Тани мар верало егитъёс «Дуслыкын» ужамзы сярысь

Михаил Камаев, Сала-Кушкет:

— Армиысь бертэм дырысен гуртын, колхозын ужасько. Огъя вить арлэсь уногес луэ ини. Нырысь вал комбайнёрлэн юрттӥсез, табере тани — «КамАЗ» машинаен ужась. Кыӵе уж косӥзы, сое быдэстӥсько — сенаж, силос, турын, куро нуллӥсько. Кемалась ӧвӧл Марийской палан сенаж тыримы. Егит ке но, ужлэсь уг кышкаськы, ачим ваньзэ карыны тыршисько — мазэ ке ӧд тоды вылэм, юрттӥсьёсмы вань. Со паласен шуг-секытъёсмы ӧвӧл.

Евгений Петров, Ӟаны:

— Милям коллективмы туж умой, шулдыр, куспамы но тупаса ужаськомы — механизаторъёсын гинэ ӧвӧл, ваньмынызы но. Озьы ӧй луысал ке, городэ ужаны кошкысал ни (серекъя). Мон егит ке но, опытэ трос ӧвӧл ке но (2014-тӥ арысен, армиысь бертэм бере ужаны кутски), мыным выль техника но оскизы. Али тани, гужем, «К-744» бадӟым тракторен ужасько — тросгес бусыын усыясько, гырисько. Толалтэ ужасько «МТЗ-82» тракторен. Соиныз трос учыре фермае сиён нуллӥсько, фураж. Куазь сӧриськиз ке но, ужтэк ум пукиське. Герыосыз ремонт карыны кулэ луэ, нош кыӵе ке мукет ужъёс но луыло. Озьы тӥни ужаськом ни: быгатэмзэ кариськом, быгатымтэзэ опытной механизаторъёслэсь юалляськыса ужаны дышетскиськом.