Хезмәт

«Ужатэк нокытын уксё уг сёто»

Соосты гуртын котькин тодэ. Толэзьлы олокӧня пол соос коркалы быдэ ветло — газет-журнал, пенси ваё. Котькудаз юртэ пырыса, тӧляськонъёсты люкало. Вераськон почтальонъёс сярысь мынэ шуыса валады, дыр, ни.

Таяз арняе, 8 июле, почта ёзэсын ужасьёс асьсэлэсь профессиональной праздниксэс пусъёзы. Таин валче Ципья почта ёзэсын ужась почтальонэн, Зайнуллина Екатерина Ивановнаен, секыт ужез сярысь вераськимы.

— Екатерина Ивановна, кызьы тӥ почта ёзэсэ вуиды? Ку но кызьы ужаны кутскиды?

— Почтае мон воксё малпамтэ шорысь вуи. Мынам бускеле почтальон луыса ужа вал. Озьы луыса потӥз — солэн анаез висьыны кутскиз но, монэ почтазэ нуллыны юрттыны куриз бускеле. Мон юрттӥ. Нырысь Ципья почтаысь корреспонденциез гинэ нуллӥ, собере ачим соосты сётъяны но кутски (мыным секыт ӧвӧл ук, адямилы юрттыны но кулэ). Озьы каллен вань ужзэ ачим быдэсъяны кутски. «Ойдо, ужаны лыкты ми доры. Ӧжыт ке но ужаса утьы, ӧз ке кельшы — кошкод», — шуизы мыным почтаысен. Ма, мон соглаш луи. Малпасько, кӧня быгатом меда ужаны... Тани со дырысен 21 ар но ортчем ни. Чидаськем, ужаськем но ужасько.

— Кыӵе ужъёсты тӥ туннэ нуналэ быдэсъяськоды?

— Почтаын ужасьлэсь ужзэ почтаын ужась гинэ валалоз. Котькуд почтальонлэн вань аслыз люкыса сётэм гуртэз, участокез. Отчы ми нуллӥськом корреспонденциез, гуртъёсысь (мон, кылсярысь, Вукогуртын но Вуж Ципьяын ужасько) тыл, ву, газ, телефон тӧляськонъёсты люкаськом. Синтэм-пельтэм буранъёсын но, пӧсь гужем нуналъёсы но ужано милемлы — нуналаз лыдӟисьлы газетэз вуттоно, пенси нуоно. Адями куке дораз но уг луы, соку 2 пол но, 3 пол но ветлоно луэ — ма карод. Ваньзы ужало ук.

— Адямиосын ужаны секыт ук... Котькудӥныз огъя кыл шедьтыны быгатоно.

— Озьы. Адямиосын кызьы вераськиськод, соос но тонэныд озьы ик верасько. Умоен вазид ке, тыныд но ӟеч кылын вазёзы. Мон тани, кылсярысь, адямиосын весь умоен вераськыны тыршисько. Соин ик монэ адямиос ярато, лыктыкум «кормилицамы лыктӥз» шуыса пумитало. Макем со шумпотымон бен!

— Тӧляськонъёс но пенси ласянь валамон. Нош тани калыклэн газет-журналъёсты гожтӥськемзы туала дыре туж ик уг пот ини.

— Пересьёс лыдӟо али газетъёсты, витё. Нош егитъёс, зэмзэ но, уг ни лыдӟо. Поколениез сыӵе — интернетысь, пе, шедьтыса лыдӟыны луэ ваньзэ. Но мон уг ӝожтӥськиськы. Планме котьку тырмытӥсько, со понна быгатэмея ваньзэ лэсьтыны тыршисько. Мынам шер гинэ одӥг газетлы гинэ гожтӥсько, тросаз учыре — 2-3 газет басьто. Та умой показатель.

— Ужды туж секыт но, кышкыт но тӥляд. Бадӟым уксёен но ветлыны тупа. Ма, почтаын сяна, тӥ али садикын медсестра луыса но ужаськоды шуыса тодӥсько.

— Мар шуод ни. Инмар чиданы косэм, шуо. Кинлы ке но та ужез быдэстоно ук. Туала егитъёслэн капчиен гинэ ужаса уксё басьтэмзы потэ, соин ик почтальонлы ужаны мынэмзы уг поты. Татын уксё ӧжыт тыро шуыса. Милям почтамылэн начальникез, Альбина Яковлева, тазьы вера: «Почтальонэз шедьтытозь, почта начальникез шедьтыны трослы капчигес». Туж соглаш мон та вераменыз. Мон тазьы верасал: ужатэк нокытын уксё уг сёто. Тани мон 20 арлэсь тросгес ужасько ни, 1997-тӥ арысен. Та аръёс ӵоже кӧня ужаны тупаз... Кулэ луыкуз, аслым тодмостэм гуртъёсы сяна, Сырьяын но, Ципьяын но, Тагашурын но ужаны тупалляз. Яра али ёзэсмылэн начальникез, Альбина, милесьтым югдурмес вала. Солэн юрттэмезтэк ужаны ӧй быгатысал, дыр. Соин кык ужын но ужаны вутскисько. Милемыз воштыны но адями ӧвӧл, соин отпускъёсмы дыръя огмылэсь огмы ужъёсмес но асьмеос ик быдэсъяськом. Озьы ик ужаськом — ог-огмес валаса, ог-огмылы юрттыса, мукет сямен ужаны уг но луы почтаын.

Учырен пайдаяськыса, мынам ӵош ужасьёсме но вань почтальонъёсты праздникенымы ӟечкыламе потэ. Ужмы арысь аре секытгес но секытгес луэ, но та шоры учкытэк, котьку адями луыса кыльыны мед быгатомы. Котькыӵе ужлэн аслаз пайдаез но, изъянэз но вань, дыр. Асьмеос сяна та ужез нокин но уз быдэсты шуыса ужаны кулэ. Шуг-секытъёслы ум сётске, ужмылэсь умойзэ гинэ басьтыса, адямиосын огъя кыл шедьтыса азьланяз но ужаломе. Ваньдылы сӥзисько тазалык но семья  шудбур. Праздникен!

 

 

 

Нравится
Поделиться:
Реклама
Комментарии (0)
Осталось символов: