Алмаз, Айзатлар икенче ...

Үткән атнада Алабуга шәһәре дә гөрләп алды. Биредә “Сабантуй” журналы призларына яшьләр арасында Татарстан беренчелегенә көрәш ярышлары булып узды. Тарихта беренче мәртәбә берьюлы 2002-03,2004-05 елларда туган яшьләр арасында узган бу ярышларга моңарчы күрелмәгән күләмдә көрәшчеләр җыйналган иде - 70 командадан 498 көрәшче. Аллага шөкер, безнең 2002-03 елгы егетләребез янә үзләрен күрсәтә алдылар, команда нәтиҗәсе буенча икенче булдылар. Ә менә 2004-05 елгылар исә, җиденче урын яулап, барыбер “алтын” унлыкка керә алдылар. Шәһси беренчелектәге уңышларга килсәк, Балтачтан Айзат Гәрәев һәм Арбордан Алмаз Галләмовлар үз үлчәү авырлыкларында икенче урыннарны яулап, тарихка керделәр. Аларга 6 мең сум күләмендә акчалата бүләкләр, диплом, дәрәҗәле медальләр тапшырылды. Афәрин, егетләр.