Халтуринъёс — ёросысьтымы дышетӥсьёслэн дано династизы (3-тӥ люкет)

Григорий Семёнович усто дышетӥсь гинэ ӧвӧл, визьмо кивалтӥсь но, йӧно адями но луэм. Туж но туж трос лэсьтэм со вордскем гуртысьтыз школаез понна.

Быдӟым тылож бере покчи классъёсты йылпумъям но сютэм улонэн сэрен дышетсконзэс азьланьтыны быгатымтэ нылпиос туж трос луиллям. Кивалтӥсьёс со нылпиосты асьсэ гуртъёсазы дышетыны малпаллям. Кӧргемын 1947 арын, гуртысь кошкем кык семьялэсь юртъёссэс сэрттыса, кык классъем юрт лэсьто. Берлогес классъёслэсь лыдзэс витёзь вутто но, школа сизьым аръем шуыса лыдъяськыны кутске. Та ваньмыз нырысь ик школалэн директорезлэн Григорий Семёновичлэн тыршемезлэн бервылыз луэ.

Школаын соку трос гуртъёсысь нылпиос дышетскиллям, Киров улосысь гинэ но нылпиос луиллям. Сизьым класслы 120 мында нылпи луэм.

1960-тӥ арын Григорий Семёнович заочно Ижкарысь педагогикая институтэз йылпумъя, историяя дышетӥсьлэсь ӧнерзэ басьтэ. Нош 1963-тӥ арын Ципьяысь школае ужаны выже, директорлэн воштӥсез луэ. Григорий Халтуринлэн ужам аръёсаз, солэн радъямез улсын нырысетӥосыз «Костёр дружбы» пумиськонъёс ортчо, озьы ик школаын музей усьтӥське.

Гумырез ӵоже Григорий Семёнович пропагандист луэм. Школаын ужан вакытаз ик, со «Активист» колхозын парткомлэн секретарез луэм, Кӧргемын партийной дышетсконъёсъя вечерней школалэсь ужзэ нуэм. Вераса быдтонтэм трос солэн орденъёсыз но медальёсыз, почётной грамотаосыз. Туж трос нылпиослы со тодон-валан сётэм, трос ужез шоры учкытэк, кузпалэз понна матысь эш луыны быгатэм, нылпиосыз понна — яратӥсь атай. Жаляса вераны кулэ, та улонысь туж вазь кошкем — 1977 арын. Кӧня ӟечсэ лэсьтыны быгатысал али со аслаз гуртэз, аслаз школаез понна. Но Инмарлэн котькуд адямилы аслаз планъёсыз уга.

Азьланьтонэз вань.