«Удмурт Кенешлы» выль тӧро бырйизы

Ужрадэ Удмуртиысь, Башкортостанысь, Марий Элысь, Татарстанысь, Пермь, Киров, Свердловск улосвылъёсысь, Санкт-Петербургысь 200-лэсь трос делегатъёс пыриськизы.

Татарстанысь вуэм куноос пӧлын Балтась ёросысь «Кенеш» НКА-лэн кивалтӥсез Ольга Пчельникова но вал.

— Съездын Татьяна Ишматова «Удмурт Кенеш» огазеяськонлэн берло 2 ар ӵоже ужамез сярысь вераз, быдэстэм ужъёслы йылпумъянъёс лэсьтӥз. Собере вань делегатъёс «Удмурт Кенешлэн» уставаз пыртоно воштонъёсты эскеризы. Кызьы валэктэ Татьяна Витальевна, законъёс воштӥськемын «Удмурт Кенешлэн» уставез но туннэ нуналлы уг тупа ни. Тросэз делегатъёс воштонъёс понна куаразэс сётӥзы, — ивортӥз Ольга Мироновна.

Ужрадын ик «Удмурт Кенешлэн» ужаз мыло-кыдо пыриськем адямиосты пӧртэм данъетъёсын но сӥлы каризы. Шумпотымон, Ольга Мироновнаез но Таукаронэн пусйизы. Озьы ик ӧтчамын «Удмурт Кенешлэн» Данъян книгаяз пыртэм муртъёсты но ӟечкылазы. Данъяськымон, туэ но сӥлы каремъёс пӧлын асьме элькунысь адямимы вань — со Татарстанысь удмуртъёслэн лулчеберетъя йӧскалык огазеяськонэнызы кивалтӥсь Андрей Герасимов. Тодады вайытӥськом, кылем арын «Удмурт Кенешлэн» Данъян книгаяз Ӟаны шоръёзо школалэн азьвыл директорез Иван Васильевич Ермаков пыртэмын вал.

— Съездын Вань удмуртъёслэн «Удмурт Кенеш» огазеяськонзылы выль тӧро но бырйимы. Татьяна Витальевна куриз ассэ «Удмурт Кенешен» кивалтонлэсь мозмытыны. Со валэктӥз, Кун Кенешлэн Тӧроезлэн воштӥсез луэмез бере огазеяськонлы кулэезъя дыр висъяны уз быгаты ни шуыса. Ас интыяз Татьяна Витальевна ӵектӥз Кун Кенешысь Культурая, туризмъя но йӧскалык политикая ялан ужась комиссилэсь кивалтӥсьсэ Андрей Ураськинэз. Ваньмыз шуымон люкаськем калык Андрей Иванович понна куаразэ сётӥз. Озьы ик быръемын вал «Удмурт Кенешлэн» Пичи кенешаз выль ёзчиос но исполкомлэн ёзчиосыз, — шуиз Ольга Пчельникова.