Тозны дөрес сайлагыз!

Автор, 13 октябрь 2024 - 11:11

517

Кышкылыкка кәбестә тозлаганда берничә киңәшне искә алыгыз.

Шимбә-якшәмбе көннәре ял итү өчен генә түгел, кышкылыкка әзерләнү өчен дә уңайлы. Бакчада көзге эшләрне тәмамларга, кышкылыкка кәбестә тозларга була. Җиңел генә рецепт тәкъдим итәбез.

Укроп белән
Укроп белән тозлаган кәбестә аеруча тәмле була. Көннәр коры чакта ук бакчада үскән хуш исле укропның орлыгын җыеп куярга кирәк. Кәбестә тозлау вакыты җиткәч, әзер укропны куллану бик уңайлы була.

Тозлау өчен 3 килограмм чамасы булган бер баш кәбестә, уртача зурлыктагы 3 кишер, 2 аш кашыгы тоз, 1 аш кашыгы коры укроп орлыгы кирәк булачак. Ваклап туралган кәбестәне уңайлы киң савытка салабыз һәм өстенә тоз сибәбез. Кышкылыкка тозлый торган кәбестәгә тозны да дөрес сайларга кирәк, аның өчен эре тоз (каменная соль) яхшы була. Вак яисә йодлы тоз ярамый.

Кәбестәне бутыйбыз һәм кул белән бераз уабыз. Вак кыргычтан чыгарылган кишерне һәм укропны кушып, тагын бутыйбыз. Өстенә авыр әйбер куеп, өч көн җылы бүлмәдә тотабыз. Бу вакыт эчендә газы чыксын өчен кәбестәне әледән-әле агач таяк белән тишкәләп торабыз. Шулай эшләмәсәң, аңа әче тәм керә. Өченче көнгә кәбестәне чиста, коры банкаларга тутырып, базга төшереп куябыз.