Удмурт югдытӥсьёслысӥзьыса…

Дунне вылын 5500 пала пӧртэм кылъёс, котькудӥз соос тунсыко но аспӧртэмлыко. 27 шуркынмонэ Удмурт кыллэсь нуналзэ пусъёмы. Ӵапак удмурт кыллэн нуналэзлы но удмурт калыклэн югдытӥсьёсызлэн юбилеезлы сӥземын вал вылӥын пусъем ужрад но.

Юнме верамтэ, вылды, Д. Яшин: «Аслэсьтыд кылдэ яратытэк, мукетсэ уд дышы гажаны». Туала вакыт понна туж мур веран. Туннэ нуналлы удмурт семьяысь нылпилэсь копак ӟуч кылын вераськемзэ кылӥськод ке, паймиськод: малы зэмос удмурт гуртын, удмурт семьяын нылпи анай кылзэ тодытэк но валатэк будэ?! Мон понна та валантэм югдур. Но таӵе секыт югдуре вуэм кылмы, «чутыса» ке но, азьлань сюрес лёгыны тырше.

Иван Михеев, Григорий Верещагин, Максим Прокопьев, Иосиф Наговицын, Михаил Можгин, Константин Яковлев, Кедра Митрей, Трокай Борисов, Кузебай Герд, Ашальчи Оки — та нимъёс удмурт калык понна туж тодмоесь луо. Соос — удмурт калыкез ӝутӥсьёс, удмурт кылэз утисьёс, удмурт адямиос понна вань кужымзэс, улонзэс сётӥсьёс, удмурт Элькунэз кылдытӥсьёс но туала удмурт кыллы «емыш» пуктӥсьёс. Мар меда верасалзы соос туннэ югдур сярысь? Кыӵе визьнод сётысалзы туала поколенилы? Малпасько, соос кужымзэс жалятэк басьтӥськысалзы та юан борды. Но туж потэ вал, соослэн визьбуро малпанъёссы юнме медаз кыльысалзы шуыса.

2023 ар юбилейной луэ дано гожъяськисьёсмылы — Кузебай Гердлы но Ашальчи Окилы, соослэн вордӥськемзылы 125 ар тырмиз, озьы ик удмуртъёслэн ужъёссыя комиссарлэн, кун ужчилэн Иосиф Наговицынлэн вордӥськемезлы 135 ар тырмиз. 

Ужрадэз радъязы Вань удмуртъёслэн «Удмурт Кенеш» огазеяськонзы но Удмурт Элькунысь «Дышетон удысысь йӧскалык ужпумъёсты эскеронъя тодос институт». Ӝытэз усьтӥзы соослэн кивалтӥсьёссы Андрей Иванович Ураськин но Надежда Ивановна Ураськина. Соос тодмостӥзы ӝытлэсь пуштроссэ но югдытӥсьёслэсь валтӥсь ужъёссэс, огъя соослы сӥзем ужрадъёслы йылпумъянъёс лэсьтӥзы.

Удмуртиысь Кун Кенешлэн тӧроезлэн воштӥсез, Удмурт Элькунысь Кун кенешлэн тодосъя, дышетонъя но граждан обществолэсь институтъёссэ азьланьтонъя ялан ужась ӧрилэн тӧроез — Татьяна Витальевна Ишматова аслаз веранъёсаз туж мур малпанъёс пыртӥз:

— Туннэ та ужрадлы сӥземын туж чебер ним — «Ойдо, эше, вераськом». Зэм но, асьмеос пӧртэм ужрадъёсын трос гинэ вераськиськом, кенешиськом, кызьы пыӵатыны асьме калыкмылы аслэсьтыз анай кылзэ яратонэз, кызьы синмаськытыны асьме удмуртлыклы, удмурт лулчеберетлы мукет калыкъёсты. Но туннэ тодамы вайиськом, син азьын возиськом со адямиосты, кудъёсызлы луыса асьмеос 100 ар ортчыса но быгатӥськом дунъяны удмурт кылмес но, солэсь пуштроссэ но солэсь кужымзэ. Туннэ, мар меда, кыӵе меда юанъёсын вазиськысалмы асьмеос Ашальчи Окилы но, Кузебай Гердлы но, Трокай Борисовлы но, Максим Прокопьевлы но, Иосиф Наговицынлы но? Нырысь ик асьмеос тау карыны кулэ со адямиослы, кудъёсыз ӧз сётэ вунэтыны та нимъёсты. Кема аръёс ӵоже соос вунэмын вал ке но, калыклэн сюлмаз, улоназ, историяз соос котьку но улӥзы. Туннэ нуналозь но соосты усьтыны тыршиськом, но со дыре ик лыдӟыса соослэсь ужъёссэс, малпанъёссэс, кыӵе соос туалаесь луо шуыса... Мынам тау кареме потэ Татарстанын но Башкортостанын улӥсьёслы, кудъёсыз уг сёто вунэтыны Максим Прокопьевез, малы ке шуоно, зэм но, туннэ нуналозь синпелет ӧвӧл ке но, адями улэ со кема, кӧня со сярысь малпасько, кӧня уло солэн ужъёсыз но кӧня адӟиськом солэсь кельтэм пытьызэ. Ми трос лэсьтыны тыршиськом удмурт кылэз азинтон понна. Жаляса верано, трос луонлыкъёсмы ӧвӧл но тужгес мур сюлэмез бышке соку, куке удмуртъёсыз ик косыса валэктоно, малы кулэ утьыны удмурт кылэз. Асьмеос ог-огмылэсь мылкыд басьтӥськом но 
валаськом: асьмеос мынӥськом шонер сюрес кузя, малы ке шуоно, кызьы вера статистика, котькуд нунал быре, улонысь кошке, кыӵе ке калыклэн кылыз. Туж уг пот вал, асьме удмурт кылмы сыӵе кыл мед луоз шуыса. Жаляса верано, берпуметӥ ортчем чотанъя, статистикамы туж ик умой ӧвӧл, удмурт калык сярысь возьматэ: асьмеос куштӥськиськом асьме удмурт кылмылэсь но удмуртлыкмылэсь но шуыса. Но та юанэз сэрттыса-пертчыса валаськом, татын трос янгышъёс лэсьтэмын вал, но соку ик валаськод, буйгатскыны туж но луонлыкмы но дырмы ӧвӧл, ужано но тыршоно. Аслад сюлмыд буш луиз ке, номыре уз пӧрмы. Соин ик кулэ ог-огмес бурдъяны, Ашальчи Окилэсь кылбуръёссэ лыдӟыса, шӧдэме потэ асьме нылкышномуртъёсмы туж шудоесь луэмын ни шуыса, дышетэмын ини асьмеос яратыны но, гажаны но. Со дыре ик тросгес кулэ дыр будэтыны сыӵе анайёсты, кудъёсыз асьсэ нылпиосынызы вераськозы, данъяськыса чебер анай удмурт кылынызы. Кузебай Гердлэсь лыдӟиськод ке ужъёссэ, котькуд дышетӥсьлы номыр выльзэ но малпано ӧвӧл. Ваньмыз рос-прос гожъямын, кызьы кулэ методикаосъя но, кыӵе мылкыдын но басьтӥськыны кулэ, вунэтоно гинэ ӧвӧл соос сярысь, возёно син азямы. Трокай Борисовлэн кутскем ужъёсын мерттаны кутскиськод ке аслэсьтыд вамышъёстэ, котьку но шӧдӥськод, кыӵе вал со кужмо адями, кыӵе азьлане малпаськись адями вал. Трос-а меда асьме пӧлын сыӵеосыз, но туж потэ вал мед луозы, асьмеос но быгатӥськом одӥг вамыш ке но лэсьтыса, соос доры матэгес луыны. Иосиф Наговицынлэн быгатонлыкез, кусып тупатыны, возьматыны мукет калыкъёс азьын удмурт калыклэсь кужымзэ но документъёсыз, кудъёсыз солэн кинюртэменыз кельтэмын, возьмато со 
сярысь, кыӵе кун политика удыс пыр со ӝутыны тыршиз удмурт кылэз но, удмурт калыклэсь югдурзэ... Асьмеос котьку шуиськом, адями уг бырйы, кин луыса вордӥськыны, но асьмелы сыӵе узырлык кузьмамын, удмурт луыса вордӥськыны, соин асьме азьын сылэ туж бадӟым ужпум — утьыны асьме музъеммес, утьыны асьме Элькунмес но азьланьтыны сое... Берпуметӥ кылъёсме туннэ вераме потэ Максим Прокопьевлэсь кылъёссэ, малы ке шуоно туннэ солэн юбилеез ӧвӧл ке но, туж лэчыт но туж шонер верамын вал солэн кылъёсыз: «Котькуд муш аслэсьтыз чечызэ аслаз умортояз мед ваёз». Ваньмы мушъёс кадь тыршыса, мед быгатомы та дуннее пайда вайыны, чечы бичаны, шедьтыны, котькуд урод учырын но умойзэ, чылкытсэ, сайкытсэ но вайыны сое асьмелэн удмурт дуннеямы, удмурт калыклэн улоназ... Асьме киосамы туж тросэз, эшъёс, ноку но медаз юскиське, ноку но медам чигиське, азьлань, пӧсь мылкыдын, усьтэм сюлэмен, удмурт калык понна.

Татьяна Витальевна зэмзэ ик туж шонер вераз, котькуд удмурт адямилы адӟем карымон луыны кулэ. Сӥё-дано тодосчиослэн, тыршисьёслэн кужымзы азьпалан калыклы но кыллы бадӟым сюрес мед вӧлдысал, бордазы итӥськыса егитъёс но бадӟымесь вормонъёсы мед вуысалзы.

Удмурт Элькунысь лулчеберетъя министрез — Владимир Михайлович Соловьёв но удмурт югдытӥсьёслэн пайда пыртэмзы сярысь мур веранъёссэ шараяз:

— Вераськон бордысен ваньмыз кутске. Кутске история, кутске ог-огдэ валан, кутске кыӵе ке сюлэмшугъяськонэн тунсыкъяськон. Туннэ туж шумпотӥсько: ужрадын туж трос егитъёс. Соос та ужез азьланьтӥсьёс. Асьмелэсь данъяськымон удмуртъёс историе мед кылёзы, выль нимъёс отчы мед пырозы. Котькуд даурлэн аслаз геройёсыз. Соослы секыт вал, туннэ но капчи ӧвӧл. Таӵе ужрадъёс мед луысалзы тросгес. Та нимъёс асьме пушкын мед луозы. 

Тунсыко докладъёссы пыр котькуд пукись понна лэчыт малпанъёссэс вуттӥзы кылосбур тодосъёсъя кандидат, М. Горький нимо Литературной институтысь кылысь кылэ берыктонъя кафедраысь доцент Вера Григорьевна Пантелеева но истори тодосъёсъя кандидат, Глазкарысь шаертодонъя музейлэн истори ёзэтысьтыз валтӥсь тодос ӧнерчи, доцент Люция Аполлосовна Волкова. Аслаз вераназ Вера Григорьевна Удмурт Элькунлэн кылдэмезлы но югдытӥсьёслэн валтӥсь ужъёссы вылэ пыкиськыса, удмурт калыклэн туала югдуре вуэмез сярысь ивортӥз. Татын тунсыко пуктэмын вал Кузебай Гердлэн «Удмурт книгаез вӧлдон сярысь» но «Малы удмурт кыл кулэ?» статьяосыз. Паймымон кадь, 100 ар талэсь азьло сюлмаськытӥсь юанъёс али дырлы но асдыръемесь луо на. Озьы ик шараямын вал Ашальчи Окилэн «Сылал» веросэз. Татын тодмостӥськиз, кыӵе секытэн со дыре сётӥськиз дышетскон. Тросэз веранъёс пиналъёслы сӥземын вал. Люция Аполлосовналэн докладэз Иосиф Наговицынлэн улон сюресэзлы сӥземын вал. Татын пусъемын вал комиссарлэн валтӥсь ужъёсыз. Удмурт калык понна ӟырдыт сюлэм йыгаськемез али ке но бадӟым тылэн гома, уг кысы.

Шумпотымон люкетэз герӟаськиз Кузебай Гердлы но Ашальчи Окилы ар куспын сӥзем вожвылъяськонъёын вормисьёсты синпелет кузьымъёсын но дипломъёсын пусъён. Асьме Элькунысьтымы Кукмор ёросысь Лельвиж шоръёзо школаысь дышетскись — Таталова Ксения но Удмурт йӧскалык институтлэн кузьымъёсыныз пусйиськиз. Ӟечкыласьком!

Лулчеберетъя люкетэз но учкисьёслы ӝутскем мылкыдъёс пыӵатӥз. Кузебай нимо удмурт кун йӧскалык гимназиысь Эстрада кырӟанъя «Выль крезьгур» студиысь нылпиос кивалтӥсенызы Александр Владимирович Катковен, Ашальчи Окилэн кылбурезъя кылдытэм «Сюрес дурын» кырӟанэз быдэстӥзы. Туж усто но аспӧртэмлыко паласен кылӥськиз кырӟанлэн выль сямен чузъяськемез. Озьы ик нимысьтыз пусйыны кулэ на А. Мамонтов нимо, Эшъяськон орденэн пусъем, эктонъя но кырӟанъя «Италмас» академической кун ансамбльлэсь концертсэ. Задор мылкыдо эктонъёссы но кырӟанъёссы сюлэмез бугыртӥзы, капчи мылкыд пыӵатӥзы. 

Ужрадэз радъясьёслы но юрттӥсьёссылы бадӟым тау шуэме потэ удмурт кыллы бадӟым саклык висъямзы но ӧтемзы понна. Зэмзэ ик, аслэсьтыд кылдэ, калыктэ гажад ке, мукет калыкъёс но синмаськыса учкыны кутскозы, тунсыкъяськыны. Нош ас анай кылдэ но историдэ уд ке тодӥськы, азьпалан тонэ мукет калыкъёс но уз гажалэ! 

Ваньмыз асьме йырамы, асьме киосамы. Оскисько, азьланяз выль будӥсь поколениысь егитъёс но пиналъёс удмурт кылэз данъяса «Мон — удмурт!» шуыны чик но уз возьдаське!