Тӥледлы но мед удалтоз!

Конкурсэз малпасьёс но радъясьёс котьку возьмало калыклэсь пыриськемзэ. Пичи-а со, бадӟым-а — котькуд адями шумпотэ кузьымлы. Шаплы сямо адямиос трос луизы ке, радъясьёслэн но йыразы пӧртэм пумо малпанъёс лыкто, со сыӵе бадӟым стимул луэ. 

Бадӟым Лӧзяысь студент нылаш Полина Плотникова, Улын Ушмаысь дано шутэтсконысь дышетӥсь Екатерина Иванова но Вылын Ушмаын улӥсь гурт возёс удысын ужасьёслэн профсоюзэнызы кивалтӥсь Марина Ишмурзина ӧтеммылы шумпотӥзы но дыраз лыктӥзы. Соос ас мылкыдъёсынызы люкиськизы, малпанъёссэс веразы. Ми понна сыӵе сюлмо вераськонъёс котьку шумпотон ваё. Удмурт кылын вераськон эшшо но тросгес шуныт пыртэ. Сюлмысь ӟечкыласьком тӥледыз!

— Эшшо но тросгес конкурсъёс кылдытэ на, ми шумпотыса котькудаз пыриськыны тыршом. Асьмеос валаськом, кыӵе секыт али адямиосты конкурсъёсы кыскыны, соин мылкыдды медаз кысы, азьлань мынэ, — шуизы соос, ческыт кузьымзэс басьтыкузы.

Таӵе дӥсьтӥсь адямиос луыку, оскон кылдэ — ужмы юнме ӧвӧл. Сыӵе ӝутскем мылкыдын ужаны но капчи, малпанъёс но тросгес лыкто.

Гажано лыдӟисьёсмы! Газетлэн бамъёсаз но мерлыко сетьёсаз ялэм конкурсъёсы пыриське, куке но тӥледлы но одно шуд пальпотоз!