Тыл но, ву пыр но потэм Мария апай

Мария Аркадьевна Сизнерысь ачиз кадь ик усто, чебер воргоронэн Василий агай Баймановен семья кылдытэ. Василий агай туж визьмо луэ, со колхозын электриклэсь ужзэ быдэсъя. Мария апай ужан сюрессэ колхозын пӧртэм ужъёсты быдэсъяса кутске. Собере 17 ар туж кылкутымон ужын тырше: Сизнер гуртысь медпунктын санитарка луыса ужа. Василий агаен соос куинь нылъёссылы — Натальялы, Надеждалы, Ниналы — но Николай пизылы улон кузьмало. Соослэн котькудзы, асьсэ парзэс шедьтыса, семья кылдыто. Василий агай гинэ  1976-тӥ арын 2 феврале, шудтэм учыре шедьыса, кулэ. Озьы Мария апай туж вазь карттэк кыле. Солы соку 34 арес, нош Василий агайлы 35 арес гинэ луэм. Мариялы ньыль нылпилы атай но, анай но луыны тупа. Али со вакытэ аслаз анаез Ирина апай, Василий агайлэн анаез но вордскемысеныз сӧсыр луэм сузэрыз сярысь сюлмаськон но со вылын луэ. Соос ог-огзылы юрттыса, улонысь шуг-секытъёсты ӵошен вормыса уло, ужась, усто нылпиосты будэто. Мария апай пересьёсты но гажаса, утьыса сопал дуннее келя.

Юбилей пусъён нуналъёсаз гажано песянай но ӵужанай 11 внукеныз (Наташа нылызлэн куинь, Надяезлэн куинь, Нинаезлэн кык, Николаезлэн куинь пиналъёсыз) данъяськыны, 10 правнукъёсызлы шумпотыны быгатэ. Жаляса верано, Наташа нылыз гинэ туннэ нуналэ пӧлазы ӧвӧл, малпамтэ шорысь туж вазь кулӥз. Пересьмон нуналъёсаз солэн тужгес бадӟым шудэз — нылпиосызлэн куспазы эшъяськыса, тупаса улэмзы. Нылъёссы семьяосынызы Карек-Серма но Вукогурт гуртъёсын гинэ уло, вордскем юртазы но сюрессэс уг вунэто. Тужгес шумпотымонэз, атай юртсы но оскымон киосын. Мария апай Николай пиеныз но Елена кенэныз улэ. Туннэ со туж шудо песянайёслэн одӥгез луэ. Али со егит дырысь эшъёсыныз но — велосипедэныз но балалайкаеныз — уг люкиськы.

Николай пиез, Ципья шоръёзо школаез йылпумъямез бере, 1992-1994 аръёсы армиын служить каре. Армиысь бертэмез бере, 1995-1998 аръёсы колхозын пӧртэм ужъёсын ужа. 1998 арысен туннэ нуналозь 24 ар ини трактористлэсь ужзэ быдэсъя. Солы азьло ДТ тракторъёсын но ужаны тупаз, нош али 5 ДТ тракторез воштыны быгатӥсь К-704 тракторен кивалтэ. Со ини трос аръёс ӵоже колхозын гинэ ӧвӧл, ёросын но азьмынӥсь механизаторъёслэн одӥгез луэ. Со 2012-2022 аръёсы «Смаиль» СХПК-лэн Данъян грамотаосыныз, 2012, 2016, 2018, 2019, 2022 аръёсы Балтась ёрослэн главаезлэн Таукарон гожтэтъёсыныз пусйиське. Шутэтскон висэз луыку, мызганэн но шудэ. Николай асьсэ гуртысьтызы ик Елена нимо нылын семья кылдытэ. Адӟем карымон семья луыса уло соос. Елена но шоръёзо тодон-валан басьтэмез бере колхозын ужаны кутске. 2003 арысен ини 19 ар Смаиль фермаын (берло 5 арзэ мегафермаын) скал кыске. Со но 2017-2022 аръёсы котькуд арез азьмынӥсь пудо утись луыса, возёслэн Данъян грамотаосыныз пусйиськиз. 2018 арын ёросысь гурт возёсъя управленилэн Данъян грамотаеныз, 2016, 2018, 2022 аръёсы Балтась ёрослэн главаезлэн Таукарон гожтэтъёсыныз пусйиськиз. Таӵе кузьымъёс туж ӧжыт адямиослы гинэ сётӥсько уго. Пиезлэн но кенэзлэн та азинсконъёсаз песянайлэн люкетэз бадӟым. Дорын оскымон анай луыку, соос кыкназы но ялан ужын, тынӥсь сюлмын уже кошко, тынӥсь сюлмын ужысь берто. Али дорын куинь кысконо скалзы, ветылъёссы, кунянъёссы но вань. Николай но Елена кык ныл но одӥг пи будэто. Быдӟым нылзы Татьяна Тагашур гуртын фельдшер луыса ужа. Александр пизы армиысь бертэмез бере Казане ужаны интыяське. Покчи нылзы Наталия Ципья шоръёзо школаын дышетске.

Сизнер гурт аслаз чебер луэменыз но ужась адямиосыныз трос гуртъёслы адӟем карымон. Гурт бадӟым ӧвӧл ке но, сизнеръёс «Смаиль» возёслэн валтӥсь ужась кужымез луо. Мария апай улон гумырзэ вордскем гуртэзлы сӥзьыса, отын ик чебер пересьмон нуналъёссэ ортчытэменыз туж шудо. Солэн улон сюресэз тросэзлы адӟем карымон, со юн мылкыдо нылкышноослы гинэ тупась улон сюрес.

Солтан Фатихов,

Смаиль гуртысь ветеранъёслэн советсылэн председателез