Ужлэсь кышкасьтэм, адӟем карымон воргорон

Мынам та статьяме сӥземе потэ аслам атаелы, Ионов Иван Семёновичлы. Со вордскиз Сырья гуртын семьяязы ньылетӥ нылпи луыса. Али но со гуртын ик улэ. Вордскем атаймы 3 июле 1941 арын, улонлэн самой секыт вакытаз, Быдӟым ож кутскем бере. Атайзэ басьто жугиськонэ, адӟытэк но кошке со пиезлэсь вордскемзэ. Анаез со секыт вакытэ огназ ньыль пиосыныз кыле. Син азе но пуктыны секыт, кызьы чидам меда тае ваньзэ кышномурт? Атайзылы жугиськонысь, сӧсырмыса ке но, бертыны шуд усем. Озьыен, семьялы ӧжыт ке но улыны капчигес луэ. Жугиськон ортчем бере, семьяязы кема витем нылзы вордске. Озьы каллен улонзы азинтӥське.

Атае пичи дырысеныз ик ужлэсь кышкатэк, котьма ужаны дышетскыса будэм. Школаын дышетскыны яратымтэ. Дӥськутэз но луымтэ, одӥг классын кык-куинь ар но пукыны тупам. Ужлэсь кышкасьтэм луэмез атайлы азьло палан улыны оскон сётэм. Быдэс гумырзэ со сӥзем гурт улонлы, колхоз ужлы. Трос аръёс ӵоже ужаз со «Труд» колхозын механизатор луыса. Гужем комбайнэн, нош толалтэ ДТ тракторен доразы бертытэк, колхозлы нюлэс корало вал.

Атаелэн тыршеменыз, ужаменыз, ми огпол но номырлы ёрмыса ӧм улэ.

Секыт 90-тӥ аръёсы, кампет но печення ӧвӧл вакытэ, ваньмыз талонэн но списокен дыръя, ми, со вакытэ пичиос, огпол но ческыт макелы ӧм ёрме. Атаймы Киров улосын нюлэс кора вал (со вакытэ Киров улосын умой улӥзы), отысь ческыт макеосын милемыз весь шумпоттэ вал со.

Нина Исаева

Вуж Кушкет гурт

Пыр-почгес — “Азьлане” газетлэн бамъёсаз.