Вылын Ушма покчиёзо школаын но нырысетӥ гырлы куара чузъяськиз

1-тӥ куарусёнэ шаермы пусйиз Тодонлыклэсь нуналзэ. Школаосын праздник ужрадъёс ортчизы, выль дышетскон арлы кутскон сётыса, нырысетӥ гырлы куара чузъяськиз. Котьку сямен сяська керттэтъёс, тӧдьы бантикъёс, пальпотӥсь ымныръёс 1-тӥ куарусёнлэн сяме пырем тодметъёсыз луизы. Озьы ик туэ Татарстанын та праздникез ортчытонэ выльдӥськон но пыртӥськиз: элькунысьтымы тодон-валан юртъёс дышетскон арез кункышетъёсты ӝутыса но кункрезьёсты быдэстыса кутскизы.

Вылын Ушма покчиёзо школа-нылпи садын ваньмыз та луытэк но быгатэ вал, малы ке шуоно туэ, пиналъёс ӧжыт луэмысь, сое борӟан ужпум лэчыт султӥз. Но, шумпотыса вераны быгатӥськом, гурт калыклэн, тужгес но гуртысь, Покчи Лӧзя гурт поселениысь неравнодушной адямиослэн, анай-атайёслэн, школа-нылпи садлэн али но азьвыл коллективезлэн, ёросысь удмуртъёслэн «Кенеш» НКА-зылэн сюлмаськеменызы-тыршеменызы но Татарстанысь удмуртъёслэн НКА-зылэн правлениезлэн тӧроезлэн Андрей Сергеевич Герасимовлэн дурбасьтэменыз, ёрос кивалтӥсьёсын огкылэ вуыса, тодон-валан юртэз утьыса кельтыны луиз. Озьыен, Вылын Ушма покчиёзо школаын но туэ нырысетӥ гырлы куара чузъяськиз. Шумпотымон, празднике анай-атайёсын, ёросысь дышетонъя управленилэн кивалтӥсеныз Мухарлямов Ренат Камилевичен ӵош Казаньысь гажано куно но пыриськиз — Андрей Сергеевич Герасимов. Татарстанысь удмуртъёслэн тӧрозы дышетскисьёсты, школа-нылпи садлэсь коллективзэ, анай-атайёсты но вань люкаськем куноосты школалэн ужзэ азинтэменыз, Тодонлыклэн нуналэныз, выль дышетскон арен ӟечкылаз, аслэсьтыз ӟеч сӥзёнъёссэ вераз но школьникъёслы удмурт книгаосты кузьмаз. Пусйыны кулэ, та книгаос Бигер кылэз но Татарстан Республикаын улӥсь калыкъёслэсь кылъёссэс утёнъя, азинтонъя Татарстан Республикалэн Президентэз бордын ужась комиссилэн тыршеменыз поттэмын шуыса.

Андрей Сергеевич озьы ик Покчи Лӧзя шоръёзо школаын ортчем праздник ужрадэ но пыриськиз. Выль дышетскон арен ӟечкыласа, шуныт сӥзёнъёссэ вераз, 1-тӥ классын дышетскисьёслы удмурт книгаосты кузьмаз.  

Фото: https://vk.com/id675243752