«Батальонъ» балтачлыларның хәрби әзерлеген күрсәтте (+фоторепортаж)

Уенның сценарие буенча командалар урман эчендә урнашкан герой-шәһәрләр исеме белән бирелгән пунктлардагы каршылыкларны үтәргә тиеш иделәр. Әлеге чарага командаларның хәрби киемнән килүләре дә аерым бер төсмер биреп, җитдилек өстәде кебек. Уенда «Шифа» исеме астында район үзәк хастаханәсе коллективы һәм «Ватан» исеме астында «Таттелеком» коллективы катнашты. Аларга пәрәвез аша шуышып чыгу, танк муляжына граната ату, альпинист җиһазлары ярдәмендә чокырны (овраг) үтү, пневматик винтовкадан снайперларны юк итү, яраланган хәрби дустыңа беренче ярдәм күрсәтү, миналы кырны исән-сау үтеп чыгу кебек биремнәрне үтәргә кирәк булды.

Һәрбер команда бик әйбәт хәрби әзерлек күрсәтте. Шулай да җиңүчене билгеләргә дә кирәк иде һәм бу юлы бәхет «Ватан» командасына елмайды, «Шифа» командасы да икенче урынга лаек булуларын яхшы кәефләрен югалтмыйча кабул итте. Ә ахырдан командаларга истәлекле бүләкләр, һәм «Хыял»ның дипломнары тапшырылды.