Сырьяын нырысетӥзэ Гуртлэсь нуналзэ пусйизы

Со нуналэ кӧня ке гуртъёсын Сабантуй праздникъёс ортчизы, со сяна, Карек-Сермаын Гуртлэсь нуналзэ ортчытӥзы, Покчи Лӧзя гуртын дышем традиция «Берёзка» праздник радъяськиз. Нош таиз статья Сырья гуртын нырысетӥзэ радъяськем но ортчытэм Гуртлэн нуналэз сярысь луоз.

Гуртлэсь нуналзэ ортчытон — со туж шулдыр праздник. Нош кӧня кужым но дыр кулэ со праздникез дасян но ортчытон понна! Тужгес но секыт, куке ужрадэз нырысетӥзэ ортчытӥськод. Уж секыт вал ке но, сырьяос, огазе кариськыса, ужрадэз вылӥ уровенен ортчытыны быгатӥзы. Асьсэлэсь огъя луэмзэс нош огпол возьматыны быгатӥзы.  

Ужрадлэн куноосыз пӧлын вал Балтась ёрослэн исполкомезлэн кивалтӥсез Айдар Хайрутдинов, «Труд» обществолэн кивалтӥсез Рашид Хадиев, Ципья гурт поселенилэн главаез Азат Нутфуллин, кема аръёс ӵоже «Труд» обществоен кивалтэм, Сырья гуртлэн гажано адямиез Пётр Чернов. Куноос, Сырья гуртын улӥсь калыкез но палэнысь вуэм куноосты праздникен ӟечкыласа, шулдыр мылкыд сӥзизы но азьпалан но таӵе праздникъёсын пумиськыны мылкыд каризы.

Гуртлэн нуналэз шулдыр, кемалы тодэ кыльымон ортчиз. Со трос калыкез огазе люказ: арлыдоос, егитъёс пумиськыса, ог-огенызы сюлмысь вераськизы, нош пиналъёс эшъёсынызы шудӥзы. Нялтас вераса, сырьяос пӧртэм сэрегъёсын уло: Дальней Востокын, Казахстанын, Сибирьын, Уралын, Башкириын, Кировын, Удмуртиын, Комиын но мукет городъёсын но улосъёсын. 

Туннэ нуналэ Сырья гуртын 60 юрт лыдъяське (адямиослэн лыдзы 237 луэ). Гуртысь нылпи садын сизьым, нош покчиёзо школаын дас вить нылпи визьнод басьтэ. Сырья гуртысь кызь одӥг нылпи Ципья шоръёзо школаын дышетске, пӧртэм дышетскон юртъёсын тодон-валан басьтӥсь дас тямыс студентъёссы но вань. Куинь пиос туннэ нуналэ арми радъёсын служить каро. Сырьяос пӧлысь кызь вить адями Казаньын ужа, кызез — ёросын. Гуртын умой улон понна пӧртэм каньыллыкъёс вань: нылпи сад, школа, ФАП, спортплощадка, нылпи площадка, амбар, ферма.

Праздникез туж чебер каризы ужрадэ пыриськем нылъёслэн но апайёслэн удмурт дэремъёссы, чебересь камалиоссы, жингрес куараоссы. Сырьяос кунооссэс но ас гуртооссэс ческыт ӝукен, чаен куноятӥзы. Удмурт гуртлэсь праздниксэ удмурт кырӟанъёстэк, эктонъёстэк но юмшанъёстэк син азе пуктыны но уг луы. Татын но ваньмыз вань вал: апай сямен эктон но, агай сямен эктон но, туала кырӟан-эктонъёс сярысь но ӧз вунэтэ сырьяос. Трос тунсыко вожвылъяськонъёсты но дасяллям вал соос: гозыен кыстаськон (оген-оген но командаен), бодыен кыстаськон, турникын ӝутъяськон, кросс бызьылон, пуйыен тэтчан, пуньыен курегпуз нуллон, пуклё вылын пуйыен жугиськон, атас кутон, карнанэн ву нуллон, куасэн бызьылон. Озьы ик праздникын самой покчи нылпилэсь (Анастасия Прокопьевалэсь) анай-атайзэ, самой мӧйы улӥсез Яким Сапожниковез, самой трос медальёсты утэм спортсменэз Андрей Зубаревез кузьымъёсын пусйизы. Сцена вылысен шуныт кылъёссэс веразы кыдёкысь вуэм куноос но.

Нимысьтыз Гуртлэн нуналэзлы шуыса ялэмын вал «Сэрья гуртэ — Вордскем шаере» (ӟуч сямен «Сырья — Родина моя») кылбуръёсъя конкурс. Конкурслэн йылпумъянъёсызъя, куинетӥ интыез басьтӥз София Плотникова (ӟуч кылын «Сырья – Родина моя» кылбур), кыкетӥ интыын Ираида Чернова (удмурт кылын «Сэрья гуртмы»), нош нырысетӥ луиз Лариса Чернова (удмурт кылын «Вордӥськем гуртэ» кылбур).

Ужрадлэн тужгес яркыт но тодэ кыльымон люкетэз вал, куке сцена вылэ Удмуртиысь вуэм артистъёс потӥзы — «Вить Сергейёс». Куноос мылысь-кыдысь сырья калыкез шулдыртӥзы, удмурт но ӟуч кылын чебер кырӟанъёссэс быдэстӥзы. 

Гуртлэсь нуналзэ нырысетӥзэ гинэ радъязы ке но, сырьяос туж умой ужрад ортчытыны быгатӥзы. Калык сое ас кужыменыз но валтӥсь спонсоръёслэн — Азат Нутфуллинлэн но Рашид Хадиевлэн — юрттэменызы усто радъязы. Нимысьтыз ик Сырья клублэн заведующиезлэн Леонид Сапожниковлэн, «Сырья зоутъёс» ансамбльлэн, гуртысь нылпиослэн но ужрадлы мылкыдтэм луисьтэм вань адямиослэн тыршеменызы зэмос праздник пӧрмиз. Данъяськымон, ушъяськымон ужрад ортчытыны быгатӥзы сырьяос. Гурт калык но, отчы вуэм куноос но, праздникез радъясьёслы бадӟым тау каремзэс вераса, ӝутскем мылкыдын, азьпалан но таӵе пумиськонъёслы оскыса таркаськиз.

Материал ужрадэз нуисьёслэн юрттэменызы но сценариен пайдаяськыса дасямын.