Ушъямонэсь бервылъёсы – ӵошен

«Яна тормыш» обществоын мынӥсь ужъёсы но инкуазь аслэсьтыз тупатонъёссэ пыртӥз. Озьы ке но ужъёс дыраз но ыштонъёстэк быдэстӥсько. Та ваньмыз дэмен ужамлэн ушъямон йылпумъянъёсыз луо.

Октон-калтон котькуд возёс понна нимысьтыз вакытэн лыдъяське. Ӵукнаысен ӝытозь бусыосын комбайнъёс гурлало, октэм бусыосын тракторъёс кузёясько но муосты сӥзьыл кизёнлы дасяло, нош рулонэ биням куроез ӝикытэсь радъёсы интыяло. Гурт удысын самой пӧсь вакытэ одӥг ужась но тэк уг пукы, ваньзы огкылысь тыршо. Октоно площадьёсты учконо ке, 30 процент пала кылемын. Куазь таӵе ик сайкыт улӥз ке, матысь дыре октон-калтон но йылпумъяськоз. 

Арнялэн кутсконаз черод вуиз Вуж Кушкет но Янгул гуртысь бусыосы потаны. Нырысь ик ю тысез интыяны кулэ. Та понна Вуж Кушкет гуртын нимысьтыз амбар вань. Кивалтэ соин Алевтина Петрова.

— 20 ар пала луэ ини возёсын ужамелы. Ю тысез интыяны одӥг кидыс возён но ньыль фураж складъёс вань. Самой бадӟымез ини бусыысь урожаез пумитан инты. Ужасьёс сярысь верано ке, арысен аре соос ӧжыт но ӧжыт кылё. М-819 шуыса нимаськись ю куасьтонниын, калык кылын вераса — «Польскийын» — машинист-операторъёс — Клеймёнов Виталий но Исаев Олег, одӥг машинист — Клеймёнов Николай. Адями луыку, солы юрттӥсь но шеде, нош туэ тани огназ гинэ ужа. Пӧртэм ужъёсты быдэстӥсь — Платунов Николай, караулчимы — Ильмурзин Василий, амбарын ю тысез ГАЗ-53 машинаен нуллӥсь — Тарасов Александр. Гужем вакытэ али дышетскисьёс — Уськеев Владимир но Исаев Константин но студент — Павлов Андрей ужазы. Весаын ужа Исаева Вероника. 

Интыысь ужъёсын тодматскон вакытэ ик обществолэн валтӥсь агрономез но вуиз. Ильгиз Загидуллин бусыысь вуэм урожаез чакласа, аслыз кулэ луись ивортодэт басьтыса, милемын валче комбайнъёс доры сюрес кутӥз. Гуртлэн огпалаз интыяськем бусыосаз уж дугдытэк пӧзе.

Туэ возёсысь бусыосын куинь комбайн гинэ ужа.

Арезлы луыса, вутскиськом, азьвыл кадь 7-8 комбайнъёслэсь нагрузказэс быдэстӥськом. Та понна вазь ӵукнаысен бер ӝытозь ужаськом, кык смена луэ ини. Куазь, асьтэос тодӥськоды, пӧртэм луиз, ыштонъёстэк октон-калтонэз йылпумъян понна али туж ӝог ужано, — шуо комбайнёръёс.

Нош соос ини ас ужазы зэмос усточиос луо. Acros-550 комбайнэн ужась Нигматуллин Марат, юрттӥсез Багауетдинов Ирек, Палессе GS12 комбайнэн тыршись бадӟым опытэн Мударисов Мансур Фадил пиеныз, сыӵе ик комбайнэн атаез сьӧры кыстӥськыса ужась егит механизатор Мударисов Булат, юрттӥсез Агзамов Ралиф. Туннэ (возёсэ 26 гудырикошконэ вуылӥмы — Ю.Щ.) ӧнерчиос понна шумпотон нунал: ужъюлтошсы — Нигматуллин Марат — октон-калтон кампанилэн 4-тӥ арняезлэн йылпумъянъёсызъя азьмынӥсь комбайнёрлэсь нимзэ басьтэ. Солы вымпел но коньдэто конверт сётӥзы. Нош Мударисовъёслэн семьязы быдэн сертификатэн пусйиськизы. «Вожъяськон мылкыдды ӧвӧл-а кыкетӥзэ вымпел басьтӥсь эштылы», — шуыса юасько. «Ми ваньмы одӥг уж понна тыршиськом, татын вожъяськон, куатаськон сямъёсын улоно ӧвӧл. Туннэ одӥгез данъяське, ӵуказе — мукетыз. Вань ужез дэмен лэсьтыны тыршиськом, озьы гинэ пайдаё бервылэ вутскыны луэ», — валэкто воргоронъёс. Бусыысь ю тысез итымъёсы КамАЗ-эн Марат Сибагатуллин, Ринат Нурмухаметов но егит водитель Айнур Асхадуллин вутто.

Комбайнёръёсын ӧжытак вераськыса, Ильгиз Котдусович Алан палан интыяськем бусые дыртӥз. Татын MacDon комбайнэн Ильшат Назипов тырше. Вуэм шепъёсты кутсаса, комбайнъёслы дась каре.

— Кӧня ужамме вераны но уг тодӥськы, кема ини. Армиысь бертэм бере ик интыяськи. Пӧртэм ужъёсты быдэсъяй. Т-150 тракторен но ужай, комбайн бушаз ке, комбайнэ но пуксьылӥ. Е-302 немецкой турын турнан комбайн вал соку. Табере тани 11-тӥ арзэ MacDon-эн ужасько. Та сяна, МТЗ-1221 тракторен но ужасько на. Октон-калтон, пудо сиён дасян дыръёс ортчизы ке, тупатонъя мастерское выжисько. Туэ, Инмарлы тау, ужъёс удалтӥзы. Тазьы каньылэн ваньмыз ортчиз ке, туж умой луысал, — шуэ механизатор.
Бадӟым стажен механизаторлэсь ужамзэ синйылтыса, сюресмы нош ик азьланьтӥськиз. Син азямы рулон лэсьтон но соосты нуллон суред пуксиз. YTO тракторен но Kuhn техникаен рулон лэсьтӥсь Фарит Кадиров 1997-тӥ арысен та обществоын тырше. Нырысь ик комбайнёрлэн юрттӥсез луиз, собере ини пӧртэм техникаен ужаны но вутскем. Нуналаз 300-400 пала рулон лэсьтӥсько, шуэ. 

Шепъёсын узырмем бусыос вискын гырем муос но пумисько. Ӵапак ужан вакытаз ик обществоысь азьветлӥсь механизаторез но пумитамы: Владислав Петров герыоссэ чылкытатэ вал. Музъем мускыт, соин агрегат борды сюй лякиське. Муосты сӥзьыл кизёнлы рос-прос дасян механизаторлэн валтӥсь ужпумез луэ. 

Обществоысь ужъёсын тодматскыса, Ильгиз Котдусович огъя кылдэм югдуръёс сярысь вераз:

— Куазь сярысь верано ке, со кӧня ке шугъяськонъёс кылдытӥз ини милемлы но. Азьвыл ик туж трос лымы усиз. Тулыс но сыӵе ик ортчиз: нырысь туж пӧсь куазь вал, та одӥг паласен туж умой луиз — бусыос чальгес кӧсазы, но собере зоръёс кутскизы, таиз начаргес луиз ини, кизён вакыт кӧня ке кыстӥськиз. Али берпуметӥ йыды бусыос сяськаясько, солэн 300 пала гектарез нюрын интыяськемын. Озимой чабей тулыс туж умой ӝужаз. Кык ар пайдаез ӧй вал, нош туэ туж умой урожай басьтӥм. Куд-ог интыын шорлыдын 50 центнер басьтыны но луиз. Валэс ӟегез тулыс йыдыен валче кизим, шорлыдын гектарысь 45 центнер басьтӥм. Йыды гектарысь 30 центнер пала лыктылӥз. Нош тани валэс чабейлэн урожаез кӧня ке ӝожомытӥз, умойгес луоз шуыса возьмамы вал. Кукуруза 563 гектарын киземын. Туэ люцерна паймытӥз, таӵе умой луэмзэ уг тодӥськы на. Туж удалтӥз, Инмарлы тау. Тани али 400 тонна ӟег вузаськом организациослы. Ю тысь вуэмъя, ужасьёслы сётӥськом, али гинэ куро но сётъямы. Пудо сиён но тырмыт луоз шуыса оскисько. Сӥзьыл культураос 373 гектаре кизьыны малпаськом, солэн 206 гектараз — ӟег, мукетаз — озимой чабей.

— Октон-калтон кампание пырись ужасьёсын но тодматэ вал. 

— Та пумысен югдурмы туж умой шуыны уг луы. Арысен аре одӥг адямиос ик ужало ини. Котькуд механизаторлэн 2-3 техникаез, егитъёслэн та ужъёсы пыриськемзы уг поты. Но валтӥсь ужасьёсын возиськиськом на, соин нагрузка но бадӟым йӧтэ соослы. Шумпотымон, туэ куинь егит механизаторъёс лыктӥзы: Нафкат Галимуллин, Салават Мотыгуллин но Айнур Асхадуллин. Нырысь ик соос пудо-сиён комбайнэн ужазы, табере тракторе пуксизы, куро дасянын. Владислав Петров кык техникаен ужа. Амбаръёсын али югдур умой шуыны луэ, гужем нылпиос но ужало, шуркынмонэ адями уг кыльы ини.
Арысен аре гурт удысын пӧртэм воштӥськонъёс ортчо. Октон-калтон кампанилэн берпуметӥ вамышъёсыз гинэ кылизы на, собере механизаторъёс сӥзьыл кизён уже выжозы. «Яна тормыш» обществоын но ӝоген ю тысь октон дыр йылпумъяськоз. Кылемзэ ыштонъёстэк итымъёсы вуттыса, выль кивалтӥсь улсын бадӟымесь вырйылъёсы вутскыны но вуоно арлы удалтӥсь кидыс кизьыса кельтыны сӥзиськом! Дэмен лэсьтэм вань ужъёсты одно ик мед быдэстӥськозы!