Вашкалаез туалаеныз артэ

— Удмуртъёслэн котькуд группазылэн вань семьяын утиськись но вуоно поколенилы выжтӥськись ас праздникъёссы. Туала семьяосын со сямъёс ӵемгес арлыдоослы луыса утисько, — вера Варклед-Бодья гуртысь Культура юртэн кивалтӥсь Наталья Матвеева.

Кылсярысь, Варклед-Бодьяын арлы быдэ улонысь валтӥсь ужрадъёсын герӟаськем вӧсяськонъёс ортчо.

Удмуртъёс утьыса кельтӥзы буре ваён нуналъёсты. Со понна Кисьтон шуэм йылол ортче. Та нуналэ кузёос курегез яке атасэз вандо, табань пыжо но ӝӧк сьӧрын вань кулэм ӵыжы-выжыоссэс буре ваё.

Кукмор удмуртъёс Ымусьтонэ «Уллань дязег» йылолэз ортчыто: праздник ӝӧк вылэ тылобурдо сӥлен (ӵӧж яке ӟазег) ӝук яке шыд лым пӧзьтыса дасяло.

Вашкала дунлыкъёс ласянь удмуртъёслэн бадӟым инты басьтэ сюан. Калыклэн таӵе валатонэз вань: удмуртлэн куинь сюанэз. Вордӥськон – со улонэн сюан, ачиз сюан – адямиен сюан, нош ватон – кулонэн сюан.

Кукмор но Мамадыш удмуртъёслэн али дырозь но нылэз лушкан сям вӧлмемын. Кузпалъяськемзылэсь азьло пи нылмуртэз, ку лыктэмез сярысь асэныз азьвыл вераськытэк, лушка. Нылэз вуоно эмеспи доры уйшоре ваё, нош ӵыжы-выжыосызлы, «Ветылды ми дорын!» шуыса, ивор сёто. Нылмуртлэн анай-атайёсыз, сюанлы соглаш ке луо, мукет нуналаз курасьёсын лыкто.

Сюанэн удмуртъёслэн эшшо одӥг вӧлмем йылолзы герӟаськемын — Чумер сиён (тросгес Кукмор но Мамадыш удмуртъёслы тупа). Юмал ыльняньлэсь лэсьтэм шарик пушкы дышымтэ пушкес ватсаське (гордкушман, эгыр, апельсин кӧм но мукетыз), собере соосты пельнянез кадь пӧзьто. Котькуд куно, коньдон тырыса, аслыз чумер басьтыны но сое сиыны кулэ. Та егитъёслы шуд сӥземен лыдъяське.

Одӥгез егит, но ини вӧлмыны вутскем сям — Варклед-Бодьяын «Шудо пельнянь» нимо ёрос фестивалез ортчытон, со калыкын 18 тулыспалэ пусйиськись Пельняньлэн Дунневыл нуналэзлы сӥземын.

«Пельнянь — со юрт шунытлэн символэз. Нош семья дунлыкъёс удмуртъёслэн валтӥсьёсыз луо. Фестиваль Агрыз муниципал ёросысь улӥсьёсты гинэ ӧвӧл, Удмуртиысь, Мордовиысь, Башкортостанысь матысь бускельёсты но огазея. Фестивальын ведь ми пельнянь гинэ ум кутӥське, кырӟаськом-эктӥськом но», — мыняса вера Наталья Матвеева.

Умой туала сямлы пӧрмиз Анай кыллэн калыккуспо нуналэзлы сӥзем ужрадъёсты ортчытон но. Арлы быдэ Варклед-Бодьяысь покчиёзо школаын дышетскись но нылпи садэ ветлӥсь пиналъёс «Инвис» фольклор ансамблен но волонтёръёсын ӵош гуртын улӥсьёслы праздник радъяло. Туэ, кылсярысь, Культура юртын гуртысь активистъёс нылпиослы удмурт калык сиёнэз — перепечез — дасянъя мастер-класс радъяллям. Нылпиосты ыльнянь лэсьтыны, пушкессэ дасяны, перепеч кутыны дышетӥллям. Перепеч гурын пыжиськыку, пиналъёс кырӟаллям но эктӥллям, песянайёсын ӵош калык шудонъёсын шудӥллям.

«Туж кулэ луисез: вашкала сям-йылолъёслэн улонын утиськыса кылемзы али дыре ини гуртын улӥсьтэм семьяослы гурт йылолъёсы пыриськон понна бертыны луонлык сётэ. Дор палазы сыӵе дырын-дырын гинэ но бертылэмзы выжыосын, анай-атай сям-йылолъёсын кусыпъёсты юнматэ», — шуэ Наталья Матвеева.

Ирина Симонова

(«Республика Татарстан» газет)

Берыктӥз Екатерина Салтыкова

Фото: https://vk.com/id78392984