Удмурт калыклэн эшшо одӥг ыштонэз

Удмурт калык понна тыршись «югыт йыръёс» нуналлы быдэ ужало кылмес но лулчеберетмес мукет калыкъёслы дано возьматон но синмаськытон понна. Тодосчиослэн ужъёссы пыраклы удмурт калыклы пайдаё но кулэ луыса кылёзы.

Валей (Валентин) Кельмакович Кельмаков — удмурт грамматика удысын тодмо но бадӟым букваосын гожтэм тодосчи луэ. Быдэс ужан сюресаз со ас калыкез понна тыршиз, удмурт грамматикалэсь историзэ, диалектъёслэсь пӧртэмзэс рос-прос эскериз но студентъёслы трос кулэ луись тодон-валанъёсты сётӥз. Туэ Валей Кельмаковичлы 82 арес тырмысал. 

Улон сюресэз солэн огшоры удмурт гуртысен кутскиз. Вордӥське со бускель Кукмор ёросысь Тыло гуртын 14 толсуре 1942 арын. Анай-атаез огшоры колхозын ужасьёс луо. Гуртаз ик покчиёзо школаын дышетске, собере Ошторма-Юмья шоръёзо школаын дышетсконзэ азьланьтэ. Школазэ йылпумъяса, Удмурт Элькунысь педагогикая удмурт кун университетысь историко-филологической факультетаз дышетскыны пыре. Институтысь кун экзаменъя комиссилэн дэмламезъя, СССР-ысь Тодосъёсъя академилэн Кылтодонъя институтаз аспирантурае дышетскыны пыре. Дышетсконзэ йылпумъяны арми радъёын службаез бере гинэ йӧтэ. 1968-1971 аръёсы Удмурт научно-исследовательской институтын ужа. 1970 арын Кылтодонъя институтын «Удмурт кыллэн кукмор диалектэз» темая кандидатской диссертацизэ уте. 1971 арысен педагогикая удмурт институтысь удмурт кылъя но литературая кафедраын ужа. 1993 арын аслэсьтыз «Удмурт диалектъёслэсь фонетиказэс кылдытон но азьланьтон» темая докторской диссертацизэ уте. 

Малпасько, Удмурт кун университетысь удмурт кылосбуръя факультетын (табере ини — удмурт кылосбуръя, финно-угроведениея но журналистикая институтын) дышетскем студентъёс али ке но Валей Кельмаковичлэсь лекциоссэ но семинаръёссэ юн тодазы возё. Дышетэмъёсыз пель сьӧрын али но чузъясько кадь, нош куараез вӧтъёсы пырылэ. Бен, солэн туж вылӥ куронъёсыз вал, озьы ке но, уродэн вераны кыл ик уг берытскы. Солэн ик лэчыт верамъёсыз улонын кулэ луо, солэн дышетэмъёсыз уж удысын юртто. Аръёс ортчыса но солэн дано ужъёсыз тодосчиос понна пайдаё луозы на.
Ачим солэн «бурд улаз» дышетскемын бере, кӧня ке малпанъёсме но вераме потэ...

1-тӥ курсысь студент котьку нырысь ассэ возьматыны тырше, тужгес но гуртысь лыктэм егит адями пыр-поч котькуд лекциез гожъя, семинаръёслы-практикаослы юн дасяське. Сыӵе ик вал ми но — нылашъёс но пиос, кудъёсыз тыршизы троссэ экзамен-зачётъёсты «автоматэн» сётыны. 
Нырысетӥ курсын ик «бадӟым» студентъёс веразы: «Валей Кельмаковичлэн дисциплинаосызлы дасяськыса улӥд ке — умой луоз», «Валей Кельмаковичез ортчид ке, быземед луэ ини», «3 курсозь дышетсконды капчиен сётӥськоз на», «Выль ардэ книгаос сьӧрын пукыса ортчытыны дасяськы», «Улонэз ӧд адӟе на, пичиос», — таӵе веранъёс егит дышетскисьёс вылэ бадӟым сюлмаськонъёс но кышканъёс кисьтӥзы. 

Зэмзэ вераса, дышетскон 1-тӥ куарусёнысен ик пушказ кыскиз: ӵукна — параос, ӝытазе — параослы дасяськон, бератаз пӧртэм тренировкаос, ужрадъёс, эшъёсын но пумиськыны дыр кулэ. Англи кылэз школаын дышетскем бере, капчиен сётӥськоз шуыса малпай, ӵапак мыдлань луиз: кунгожсьӧрысь дышетӥсьёс лыктэмен, выльысен англи кылэз дышетоно луиз, уйёсты изьытэк, куддыр бӧрдыса, общежитиын дышетскон дыръёс ортчизы. 
Нунал бӧрсьы нунал ортче, шутэтскон нуналъёсты шӧдыса ик уд вуттӥськы кадь. Дышетскон сяна номыр сярысь малпаськыны дыр ик уг тырмы вал. Каллен вуиз университетын дышетсконлэн куинетӥ сӥзьылэз, куке расписаниын адӟиськиз «Историческая грамматика удмуртского языка» дисциплина, улӥяз векчи букваосын преподавательлэн нимтулыз — В. К. Кельмаков. Пыдесъёс каллен дырекъяны кутскизы, синъёс курдаса адӟемысь ик дугдӥзы кадь, нош йырын миллионлэсь трос юанъёс кылдӥзы: мар азьланяз? 

Нырысетӥ лекция ик туж капчи мылкыд но трос юанъёс кылдытӥз. Малпаськонэ усимы туала книгаос, юрттӥсь методичкаос сярысь. Ваньмыз-а отын шонер? Кулэ-а туала нылпилы удмурт кыллэн научной терминъёсаз выйыны? Тросэз солэн верамъёсыз улонысь примеръёсын зэмлыксэ шедьтӥзы. Нош семинаръёсын туж тунсыко луэ вал дискуссия амалэн вераськыны. Янгышанъёс кышкан мылкыдъёс уг кылдыто вал, Валей Кельмакович котьку вералляз: «Йырад малпанъёсыд вань ке, соос шараясько, янгышаны кашкано ӧвӧл». 

...4 толэзь дышетскыса, выль ар праздникъёс бӧрсьы экзамен пуктэмын. Котькуд практикае юн дасяськыса, трос литератураез лыдӟыса, уйёсты изьытэк ортчиз одӥг семестр. Выль ар мылкыд копак быремын — экзаменлы дасяськоно, шулдыръяськонъёсты огдырлы вунэтоно. 

Али кадь син азям пуксе суред: экзамен азьын пуктэмын консультация, татын пыр-поч юанъёслы дасяськоно, валамтэоссэ юано. Дырмы юнме медаз ортчы шуыса, эшеным «шпораос» дасяны кутским. 4 толэзь куспын ортчем лекциосын но практикаосын ужам студентъёсты Валей Кельмакович тодманы кутскиз вал ни, нимъёсын гинэ вазиськылӥз. Со экзаменлэсь радъяськемзэ валэктыны кутскиз: экзаменэ 3 кузя гинэ пыромы, котькудӥз билетысь валтӥсь юанъёсты сяна, ватсам юанъёслы но валэктон сётыны кулэ луоз. Ми эшеным солэн кылъёсызлы саклык но ӧм висъялэ, ялан экзаменлы сётэм билетъёсыз дышетӥськом. Ӧм но шӧдэ, мар куспын со милям парта дорамы вуэм ни! Йырын соку ик малпан кылдӥз: «Дырызлэсь вазь экзаменэ недопуск ини та». Мылкыд куашказ, пушкын мар ке секыт луыны кутскиз кадь. Со кӧня ке дыр учкыса сылӥз но интыяз мынӥз, собере вераз:

— Котькуд студент тодэ, Кельмаковлэсь дисциплиназэ одӥг пол лыктыса нокин уз сёты. 3-лы сётӥд ке, соиз умой ини. Но, тӥ пӧлысь кӧня ке студентлы мон туннэ ик «автомат» пукто. 

Собере ньыль студентъёслэсь зачёткаоссэ куриз, соос пӧлын мон но вал. Мар ке гожъяз но, зачёткаосмес берыктӥз. Кыӵе вал милям паймеммы, куке зачёткаямы оценка сылэ ни вал. Шумпоттэммылы оскытэк, трос пол учким на зачёткамы шоры. 

Бакалавриатэз ӟеч йылпумъяса, азьлань сюрес быръён вакыт вуиз. Кин малпасал, но мыным Валей Кельмакович дорын магистратураез азьланьтыны ӵектӥзы. Трос малпаськыны дыр ӧй вал, соглаш кариськи. 

2 ар ӵошен диссертация гожтыса, кылтодосын но улонын кулэ луись тодон-валанъёс йырам вӧсь кадь кылизы. Студентъёслы аслэсьтыз тыршемзэ гинэ ӧвӧл, аслэсьтыз сюлэм шунытсэ но малпанъёссэ пыӵатӥз. Зэмзэ ик паймымон вал, кызьы со малпаське, кызьы текст шоры одӥг пол гинэ учкыса, сомында янгышъёссэ шедьтыны, пуштроссэ лыдӟыса, шонерзэ адӟыны быгатэ. 

Котькуд дышетӥсь — со бадӟым тодон-валан шыкыс, кудаз трос пӧртэм малпанъёс но индылонъёс. Валей Кельмаковичлэн со шыкысэз удмурт кыл понна, удмурт калык понна туж узыр но аспӧртэмлыко. 

Пумтэм жаль.. Удмурт кыл но кылтодос понна туж бадӥым ыштон... Сотэк но кышкыт дуннеысь эшшо одӥгез визьмо но югыт малпанъёсын улӥсь югдытӥсь кошкиз. Кӧня соос быдэс историмы понна. Соос — Кудъёсыз улонзэс но кужымзэс жалятэк тыршизы калык понна, егитъёсты шонерезлы дышетӥзы.
Валей Кельмаковичен люкиськон ужрад ортчиз Ижкарысь «Ангел» юртын 30-тӥ толсуре. Тодосчиез ватӥзы вордскем Тыло гуртаз.

Ӟеч кӧлэ, Валей Кельмакович... Пеймыт гуды котьку югыт медло! Удмурт калык понна тӥ зэмос тодосчи, зэмос кыл утись!

Дано профессор сярысь ватсам вакчияк ивортодэт:

1. 1997 арын «Заслуженный деятель науки Российской Федерации» ним сётэмын.

2. Удмурт кыллэсь диалектъёссэ но исторической фонетиказэ эскеронын тужгес но дано тодосчи. Со сяна, удмурт кыллэсь морфологизэ но синтаксиссэ, удмурт кылтодонлэсь историзэ эскериз.

3. 2014 арын Венгрилэсь «Золотой крест почёта» (Magyar Arany Érdemkereszt) кун данъетсэ басьтӥз.

4. Ужъёсыз печатламын Армениын, Эстониын, Венгриын, Финляндиын, Германиын, Австриын, Швециын но мукет кунъёсын. 

5. Солэн ужъёсыз валтӥсь учебной пособие луо Удмурт кун университетын, Глазкарысь педагогикая институтын, Венгриысь но Финляндиысь институтъёсын.

Туспуктэм: М. Егоров