Хезмәт

Ужась, но возьдаськись механизатор

Кутэшысь Геннадий Николаевичлэн вань улонэз юн герӟаськемын музъемен, техникаен. Солэн трос аръёс ӵоже гурт удысын тыршемез гажамон но таукарымон, али дыре ужась егитъёслы зэмос пример луэ.

Геннадий Николаевич Ефремовез агрономзы Сергей Чириков но, кивалтӥсьсы Николай Колоколов но туж ушъязы. Со, пе, милям самой адӟем карымон, самой опытной механизатормы. «Кыӵе гинэ дыре ужаны ӧд ӧтьы — вазь ӵукна-а, уйин-а — огпол но отказ уг сёты. Котькуд ужез одӥг кыл но вератэк быдэстэ», — шуэ Николай Григорьевич.

Кутэшысь Геннадий Николаевичлэн вань улонэз юн герӟаськемын музъемен, техникаен. Солэн трос аръёс ӵоже гурт удысын тыршемез гажамон но таукарымон, али дыре ужась егитъёслы зэмос пример луэ. Ужан биографияз пӧртэмез но луэм: тракторъёсын но комбайнъёсын ужан, ӵук ӟардонэн ӵош султыса тыршемъёс, уйин ужам сменаос. Гурт механизаторлэн зарни киосыз котькыӵе ужез рос-прос быдэсъяны быгатӥллям. Ужась, но возьдаськись Геннадий Николаевич нокыӵе ужлэсь но кышкамтэ. Та сярысь ужысь азинсконъёсыз верало — басьтэм грамотаоссэ, таукарон гожтэтъёссэ Геннадий Николаевич люкаса возе.

Геннадий Николаевич ноку но дано луыны ӧз тыршы. Колхоз понна тыршыса ужаз. Ма, тросэз эшъёсыз но озьы ик ужаллям. Озьы ик туж техникаез яратӥз но соин вырыны быгатӥз. Колхозысь вань кадь шуымон техникаез «киултӥз». Талы паймоно но ӧвӧл кадь, 1972-тӥ арысен татын ужа ук ини со...

— Дальней Востокын армиын служить карыса бертэм бере кызьы колхозэ ужаны интыяськи, со дырысен али но татын тыршисько. Али ке но тодӥсько нырысетӥ ужаны кутскем тракторме — со вал «Алтай» трактор. Али дыре со тракторе ӧвӧл но ини. Ужай собере «ДТ-75» тракторен но — кизи, кутсай, — тодаз вае ужаны кутскем аръёсыз сярысь Геннадий Николаевич.

Зэмзэ ке верано, собеседнике трос вераськись ӧвӧл, вылды, возьдаськись сюриз. Оло, механизаторъёслэн ужан нуналъёссы сокем мылкыдъёслы узыр уг луо, дыр: вазь ӵукнаысен бер уйинозь соос бусыын тыршо. Кыӵе ни татын мылкыдъёс? Жадьыса, но ужам ужзылы шумпотыса берто. Соин но «Та улонэз нош огпол улысалды-а?» шуыса юад ке но, «Улысал» шуыса гинэ ответ сётысалзы, дыр, ваньзы. Малы ке шуоно соос бадӟым семья выллем куспазы тупаса туж ӟеч ужало.

— Туннэ егитъёсын ӵош ужаськом. Соос но туж тыршисесь, милесьтым уг кылё. Ваньзэ умой быдэстыны тыршо, кыӵе ке юанэн вазиськизы ке, одно ик юрттыны, кенеш сётыны тыршисько. Кивалтӥсьмы сярысь верано ке но, тупаса ужаськом. Николай Григорьевич ведь милемлы кемалась тодмо. Со ми понна татын председатель луыса ужаны кутскыкуз выль адями ӧз луы. Азьло амбарын ужаз, собере татчы вуиз, — валэктэ мыным вераськоно муртэ.

Ачиз но Геннадий Николаевич «Дуслык» колхоз понна кемалась тодмо адями. Тани ини 47 ар ӵоже со татын механизатор луыса тырше. Туннэ нуналэ со вылын кык трактор лыдъяське. Одӥгеныз кыед донга, мукетыныз гыре... Та нуналъёсы зоръёс луизы ке но, со ужтэк ӧз пукы — гаражын ремонт кариз, ма, со сяна но мукет ужъёсыз трос вал. Тӥни озьы тыршо соос, механизаторъёс. Арысь аре, нуналысь нуналэ кужымзэс музъем ужъёслы сётыса.

Пусъеме потэ, «Дуслык» обществоын трос ужасьёс. Механизаторъёсын но ваньмынызы вераськыны ӧз луы. Но соос пӧлысь котькудӥз гажамон, ушъямон но газетэ гожтымон. Оскисько, соосын но вуонояз газет бамъёсын тодматскомы шуыса. Нош Николай Григорьевичлы азьпалаз но азинлыко ужаны, коллективезлэсь ӟечсэ гинэ адӟыны мед кылдоз.

Реклама
Нравится
Поделиться:
Реклама
Комментарии (0)
Осталось символов: