«Выжы коркась кен» - Кушкетын (фоторепортаж)
16-тӥ тулыспалэ Вуж Кушкет гурт клубын «Выжы коркась кен» ёрос конкурслэн зональной этапез ортчиз. Сизнер, Вуж Турья но Вуж Кушкет гуртысь кенъёс, пӧртэм эскеронъёсты ортчыса, асьсэлэсь котькуд ласянь усто луэмзэс возьматӥзы.
Кылсярысь, асьсэ но семьязы сярысь вераса, видеопрезентация ӵектӥзы, нылъёссылы вакчи дыр куспын чебер причёска лэсьтӥзы, ыльнянез бугыртыса, шыдлы тукмач вандылӥзы. Конкурслэн одӥгез куронэз вал скал кыскон аппаратэн ужаны быгатэмзэс возьматон. Татын но удмурт кенъёс возьытэ ӧз усе - вакчи дыр куспын люказы но сэрттӥзы сое. Мукетыз конкурс нылкышноослэсь ческыт пӧраськыны быгатэмзэс шараяз. Котькудӥз кен нимысьтыз та конкурслы дасям удмурт калык сиён дасям вал - кин мильым, кин пельнянь, кин перепеч. Нош викторина амалэн ортчытэм конкурсын кенъёслэсь визьзэс но сыназы. Татын но ӧз сётске соос, котькуд юанлы шуымон валэктон сётыны, асьсэлэсь эрудированной луэмзэс возьматыны быгатӥзы. Со сяна, нылкышноослы творческой выступление но дасяно вал. Утёд ке, кенъёсмы кырӟаны но, эктыны но усто вылэм. Мылкыдэз бугыртӥсь кырӟанэн но, шулдыр эктонэн но жюрилэсь но учкисьёслэсь сюлэмъёссэс шунтыны быгатӥзы уго.
Та зоная вожвылъяськонэ пыриськизы Сизнерысь Ермолаева Таисия Анатольевна (куинь нылпилэн анаез, туннэ нуналэ Улисьял покчиёзо школаын дышетэ), Турья гуртысь Тимофеева Юлия Юрьевна (егит анай, Шор Кушкет школаысь англи кылъя дышетӥсь) но Кушкетысь Филиппова Алина Александровна (кык нылпилэн анаез, гуртысьтызы фельдшер-акушер пунктысь медсестра) – со ик луиз та зонная вормись. Малпасько, кенъёслэсь вожвылъяськемзэс учкыны лыктэм адямиос но монэным соглаш луозы, дыр, куиньназы ик нылкышноос туж усто выступить каризы шуыса верай ке. Адске вал, соос мыло-кыдо, сюлмысь дасяськиллям шуыса.
Вуоноез зоная ӵошатскон ортчыны кулэ Ӟаны гуртын. Отчы пыриськозы кылем удмурт гуртъёсысь кенъёс. Соин огъя йылпумъянъёс но со бере гинэ лэсьтэмын луозы. Озьыен, возьмаськом.
Туспуктэмъёсыз Ольга Плотниковалэн но Гульнара Гариповалэн
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев