Хезмәт

Ветеранъёсмылэсь батырлыксэс вунэтыны асьмелэн правомы ӧвӧл

Быдӟым Отечественной ожысь ветеранлэн Павел Ивановлэн кулэмез дырысен трос аръёс ортчизы ке но ини, солэн батырлыкъёсыз сярысь бускелъёсыз уг вунэто.

Павел Иванович Иванов 1904-тӥ арын Сала Кушкет гуртын вордске. 1941-тӥ арын октябрь толэзе оже басьтӥське, 3 пол сӧсырме. Берпуметӥзэ сӧсырмыкуз паллян пыдзэ вандоно луо.

— Волхов фронт, 1944 ар. Йырсазьме ыштыса, вуэн пачылмем окопын 2 уй но нунал кыллиськем. Пыдъёсы номыр но уг шӧдо вал. Гангрена кутскем вылэм, соин паллян пыдме пыдеслэсь вылэгес вандӥзы. Пыдам миналэн осколокез йӧтэм луэм, — вералоз, пе, вал со улэп дыръя.

Ожын лэсьтэм батырлыкъёсыз понна Павел Иванов «Горд Кизили» орденэн, «Германиез вормем понна», «1941-1945 аръёсы Быдӟым Отечественной ожын дано тыршемез понна» медальёсын пусйиське.

Ожысь пал пыд бертэм старшой сержант Павел Иванович Иванов 22 ар ӵоже Балтась сельпоын валтӥсь бухгалтер луыса ужа. Кузпалъяське, кузпалэныз ӵош одӥг ныл но одӥг пи будэто.

Быдӟым Отечественной ожысь ветеранлэн кулэмезлы туэ — 18 мае 29 ар луиз. Кузпалэз но пиез но кулэмын ини. Нылзы палэнын улэ, арлыдо луэмысьтыз, вордскем палъёсаз ӵем вуылыны уг быгаты. Но ветеранлэсь водскем шаерзэ мозмытон понна лэсьтэм батырлыкъёссэ бускелъёсыз уг вунэто. Балтась посёлокысь Космонавтъёслэн урамазы улӥсь агай-вынъёс Азат но Ирек Сабировъёс, Рафкат Шакиржанов, Ильдус Шайхутдинов, Ильдус Гайсин, Ильсур Валиев, Ринат Гарифуллин, Марат Гимадиев арлы быдэ Павел Ивановлэсь шайгузэ чылкытатыса возё. Таяз аре Быдӟым Вормонлы 75 ар тырмонэн валче шайгуаз выль табличка но интыяллям.

— Батыръёсты вунэтыны уг яра. Ӵыжы-выжыед- а со тынад, бускелед-а, соиз валтӥсь ӧвӧл. Шаермес мозмытон понна улонзэс, тазылыксэс жалямтэ ветеранъёсмылэсь батырлыксэс вунэтыны асьмелэн правомы ӧвӧл, — шуэ та ӟеч ужъёслэн одӥгез валтӥсь  кичӧлтӥсез Марат Гимадиев.

Зэмзэ но, батыръёсты вунэтыны уг яра. Асьмеос тае будӥсь поколенилы но валэктыны мед быгатомы вал... Павел Ивановичлэн бускельёсыз кадь огшоры, но ӟеч, дунъяса быдтонтэм ужъёсынымы.

 

 

 

 

 

 

 

 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: