсьтым ортчем аръёсме тодам вайыса, тазьы вераны быгатӥсько: мынам улонэ капчи ӧй вал ке но, мон шудо адями. Луизы вӧсь луон дыръёс но, пальпотон вакытъёс но. Но самой валтӥсез — пересьмон даурам мон огнам ӧвӧл, вӧзам яратоно нылпиосы. Туж шумпотӥсько, нылпиосы куспазы тупаса, эшлыко уло шуыса. Арлыдэз шоры учкытэк, котькуд анай понна со самой валтӥсез, — малпанъёссэ шара вера юбиляр.

Екатерина Александровна кема аръёс ӵоже юртаз трос кузя улӥсь нылпиосыз, внукъёсыз но соослэн семьяоссы понна валтӥсь кенешчи, бадӟым семьяез огазеяса улӥсь анай но песянай луиз. Туннэ нуналэ но со озьы. Песянаен ӵош вордскем юртазы уло пиосыз, Галя кенэз, озьы ик Арина внучкаез. Котькуд нылпизэ, внуксэ но вань матысьёссэ яратыса, соослэн утемзы улсын шумпотыса улэ песянай.

— Анаймылы тазалык сӥзиськомы, милемыз кема-кема аръёс ӵоже шумпоттыса улыны мед кылдоз али солы, — шуо юбилярлэн нылпиосыз. — Солы пумтэм тау кариськомы, милемыз пыд йыламы султытыны, ӟечезлы дышетыны быгатэмез понна. Ноку но дӥськутлы но, сиёнлы но ёрмыса ӧм улэ. Та анай-атаймылэн тыршемез ини.

Екатерина Александровнаез вань нылпиосыз, внукъёсыз матын каро, ӵемысь куное ветло. Юбилееныз ӟечкыланы но вуиллям вал. Галя кенэз но сое аслэсьтыз анайзэ кадь уте, котьма ласянь юрттэ. Анайзызэ ӟечкыласа, со но вера:

— Анаймы туннэ нуналэ узыр анай гинэ ӧвӧл, узыр песяй но, ӵужанай но: солэн 11 внукъёсыз но 10 правнукъёсыз вань. Соослы шумпотыса, сӧл-тазаен улыны мед кылдоз али солы. Нош ми котьку вӧзаз луомы.

Яратӥсь, гажась адямиосыз вӧзаз луыку, пересьмон но сокем кышкыт ӧвӧл Екатерина Александровналы. Малы ке шуоно со тодэ: матысьёсыз сое ноку огназ уз кельтэ.