Йӧвылэпотон шулдыр ортчиз

Выль армес пумитам кыз котыр,

Ымусьтон пусйимы туж шулдыр.

Ӧм но вуэ сьӧрмес учкыны,

Азбаре ни вуиз Вуж Выль ар!

Вуж Выль ар вуж сямъя пусйимы,

Праздникен ӟеч кылъёс верамы,

Узырлык, тазалык сӥзимы,

Вуж арысь секытэз уллямы.

Йӧвылэпотонмы но вуиз,

Котырак воректӥз, чеберскиз,

Жингыртӥз вож ыргон гырлыен.

Гурезьёс тырмизы серекъян куараен.

Йӧвылэпотонлы (асьме палан озьы шуо) клуб сьӧрамы лымы гурезь ӝутэмын вал, сое ас трактореныз тыршись Станислав Никитин лэсьтӥз. Мар ветлод нюке мур лымы лёгаса, эшшо ке пеймытэн. Бадӟым шумпотон луиз со пичиезлы но, бадӟымезлы но. Нискыланы яратӥсьёс люкаськизы ик. Вожмаськыса, тырмыт нискыласа пӧсяммы, копак лымы гондыр кадь луэммы бере, клублэн кивалтӥсез Зоя Михайловна Никитина милемыз клуб пушкы ӧтиз. Паймод, ява! Мабыдӟа ӝӧк дасямын. Ма но ӧвӧл отын! Нискыласьёс лыктэмлэсь азьло ик кырын сӥлен ческыт чабей ӝук, пыштурынэн чай дасям. Вашкала дыръя праздникъёсы ӝук пӧзьтылӥллям, кеньыр быртык мында шудбур мед пыроз, пе. Ӝукез туж ушъяса сиизы. Зэм но, али но ымын кадь. Кунояськеммы, кӧсаммы бере, выльысь нискыланы клуб азбаре потӥм. Кема нискыламы на. Пумаз Зоя Михайловна ӵошатскон ортчытӥз: кинлэн салазкиез кыдёкегес нискылтоз. Вормисьёс Валерий Иванов но Лидия Асакова луизы. Соослы кузьым ведра сётӥськиз. Праздникез шулдыр ортчытӥм. Тау, Зоя Михайловна!

Гурезьын, ӝӧк сьӧрын праздникез пусйимы,

Люкаським выжыен, эшъёсын!

Тазалык, яратон но шудбур,

Тупаса ӟеч улон но ваньбур

Мед луоз та югыт дуннеын!

Василий Никитин,

Карек-Серма гурт