Ваче ки кутӥськыса...60 ар

Бадӟым Лӧзя II-тӥ люкет гуртын улӥсь Клара Павловна но Иван Александрович Петровъёслэн корказы пыремен валче валамон луиз: татын шудо семья улэ. Сыӵе малпанъёсы, оло, кузёкышнолэн каньыл пумитамез но кузёлэн ӟеч мылкыдо пальпотыса ваземез; оло, юртлэн чылкыт но югыт, куно пумитаны дась луэмез; оло, ваньмыз огазе вуттӥз, дыр.

Та улонын троссэ адӟем, чидам, уно аръёс ӵоже тыршыса ужам муртъёс сярысь гожъяны тужгес кылкутымон, малы ке шуоно соос сярысь ваньзэ гожтэм, лыдӟисьёслы вуттэм потэ. Но котьку озьы уг пӧрмы...

Кыдёкысь ортчем вакытэ вуттӥзы Иван Александровичез но Клара Павловнаез тодэ ваёнъёссы. Вордскиллям соос кыкназы ик Бадӟым Лӧзя II-тӥ люкет гуртын 1936-тӥ арын. Клара Павловна — 1 толшоре, Иван Александрович — 3 тулыспалэ. «Одӥг толэзьлы бадӟымгес мон солэсь», — шуэ Клара апай. «Ассэ бадӟым каремез потэ», — серекъяса учке Иван агай ми шоры. Тазьы куспазы серекъяса вераськемзэс кылзыса ик шӧдӥськиз та семьяын тупаса улонлэн кузёяськемез. Геройёсмылэн пичи дырзы, со дырысь вань нылпиослэн кадь ик, секыт война аръёслы тупа.

— Атайёсмы жугиськонэ ӵош кошкизы. Милемлы соку быдэн вить арес гинэ вал. …з бертэ ни. Мынам атае Белоруссиын бырем, нош Иванлэн — Москва улосвылын, — маде Клара Павловна.

Геройёсмылэн улонъёссы котьку пӧлэстӥськыса мынӥллям: Иван но Клара пичи дырысенызы валче луиллям, одӥг гуртысь бере, валче шудӥллям, валче будӥллям. «Сомында ар ӵош луиськомы ини. Шайвылэ тубытозь но валче мед луысалмы...», — шуэ Иван агай.

Эшъяськонзы аръёс ортчыса яратонлы пӧрме — егитъёс сӥзьыл 1959-тӥ арын валче карисько. Та дыре Иван ини армиысь бертэм луэ (куинь ар ӵоже, 1955-1958-тӥ аръёсы, со служить каре Челябинск улосвылын). Гожтӥсько 6 южтолэзе 1960 арын. Ӵапак толон соослэн гожтӥськемзы дырысен 60 ар но тырмем (валче луэмзылы — солэсь но тросгес). Егит дырзы сярысь тодазы вайыкузы, кузпалъёс пальпотыса, огзэс-огзы куспетӥ карыса, дырын-дырын ог-огзылэсь верамъёссэс йылэтыса мадё.

— Ми пегӟыса ветлӥмы, — серекъяло соос. — Азьло сыӵе сям вал. Возьдаськимы но, дыр, ини. Азьло ведь гуртамы трос адями улӥз — адӟизы ке, мар малпалозы. Али гинэ гуртмы быре ни. Макем шулдыр вал со азьло! Туж данлы луиз Бадӟым Лӧзямы. Соку татын вуко, ГЭС, крахмал завод, школа, клуб, ферма но вал. Татчы олокытысен но ветлӥзы вукое.

Соин, дыр, вордскем гуртысьтызы кытчы ке но палэнэ кошкыны кузпалъёслэн малпанъёсазы но луымтэ. Семья кылдытэмзы бере, нырысь соос Иван агайлэн атай юртаз уло. 1972-тӥ арысен, Клара апайлэн анаез кулэм бере, туннэ нуналэ улоно юртазы выжо. Ӵош улыны кутскыкузы, Клара апай Балтась больницаысь складын ужам (татын со трос тыршем — 34 ар ӵоже). Кузпалыз дышетскемезъя муш утись луэм, та ӧрын ик ужам но. Армиысь бертэм бераз «Радио» (али «Алга») колхозын мушкась луыса ужаны кутскем. Ӵуписькись (плотник) но луэм Иван агай. Лэсьтӥськись луыса но ужам со, киысьтыз тӥрез но, пе, уг усьы вал. Солэн юртаз али но ас киосыныз лэсьтэм шкафъёсыз сыло. Быгатӥсь столярен лэсьтэм арбериослэн ӟечлыкез туж умой луэм, адске — али но шкафъёс выль кадесь. Котьмалы усто луэм Иван Александрович. Али гинэ уг пӧрмы вылэм ни — чиньыосыз уг кылзӥсько. Мызганэн но шудэмез уг луы, мылыз туж потэ ке но. Озьы ке но, егит дырзэ тодаз вайыса, Иван агай аслаз лэсьтэм шкафысьтыз мызганзэ поттыса, кӧня ке шудыса утиз ик (туспуктэмын). 

— Тани тазьы улӥськомы, — шуэ, кузпалыз шоры учкыса, Клара Павловна. — Инмарлы тау, тазьы улыны быгатэммылы. Но табере куное ветлэммы уг луы ни. Азьло ветлӥськомы вал. Милям ведь кык нылъёсмы сяна, ньыль внучкаосмы, вить правнукъёсмы вань ини, — шумпотэмзэс ватытэк верало Петровъёс. 

— Сомында ар ӵоже валче улыны быгатонлэн секретэз ма бордын? — юасько.

— Ог-огмытэк милям улэммы уг луы ни. Улонын пӧртэмез луэ — ваньмыз котьку умой луыны нокызьы но уг быгаты. Ми но куддыръя даллашимы. Самой валтӥсез — ми семьяын кыкнамы но огкадь. Кузпалы но, мон но. Кыкнамы но кузё. Куспамы весь кенешыса улӥськомы, — валэктэ Клара Павловна.

Туннэ нуналэ кузпалъёс кыкназы гинэ уло. Бен, соос кык нылъёсты будэтӥзы. Соос анай-атайзэс ярато ке но, Удмуртиысь (ӵапак кык нылъёссы но, асьсэ семьяоссэс кылдытыса, отын уло) ӵем бертыны уг быгато. Пудооссы ӧвӧл ке но, курегъёссы, пунызы но коӵышсы вань на Петровъёслэн. Инмарлы тау карыса улыны быгато соос. Кыкнамылы мӧзмыт, улыны секыт уг шуо — луэмезлы шумпото. Та гуртын улэ Иван агайлэн племянницаез, Лидия. Со ӵемысь Иван агай но Клара апай доры пыра. Солэн верамезъя, Клара апаен Иван агайёс пичи дырысеныз Лидияез будэтӥллям, ас нылпизэс кадь яратӥллям, утиллям. Ӵужмуртэныз но ӵужкенакеныз со туж данъяське. Кызьы бен уд данъяськы? Туала поколениысь егитъёс понна зэмос пример луо ук Петровъёс. Кыкназы ик каньыл, ӟеч мылкыдо, пальпотыса верасько, ог-огзы шоры яратыса, гажаса вазё, вӧсь карись кыл уг верало. Зэм шуиз Иван агай: «Пудо-живот но котькудзэ уг яраты. Мушъёс гинэ но ят мушъёсты пузкаразы уг лэзё. Ми но огмес-огмы озьы бырйимы — яратыса, гажаса. Гумырмы ӵоже шуныт кусыпъёсмес, яратон мылкыдмес возьыны быгатӥмы».

Сыӵе бадӟым лыдпус — 60 ар валче улон. Петровъёс та эскеронэз данэн ортчизы, азьпалан но сыӵе ик лякыт сямо луыны, висьытэк-куректытэк кема-кема улыны, шуныт мылкыдъёсынызы  котьку но матысь адямиоссэс, гуртооссэс шумпоттыны мед кылдоз.