Ӵужектэм тусъёс тодэ вайыто...

Ӵужектэм тусъёс тодэ вайыто

Мон ӧй адӟы шимес войнаез,

Кулэез но ӧвӧл бен мыным.

Яратско войнатэк улонэз,

Яратско вань ӟырдыт сюлмыным.

Ӧз, ӧз кылды урмем фашистлы

Эрико улонмес лёганы.

Ваче пинь султӥмы ми солы,

Азьлане сюрессэ пытсамы.

(В. Котков. Обелиск дорын.)

75-тӥ ползэ пумитаськомы ини Быдӟым Вормон праздникез. 75 пол сяськаяло но толӟо ни садъёс. Арлэн самой шулдыр дыраз, ваньмыз улӟон вакытэ нош но нош тодэ вайиськомы секыт война аръёсты, данъяськомы асьме калыклэсь асьсэды жалятэк ожмаськем кужмо, батыр нылпиоссэ. Кӧня вирзэс кисьтӥзы асьме солдатъёс. Кӧня ожгарчиос улонзэс сётӥзы вормон понна, бадӟым музъеммы вылын шудбуро улон понна. Туннэ мынам со батыръёс пӧлысь аслам вордскем но будэм, татын ик ас шудме шедьтэм Турья гуртысьтым ожгарчиос сярысь вераме потэ.

Гуртысьтымы фронтэ кошкиз 107 мурт. Соос пӧлысь 77-ез ӧз берытске анайёссы, яратоно кузпалъёссы но мусокай нылпиоссы доры. Тросэз ивортэк ышизы. Кыкезлэсь  ожын тушмонъёсты жалятэк жугемзы понна мӧлязэс чебертӥз «Горд Кизили» орден. Со Горлов Кузьма Александрович но Иванов Прокопий Иванович. Горлов К.А. вордскемын 1903 арын Вуж Турья гуртын. Оже кошке 1942 арын. Отын со шофёр луэ. Дораз берытске 1945 арын. Война бере но гуртомы колхозын шофёр луыса ужа. Али кулэмын ини. Ватэмын Турья шае. Горловъёслэн семьяысьтыз 4 кузя войнае кошко. Куинез берто, одӥгез, Яков нимоез (Со мынам атайзыелэн апаезлэн картэз луэ. Ас гумырзэ палкышно Горловъёслэн семьяязы ик ортчытэ. Нылпизы ӧвӧл) ож бусые ик кыле. Иванов Прокопий вордске 1902 арын. Оже кошке 1942 арын, берытске 1945 арын. Тӥр ужлы усточи луэ. Берпум нуналъёссэ пиез дорын Малмыжын улӥз.

Трос, макем трос егит улонъёсыз куспетӥ кариз, ас сьӧраз нуиз война. Лек ожез ортчыса шуд усиз вордскем гуртаз бертыны мынам атайзыелы Исьмеков Пётр Михайловичлы. 1941 арын ож тыл гомӟем бере, 16 аресъем егит пиез декабрь толэзе ысто оборонной ужъёсы. Отысь со берытске 1943 арлэн кутсконаз гинэ. 21 январе солы 18 арес тырме, нош 7 январе повестка сёто. Со аре ик август толэзе 357-тӥ запасной стрелковой полкын младшой командиръёслэсь курсъёссэ йылпумъя ини. Отысен сое ысто ll-тӥ Украинской фронтэ связистъёслэн отделениезлэн командирез карыса. Борисовка, Люботны, Бычки гуртъёсты тушмон киулысь мозмытонэ пыриськемзэ тодаз вайылэ вал со, бомбёжка дыръя, наступление мыныку туж кышкыт, пе, вал. 10-тӥ сентябре 1943 арын, командной пунктэн кусып герӟакуз фашист пуля егит командирлэсь паллян пыдызлэсь лыоссэ тӥяса сӧсыртэ. Секыт сӧсырмем ожгарчиез келяло Мичуринск городысь госпитале, собере Москвае. Тазармыса вуэ Казахстанысь Гурьев карын гинэ. Отысен сое Оренбурге выздоравливающий батальонэ келяло. Сӧсырмытозяз возьматэм батырлыкъёсыз понна мӧляяз быртто «За боевые заслуги» медаль. Ож бере басьтэм медальёсыз но вань: «За победу над Германией», медаль «Жукова». Быдӟым Вормонлы 40 ар тырмонэз пусйыку мӧлязэ чебертӥз l степенё «Отечественной война» орден. 9 май 1945 арез пумита Венгрия музъем вылын. Службазэ азинтэ Бессарабиын (Молдавия). Вордскем гуртаз Пётр Михайлович берытске 1950 аре март толэзьлэн пумаз гинэ. Адскыны бертыкуз синмаське Ципья гуртысь нылашлы — Сидорова Елизавета Александровналы — Турья гуртысь дышетӥсьлы. Сидорова Е.А. 1944 арын Ципья школаез Ушьян грамотаен йылпумъя. Школаез умой йылпумъясьёсты ваньзэсты начальной школаосы дышетыны лэзиллям. Елизавета Александровнаез нырысь Сырья школае тодмостӥлям. Отын со Катя нимо дышетӥсен ӵош ужам. Кулытозяз но кусыпсэс ӧз ыштэ соос. 1947 арын Кускем школаын ужа, нош 1948 аре Турья начальной школае дышетыны лэзё. Пенсие потытозяз ужа Турья школаын. Пётр но Елизавета будэто 5 нылпи. Одӥгезлы пиезлы — Павеллы — атаезлэсь сюрессэ ортчыны тупа. Со — афганец.

Пётрлэсь агайзэ 1939 аре финской оже басьто. Отысь бертыны солы уг кылды, кутске Быдӟым Отечественной война. Кузпалыз Евдокия ӵем тодаз вайылэ вал гожтэтысьтыз чуръёссэ: «Туж кышкыт ожмаськон. Пыӵал вань, ыбылыны пуля ӧвӧл, бертон уз деты дыр». Та кылъёссэ со кык пол  гожтэм. Иван Михайлович ожын ивортэк быремен лыдъяське. Кык нылъёсыз атайтэк будо: покчиез нылыз Курганын улэ, бадӟымез —Свердловской областьын.

Мукетыз гуртое Кокров Михаил Николаевич. 17 аресъем егит пиез ож лудэ келяло 8 ноябре 1943 арын. Пор шаерысь Суслонгерь военной лагерьын ожгарчилэн ӧнерезлы 6 толэзь дышетскемез бере, сое вутто Белоруссия музъем вылын мынӥсь ожъёсы. Ожмаське Белорусской фронтын. Татын ик сӧсырмыны шеде. Кузь но секыт сюресъёсты ортчыны тупа солы. Михаил Николаевич пыдын лёгам Польша, Германия, Эстония музъемъёсты. Ожысь бертэм бераз ужа колхозын. Туж усто плотник вал со. Гуртамы самой трос муш вордӥсь но вал со. Туръяын тросэзлэн корказы лэсьтэмын Миша агайлэн кивалтэмез улсын. Кузпалэныз Зинаидаен вордо 6 нылпи. Белоруссия музъем вылын кышкатэк ожмаськемез белорусской юбилейной медальёсын пусъемын.

Нош ик одӥгез гуртое — Кузьмина-Тимофеева Мария Кузьминична сярысь вераме потэ. 1944 арын инвожо толэзе сое лэзе Суслонгерь военной лагере. Отын дышетскемзы бере егит нылъёсты эшелон вуттэ Ладожской ты дуре. Егит удмурт нылаш зенитчица луэ. Кышкатэк ожмаськемзэ лыдэ басьтыса рядовой Мария Кузьминичналэн гимнастёркаез борды быртто «За оборону Советского Заполярья» медаль. Нош 1990 арын Мария Кузьминичнаез Ижкарысь военкоматэ отё. Ож дыре сётэм наградаез, 45 ар ӵоже йыромыса ветлэмез бере, выльысь ас кузёзэ шедьтэ. Мӧляяз быртто «За отвагу» медаль.

Михайловъёслэн (мынам выжые) семьяысьтыз ожысь Павел пизы кык пыдтэк бертэ. Улыны кошке Вавож районэ Можга гуртэ. 3 нылпиез луэ. Соосын кусыпмы ышемын. Пересь песятае (Чуар Гиргорей) усто гын сапег лэсьтӥсь луэм. Фронтэ гын сапег лэсьтыса келяллям (ӵужанаелэн тодэ ваёнъёсыз). Ӵужанае окоп гудӟонын, торф поттонын ужам. Отын черломем, пыдкукъёсыз висё вал. Торф поттонын ужакуз тифен висем.

Туннэ нуналэ одӥгез но ветеранъёс улэп ӧвӧл ини. Тыл ветеранъёсмы но кык гинэ кылемын. Музъемозь йыбыртоме ожысь но ужысь ветеранъёслы асьмелы шудо улон кузьмамзы понна. Улонамы медаз лу ни ож гудыри. Йыр вадьсамы котьку мед ‡ужалоз яркыт шунды.

Ваньдэсты но праздникен, тӥледыз, землякъёс!

Римма Исьмекова

Турья гурт